ءفيلمنىڭ رەجيسسەرى اقان ساتاەۆ. ءفيلمدى قر مادەنيەت جانە سپورت مينيسترلىگى تاپسىرىسى بويىنشا ۇلتتىق كينونى قولداۋ مەملەكەتتىك ورتالىعىنىڭ قولداۋىمەن Sataifilm كينوستۋدياسى ءتۇسىردى.
وسىعان وراي الماتىدا ءفيلمنىڭ شىعارماشىلىق توبىنىڭ قاتىسۋىمەن ءباسپاسوز وتىرىسى ءوتتى.
فيلم قازاقستاننىڭ بىرنەشە دۇركىن چەمپيونى, بوكستان ەكى دۇركىن الەم چەمپيونى, وليمپيادا چەمپيونى, بوكسشى سەرىك ساپيەۆتىڭ شىنايى وقيعاسىنا نەگىزدەلگەن.
بويىنداعى كۇش-قۋاتى تولىققان كەزدە ول بەيجىڭ وليمپياداسىنا بارىپ, ارمانىنا ءبىر قادام قالعاندا سۇرىنەدى. قوعامدىق سىن, جۇيەنىڭ قىسىمى, وتباسىنداعى پروبلەمالار. سەرىك ءوزىنىڭ ارمانىنا كۇماندانا باستايدى, سەبەبى كەلەسى وليمپيادا 4 جىلدان كەيىن عانا بولادى.
فيلمدەگى وقيعا سۇحبات فورماتىندا بەرىلەدى, وندا سەرىك ءومىرىنىڭ ماڭىزدى ساتتەرىن ەسكە ءتۇسىرىپ, سپورتتاعى جولى قالاي باستالعانىن, جەڭىلىستەرى, جەڭىستەرى مەن ارمانىنا جەتكەنى تۋرالى باياندايدى.
كارتينانىڭ ستسەناريىن اقان ساتاەۆ, تيمۋر جاقسىلىقوۆ پەن الميرا تۇرسىن بىرلەسىپ جازعان. ايتا كەتسەك, سەرىك ساپيەۆ بۇل جوبادا كەڭەسشى بولعان. ءفيلمنىڭ قويۋشى وپەراتورى بۇرىن ساتاەۆتىڭ كوپتەگەن كارتينالارىندا جۇمىس ىستەگەن حاسان قىدىراليەۆ بولدى. سونىمەن قاتار, بۇل جوبادا «توميريس», «كانيكۋلى offline» جانە «ۆ پويسكاح مامى 2» كارتينالارىندا جۇمىس ىستەگەن وپەراتور جانتاي قىدىراليەۆ تا بار.
ءباسپاسوز وتىرىسىندا ءبىرىنشى بولىپ ءسوز سويلەگەن «ۇلتتىق كينونى قولداۋ مەملەكەتتىك ورتالىعىنىڭ» باس پروديۋسەرى اداي ءابىلدينوۆ «بوكسشى» جوباسى اتالعان ورتالىقتىڭ وندىرىسكە جىبەرگەن العاشقى كارتينالاردىڭ قاتارىندا بولعانىن ايتتى. ءفيلمنىڭ ءتۇسىرىلىمى 2020 جىلى ناۋرىز ايىندا باستالعان, بىراق كوروناۆيرۋس پاندەمياسىنا بايلانىستى قازاقستاندا تج ەنگىزىلگەننەن كەيىن توقتاتىلدى. الايدا, Sataifilm توبى تۇسىرىلىمدەردى سول جىلدىڭ قاراشا ايىندا اياقتاي الدى.
– ءفيلمدى وتە ۇزاق, ەكى جىلدان استام ۋاقىت تۇسىردىك. دايىندىق كەزەڭى مەن كاستينگكە ۇلكەن كوڭىل ءبولىندى. باستى كەيىپكەردى دە ۇزاق ۋاقىت ىزدەدىك, - دەدى اقان ساتاەۆ.
