ۇمىتكەرلەر تىركەلۋ ۇستىندە

شىعىپ قالعان ءماسليحاتتار دەپۋتاتتارىنىڭ ورنىنا سايلاۋ جونىندەگى سايلاۋ ناۋقانىنىڭ

ءوتۋ بارىسى تۋرالى

(2014 جىلعى 3 ناۋرىزداعى جاعداي بويىنشا) «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭنىڭ 101-بابى 4-تارماعىنا سايكەس, اعىمداعى جىلدىڭ 30 ناۋرىزىندا رەسپۋبليكانىڭ 14 وڭىرىندە 59 سايلاۋ وكرۋگىندە شىعىپ قالعان ءماسليحاتتار دەپۋتاتتارىنىڭ ورنىنا سايلاۋ وتەدى. بارلىعى استانا قالالىق ءماسليحاتىنىڭ 1 دەپۋتاتى, 7 وبلىستىق دەپۋتات, 12 قالالىق دەپۋتات جانە 39 اۋداندىق ءماسليحاتتار دەپۋتاتتارى سايلانادى. قازىرگى ساتتە 185 ادام ۇسىنىلدى. ولاردىڭ 60-ىن ساياسي پارتيالار, 2-ءىن قوعامدىق بىرلەستىكتەر ۇسىندى جانە 123-ءى ءوزىن ءوزى ۇسىنعاندار. ۇسىنىلعان كانديداتتاردىڭ 132-ءسى ەر ادام, 53-ءى ايەل ادام. ءماسليحاتتار دەپۋتاتتارىنىڭ مانداتتارىنا ۇمىتكەرلەردىڭ ورتاشا جاسى 41 جاستى قۇرايدى. 82,7%-ىنىڭ جوعارى ءبىلىمى بار. قازىرگى ساتتە ءماسليحات دەپۋتاتتىعىنا ۇمىتكەر رەتىندە 69 ادام تىركەلدى. ولاردىڭ 33-ءى قازاقستان رەسپۋبليكاسى ساياسي پارتيالارىنىڭ مۇشەلەرى بولىپ تابىلادى, 24-ءى پارتيادا جوق, تاعى 12-ءسى وزدەرىنىڭ پارتياعا مۇشەلىكتەرىن كورسەتپەگەن. سايلاۋ ناۋقانى سايلاۋ زاڭناماسى نورمالارىنىڭ تالاپتارىنا سايكەس ءوتىپ جاتىر. ورتالىق سايلاۋ كوميسسياسىنا ارىزدار مەن وتىنىشتەر كەلىپ تۇسكەن جوق, دەپ حابارلادى قازاقستان رەسپۋبليكاسى ورتالىق سايلاۋ كوميسسياسىنىڭ ءباسپاسوز قىزمەتى.