قىزىلوردادا قۇرىلىسقا جاۋاپتى باسشىلار سوتتالدى

قىزىلوردا وبلىسىندا «بۋشارا» تۇرىك كومپانياسىنىڭ باسشىلارى سوتتالدى. بۇل تۋرالى «استانا» تەلەارناسى حابارلادى. اتالعان ايماقتاعى اسپالى كوپىردى سالۋدى مىندەتىنە العان «بۋشارا» تۇرىك كومپانياسى جالعان قۇجات دايىنداپ, مەملەكەتكە 18 ملن.تەڭگەدەن اسا شىعىن كەلتىرگەن. سول جالعان قۇجاتتا  بۇل نىساننىڭ مەرزىمىنەن بۇرىن سالىنعانى كورسەتىلگەن ەكەن. الايدا, تەكسەرۋ كەزىندە اسپالى كوپىر قۇرىلىسىنىڭ اياقتالماعانى, وعان ساپاسىز ماتەريال پايدالانعانى انىقتالدى. وسى كەلەڭسىزدىككە تىكەلەي كىنالى زيا مەتين مەن كەتەن ەردوعان سوت ۇكىمىمەن 5 جىلعا باس بوستاندىقتارىنان ايىرىلدى. سونداي-اق,  جالعان مالىمەتتەر ەنگىزىلگەن رەسمي قۇجاتتارعا قول قويعان تەحنيكالىق قاداعالاۋ مەكەمەسىنىڭ باس مامانى  اپپازوۆ تا شارتتى تۇردە 5 جىلعا سوتتالدى. وبلىستىق ەكونوميكالىق قىلمىسقا جانە سىبايلاس جەمقورلىققا قارسى كۇرەس دەپارتامەنتىنىڭ اعا تەرگەۋشىسى رۋسلان مۇسابەكوۆتىڭ ايتۋىنشا, وبلىستىق جولاۋشىلار كولىگى مەن اۆتوموبيل جولدارى باسقارماسىنىڭ بۇرىنعى باسشىسى جانە ونىڭ ورىنباسارى مەن باس مامانى دا جوعارىداعى قۇرىلىستىڭ ساپاسىنا كىنالى بولعان. بىراق, بۇلار راقىمشىلىق زاڭىنا سايكەس,  جازاعا تارتىلماعان ەكەن. ءامىرحان الماعانبەتوۆ. دەرەككوز: «استانا» تەلەارناسى. فوتو: «حابار» تەلەارناسى.