تاريحي دالدىك ءۇشىن باستى رولگە ۇلكەن رەسپۋبليكالىق كاستينگ جاريالاندى. كاستينگ بويىنشا ديرەكتور جاينا ابديەۆانىڭ ايتۋىنشا, دايىندىق كەزەڭدە 800-دەن استام ءوتىنىش ءتۇسىپ, اشىق كاستينگكە 600-دەن استام ادام قاتىسقان. باستى رولگە اكتەر تاڭداۋدىڭ نەگىزگى كريتەريلەرى – باستى كەيىپكەردىڭ پروتوتيپكە ۇقساستىعى, كينو جانە بوكس شەبەرلىگى بولدى. ساپيەۆ رولىنە ۇلكەن ىزدەنىستەردىڭ ناتيجەسىندە دەبيۋتانت سماديار سابىروۆ بەكىتىلدى.
– مەن بىرنەشە كاستينگكە قاتىستىم. سولاردىڭ ءبىرى «توميريس» ءفيلمى بولاتىن, بىراق بۇل جوباعا ىلىنبەدىم. بىرنەشە جىلد وتكەن سوڭ ماعان قوڭىراۋ شالىپ وسى فيلمگە كاستينگكە شاقىردى. ارينە, تاڭقالسام دا, ىشتەي قاتتى قۋاندىم. ماعان سەنىپ, قولداۋ بىلدىرگەن رەجيسسەرگە, سونداي-اق كاستينگ-ديرەكتور جاينا ابديەۆاعا العىسىمدى بىلدىرەمىن, - دەدى سماديار سابىروۆ.
ايتا كەتسەك, اقان ساتاەۆ ءۇشىن باستى رولدەرگە تالانتتى دەبيۋتانتتاردى تاڭداۋ اۆتورلىق قولتاڭباسى ىسپەتتى. ءار جىلدارى رەجيسسەر ەركەبۇلان دايىروۆ ء(تورت ءبولىمدى باۋىرجان مومىش ۇلى فيلمىندە دەبيۋت جاساعان), اسىلحان تولەپوۆ پەن ايان وتەپبەرگەن («جاۋجۇرەك مىڭ بالا» فيلمىندە دەبيۋت جاساعان) جانە الميرا تۇرسىن («توميريس») دەبيۋت جاسادى) سىندى اكتەرلەردىڭ ەسىمىن قالىڭ كورەرمەنگە اشىپ بەردى.
ەكىنشى پلانداعى باستى رولگە ۇلتتىق كينونىڭ مايتالماندارى باقتيار قوجا مەن يرينا اجمۋحامەدوۆا باستى كەيىپكەردىڭ اتا-اناسىن سومداعان, سونداي-اق جاتتىقتىرۋشى الەكساندر سترەلنيكوۆتىڭ بەينەسىن سومداعان تەاتر اكتەرى ءارى رەجيسسەر يگور ەرماشوۆ بەكىتىلدى.
«بوكسشى» سپورتتىق دراماسى وندىرىسكە قوسىلعان ساتتەن باستاپ قازاقستاندا عانا ەمەس, ودان تىس جەرلەردە دە كوپتەن كۇتكەن قازاقستاندىق فيلمدەردىڭ ءبىرى بولىپ سانالادى. مىسالى, وسى جىلدىڭ قازان ايىندا ساتاەۆ 1988 جىلعى وليمپيادانىڭ كۇمىس جۇلدەگەرى, جارتىلاي اۋىر سالماقتاعى ءابسوليۋتتى الەم چەمپيونى. ءبىرىنشى, ەكىنشى ورتا, جارتىلاي اۋىر, ءبىرىنشى جارتىلاي اۋىر جانە اۋىر سالماق دارەجەلەرى بويىنشا الەم چەمپيونى روي دجونسقا كارتينانىڭ شاعىن ەپيزودىن كورسەتتى.
سپورت اڭىزى كارتينانىڭ پرەمەراسىن اسىعا كۇتەتىنىن ايتىپ, كورگەن ۇزىندىلەرگە قاتتى قىزىعىپ ولاردى جوعارى باعالادى.
سونداي-اق ءباسپاسوز وتىرىسىنا قاتىسقان Kinopark & Kinoplexx Theatres باسشىسى الماز مالدىباەۆ «بوكسشى» ءفيلمىنىڭ كاسسالىق تابىسى Rentrak جۇيەسى ارقىلى باقىلاناتىن العاشقى وتاندىق فيلم بولاتىنىن ايتىپ ءوتتى.
