كەش شىمىلدىرىعى مەرەيتوي يەسىنىڭ ءومىرى مەن شىعارماشىلىعى جايلى سىر شەرتكەن دەرەكتى فيلممەن اشىلدى. ودان كەيىن اقىننىڭ سياسى ءالى كەۋىپ ۇلگەرمەگەن « ۇلىتاۋدان – الاتاۋعا» اتتى جاڭا كىتابىنىڭ تۇساۋى كەسىلدى.
جەتپىستەگى ءجۇرسىن ەرماندى العاشقى بولىپ وبلىستىڭ اكىمى جەڭىس قاسىمبەك قۇتتىقتادى.
– ءسىز قازاقتىڭ ءتول ونەرى – ايتىستىڭ قارا نارىسىز. بۇل – ەلدىڭ بەرگەن جوعارى باعاسى جانە بار قازاقتىڭ بەرگەن باتاسى دەپ سەنەمىن. ءومىرىڭىزدىڭ ەلۋ جىلىن وسى ايتىستى جاڭعىرتۋعا, دامىتۋعا ارناپ, ونى ناسيحاتتاۋمەن كەلەسىز. ايتىس پەن ءسىزدىڭ ەسىمىڭىز سينونيمگە اينالدى. قالامىڭىزعا – قۋات, شىعارماشىلىق تابىس تىلەيمىن, – دەگەن وبلىس باسشىسى مەرەيتوي يەسىنىڭ يىعىنا شاپان جاۋىپ, لايىقتى سىي-سياپاتىن جاسادى.
سونىمەن بىرگە, اقىندى ايگىلى اكتەر, كينو جانە تەاتر رەجيسسەرى, قازاقستاننىڭ ەڭبەك ەرى ءاسانالى ءاشىموۆ باستاعان ءبىر توپ زيالى قاۋىم وكىلى ارنايى كەلىپ قۇتتىقتادى. ولاردىڭ اراسىندا قازاقستان جازۋشىلار وداعىنىڭ توراعاسى ۇلىقبەك ەسداۋلەت, نەسىپبەك ايت ۇلى, التىنبەك قورازباەۆ, سەرىك اقسۇڭقار ۇلى, عالىم جايلىباي, امانجول التاەۆ سىندى بەلگىلى ازاماتتار بولدى.
مەرەيتوي يەسىنىڭ كەشىن اقىن, ءماجىلىس دەپۋتاتى جاناربەك ءاشىمجان اشىپ, جۇرگىزىپ وتىردى.
مۋزىكالىق-ادەبي كەش بارىسىندا ساكەن سەيفۋللين اتىنداعى قاراعاندى وبلىستىق اكادەميالىق قازاق تەاترىنىڭ ارتىستەرى اقىن ءجۇرسىن ەرماننىڭ تانىمال ولەڭدەرىن جاتقا وقىپ, جىرسۇيەر قاۋىمنىڭ ءىلتيپاتىنا بولەندى. سونىمەن بىرگە ساحنادا جەرگىلىكتى ونەرپازدار ءسوزىن مەرەيتويى يەسى جازعان اندەردى شىرقاپ, كورەرمەننىڭ قۇلاق قۇرىشىن قاندىردى. اسىرەسە, كينو جانە تەاتر ونەرىنىڭ ابىزىنا اينالعان ءاسانالى ءاشىموۆتىڭ جانە بەلگىلى سازگەر التىنبەك قورازباەۆتىڭ ورىنداۋىنداعى جاڭا اندەر انسۇيەر قاۋىمدى ايتىپ جەتكىزگىسىز اسەرگە بولەدى.
شىعارماشىلىق كەش وتكەن كۇننىڭ ەرتەسىندە قالاداعى كەنشىلەردىڭ مادەنيەت سارايىندا ەل ەسىمدەرىنە جاقسى قانىق 16 اقىننىڭ قاتىسۋىمەن ءجۇرسىن ەرماننىڭ 70 جىلدىعىنا ارنالعان رەسپۋبليكالىق اقىندار ايتىسى ءوتتى.
