«قر ۇكىمەتىنىڭ 2021 جىلعى 30 قاراشاداعى № 852 قاۋلىسىمەن «قازترانسگاز» اق-عا ۇلتتىق كومپانيا مارتەبەسى بەرىلدى. ءتيىستى تولىقتىرۋ «ۇلتتىق باسقارۋشى حولدينگتەردىڭ, ۇلتتىق حولدينگتەردىڭ, ۇلتتىق كومپانيالاردىڭ تىزبەسىن بەكىتۋ تۋرالى» قر ۇكىمەتىنىڭ قاۋلىسىنا ەنگىزىلدى. سونداي-اق, قر ۇكىمەتىنىڭ № 853 قاۋلىسىمەن «قازترانسگاز» اكتسيونەرلىك قوعامى «قازترانسگاز» ۇلتتىق كومپانياسى» اكتسيونەرلىك قوعامى بولىپ قايتا اتالدى», دەلىنگەن كومپانيا اقپاراتىندا.
سونىمەن قاتار «جەر قويناۋى جانە جەر قويناۋىن پايدالانۋ تۋرالى» كودەكستىڭ 278-بابىنىڭ 8-تارماعىنا سايكەس قر ۇكىمەتى جەر قويناۋىن پايدالانۋ سالاسىنداعى ۇلتتىق كومپانيالار قىزمەتىنىڭ اراجىگىن اجىراتۋدى بەكىتتى. وسى قۇجاتقا سايكەس, قازترانسگازعا گاز جانە گاز كوندەنساتتى كەن ورىندارىندا بارلاۋ جانە ءوندىرۋ بويىنشا باسىمدى قۇقىق بەرىلىپ وتىر.
وسىلايشا, دەربەس ۇلتتىق گاز كومپانياسىنا بەرىلگەن مارتەبە «قازترانسگاز» اق-عا ۇلكەن پەرسپەكتيۆالار اشپاق. «بۇل قازاقستاننىڭ گاز سالاسى ءۇشىن ماڭىزدى تاريحي ساتتەردىڭ ءبىرى.
«قازترانسگاز» تاۋەلسىزدىك جىلدارى ورتالىق ازياداعى گاز اعىندارىنىڭ ماڭىزدى ءارى تەحنولوگيالىق ەڭ قۋاتتى وپەراتورىنا اينالدى. كوگىلدىر وتىن, جىلۋ مەن جايلىلىق 9 ميلليوننان استام قازاقستاندىقتىڭ ۇيلەرىنە جەتتى, شامامەن 50 مىڭعا جۋىق كاسىپورىن تابيعي گازدى پايدالانادى. بۇل - گاز ماماندارىنىڭ ەلدىڭ الەۋمەتتىك-ەكونوميكالىق دامۋىنا قوسقان ەلەۋلى ۇلەسى. جاقىن ارادا كومپانيانىڭ شەشۋى قاجەت نەگىزگى مىندەتتەر - بۇل گازدىڭ رەسۋرستىق بازاسىن ارتتىرۋ, تاۋارلىق گاز ءوندىرىسىن ىنتالاندىرۋ, قولدانىستاعى جانە جاڭا كەن ورىندارىندا گەولوگيالىق بارلاۋ جانە گاز ءوندىرۋ. سونىمەن قاتار ەلدىڭ گاز تاسىمالداۋ جانە گاز تاراتۋ ينفراقۇرىلىمىن مودەرنيزاتسيالاۋ كۇن تارتىبىندەگى ماسەلە سانالادى», دەپ اتاپ ءوتتى كومپانيا.
