«بارشاڭىزدى ح ازاماتتىق فورۋمنىڭ اشىلۋىمەن قۇتتىقتايمىن! بۇل – مەملەكەت پەن ۇكىمەتتىك ەمەس ۇيىمداردىڭ ۇيلەسىمدى دامۋىنا زور ۇلەس قوساتىن ماڭىزدى باسقوسۋ. ازاماتتىق قوعام قۇرۋ – ءبىز ءۇشىن نەگىزگى باسىمدىقتىڭ ءبىرى. ەلباسىنىڭ باستاماسىمەن 2003 جىلدان بەرى تۇراقتى وتكىزىلىپ كەلە جاتقان فورۋم – وسىنىڭ ايقىن دالەلى. ديالوگتىڭ وسى ۇلگىسى كوپتەگەن ماسەلەنى تالقىلاپ, ۇسىنىس ازىرلەيتىن ءتيىمدى پىكىرتالاس الاڭىنا اينالدى. فورۋم ازاماتتىق باستامالاردى قولداۋ ءۇشىن جۇيەلى شارالار قابىلداۋعا سەپتىگىن تيگىزۋدە. سونداي-اق, ستراتەگيالىق جانە زاڭنامالىق قۇجاتتار دايىنداۋعا ىقپال ەتۋدە», دەلىنگەن مەملەكەت باسشىسىنىڭ قۇتتىقتاۋىندا.
سونىمەن قاتار, قاسىم-جومارت توقاەۆ بىلتىر ازاماتتىق قوعامدى دامىتۋ تۇجىرىمداماسى بەكىتىلگەنىن, بۇل قۇجات بيلىك ورگاندارى مەن قوعامدىق ۇيىمداردىڭ سەرىكتەستىگىن كۇشەيتۋدى كوزدەيتىنىن اتاپ وتەدى. وعان قوسا اتالعان قۇجات تۇرعىنداردىڭ ەلدىك ىستەرگە ەركىن ارالاسۋىنا مۇمكىندىك بەرەدى.
«شىن مانىندە, «حالىق ۇنىنە قۇلاق اساتىن مەملەكەت» پەن ادىلەتتى قوعام قۇرۋ جولىندا ءوزارا ىنتىماقتاستىق ماڭىزدى ءرول اتقارادى. ەگەمەندىك جىلدارى قازاقستاندا ۇكىمەتتىك ەمەس سەكتوردىڭ قىزمەتى ايتارلىقتاي جانداندى. قازىر 2500 ۇيىم مەملەكەتتىك الەۋمەتتىك تاپسىرىس پەن گرانتتىق قولداۋعا يە بولىپ وتىر. ولار جىل سايىن ەكى مىڭنان استام الەۋمەتتىك جوبانى جۇزەگە اسىرادى. ۇكىمەتتىك ەمەس ۇيىمدار سان ءتۇرلى سالانى وركەندەتۋگە اتسالىسىپ كەلەدى. ىندەت كەزىندە قوعام وكىلدەرى, ۆولونتەرلەر مەن مەتسەناتتار وتانشىلدىق پەن ەلگە قامقورلىقتىڭ ناعىز ۇلگىسىن كورسەتتى. ءبىز وسىنداي يگىلىكتى ىستەردى جالعاستىرا بەرۋىمىز كەرەك. بۇگىنگى باسقوسۋ ازاماتتىق بەلسەندىلىكتى ودان ءارى ارتتىرىپ, سىندارلى قوعامدىق ديالوگتى نىعايتا تۇسەدى دەپ سەنەمىن. فورۋمنىڭ جۇمىسى تابىستى بولسىن!», دەلىنگەن قۇتتىقتاۋدا.