جىر بايگەسىندە اقىندار مەرەيتوي يەسىن ماقتاۋمەن عانا شەكتەلمەي, قازىرگى قوعامدى الاڭداتىپ وتىرعان بىرقاتار ماسەلەلەردى دە باتىل ايتتى. توعىز ساعاتقا سوزىلعان ايتىستى اقىن, قازاقستاننىڭ ەڭبەك سىڭىرگەن قايراتكەرى امانجول التاەۆتىڭ شەبەر جۇرگىزگەنىن ايتا كەتكەن ءلازىم.
ءاسانالى ءاشىموۆ باستاعان قازىلار القاسىنىڭ شەشىمىمەن اقىندار ايتىسىنىڭ باس جۇلدەسى جەزقازعان قالاسىنان كەلىپ باق سىناعان تولەگەن جامانوۆقا بەرىلدى.
باتىس قازاقستان وبلىسىنىڭ اقىن قىزى جانسايا مۋسينا ءبىرىنشى ورىنعا تىگىلگەن جۇلدەنى جەڭىپ السا, ەكىنشى بايگەنى ءۇش بىردەي اقىن – ەركەبۇلان قاينازار, ايتباي جۇماعۇل جانە قاليجان ءبىلداش ءوزارا ءبولىستى.
بەس ايتىسكەر ءۇشىنشى جۇلدەگە لايىقتى دەپ تانىلدى. ولاردىڭ قاتارىندا اسەم ەرەجە, باۋىرجان شيرمەدين ۇلى, شالقارباي ءىزباساروۆ, تىلەگەن ءادىلوۆ جانە ءومىرجان كوپبوسىنوۆ بولدى.
سونىمەن قاتار ءبىر توپ اقىنعا اتاۋلى سىيلىقتار بەرىلدى. مىسالى, مۇحتار نيازوۆقا دوسكەي ءالىمباي اتىنداعى ارنايى جۇلدە بۇيىرسا, كوشەن ەلەۋ اتىنداعى سىيلىققا كەرەكۋدىڭ اقىنى اسپانبەك شۇعاتاەۆ يە بولدى. سونداي-اق الماتىدان كەلگەن قازان بەردىحان قاسىم امانجولوۆ اتىنداعى ارنايى سىيلىقتىڭ, اقتوبەنىڭ اقىنى مارات احمەتوۆ شاشۋباي قوشقارباي ۇلى اتىنداعى سىيلىقتىڭ جانە تۇركىستاندىق بەكارىس شويبەكوۆ مەرەيتوي يەسى ءجۇرسىن ەرمان اتىنداعى سىيلىقتىڭ يەگەرى اتاندى.
جەڭىمپاز جانە جۇلدەگەر اقىندارعا ارنالعان جۇلدە قورى دا قوماقتى بولدى. مىسالى, باس بايگەنى جەڭىپ العان تولەگەن جامانوۆقا 3 ميلليون تەڭگەنىڭ سەرتيفيكاتى تابىس ەتىلدى.
سونىمەن ۇلىتاۋدان تۇلەپ ۇشىپ, الاتاۋدىڭ قياسىنا قانات قاققان اقيىق اقىن, قايراتكەر تۇلعا ءجۇرسىن ەرماننىڭ مەرەيتويى تۋعان توپىراعىندا جوعارى دەڭگەيدە ۇيىمداستىرىلىپ, ەستە ۇزاق ساقتالاتىنداي دارەجەدە ءوتتى. جەتپىسكە جاسى كەلگەن اقىن ساحنانىڭ تورىندە تۇرىپ, ءوزىنىڭ مەرەيىن ءوسىرىپ, مارتەبەسىن ارتتىرعان جەرلەستەرىنە, بارشا قاۋىمعا باسىن ءيىپ, العىسىن ايتتى.
قاراعاندى
