سپورت • 26 قاراشا، 2021

باقىتجاننىڭ باعى جاندى

104 رەت كورسەتىلدى

الماتى قالالىق ءدىن ىستەرى جو­نىن­دەگى باسقارماسىنىڭ مۇرىن­دىق بولۋىمەن ۇستەل تەننيسىنەن جا­ماعات اراسىندا ءدۇبىرلى دودا ءوتىپ، فينالدىق كەزەڭدە 24 سپورتشى باق سىنادى.

اقتىق سىنعا جولداما الۋ ءۇشىن اۋەلى الماتى قالاسىنىڭ ءار اۋدانىندا ىرىكتەۋ سايىستارى ۇيىمداستىرىلدى. وعان 300-گە تارتا ۇمىتكەر قاتىسىپ، سولاردىڭ اراسىنان ۇزدىك شىققاندارى فينالدا كۇش سىناسۋ قۇرمەتىنە يە بولدى. ولاردىڭ بارلىعى دا اۋەسقوي دەڭگەيدەگى ويىنشىلار. دەسەك تە، جارىس بارىسىندا كانىگى كاسىپقوي تەننيسشىلەردەي ءوز شەبەرلىكتەرىن كورسەتتى. ءاربىر كەزدەسۋ تارتىسقا تولى بولدى. ناتيجەسىندە، الاتاۋ اۋدانىندا ورنالاسقان «بەكەت اتا» مەشىتىنىڭ نامىسىن قورعاعان باقىتجان تۇرعىن مەن مەدەۋ اۋدانىنداعى «كوكتوبە» مەشىتىنىڭ اتىنان سىنعا تۇسكەن كەنجەبەك كامال سۋىرىلىپ شىعىپ، باس جۇلدەنى ءوزارا ساراپقا سالدى. ءاربىر سوققىسىندا تەننيس شارىن دىتتەگەن جەرىنە ءدوپ ءتۇسىرىپ، قورعانىستا دا كوپ قاتەلەسە قويماعان باقىتجان تۇرعىن جارىستىڭ بيىلعى جەڭىمپازى اتاندى. كەنجەبەك كامال ەكىنشى ورىندى يەلەنسە، اۋەزوۆ اۋدانى «تاۋگۇل-3» مەشىتىنىڭ اتىنان ونەر كورسەتكەن دياس المابەكوۆ ءۇشىنش ساتىعا تابان تىرەدى.

– تۋرنير جوعارى دەڭگەيدە ءوتتى. قاتىسۋشىلاردىڭ ءبارى دە جاقسى دايىندالىپ كەلگەن ەكەن. قارسىلاستارىمنىڭ بارلىعى دا مىقتى بولدى. اسىرەسە فينالدىق كەزدەسۋدە كوپ تەر توگۋىمە تۋرا كەلدى. باسەكەنىڭ سوڭىنا دەيىن جەڭىمپاز بولامىن-اۋ دەگەن وي بولعان جوق. بىراق بۇگىن ساتتىلىك ماعان كومەكتەستى، – دەيدى جارىس جەڭىمپازى.

الىپ شاھار – الماتى مەشىتتەرىنىڭ جاماعاتى وسىلايشا بيىلعى ماۋسىمدى ۇستەل تەننيسى جارىسىمەن تۇيىندەدى. ەستەرىڭىزگە سالا كەتسەك، جىل باسىنان بەرى مەرەكەلى داتالارعا وراي بىرنەشە رەت سپارتاكيادا ۇيىمداستىرىلىپ، قالامىزدىڭ مىڭداعان تۇرعىنى قاتىستى. ودان وزگە قازاق كۇرەسى، ۆولەيبول، فۋتبول سىندى بۇقارالىق سيپاتتاعى سپورت تۇرلەرىنەن دە تارتىستى باسەكەلەر ءوتتى.

سوڭعى جاڭالىقتار

ۇقساس جاڭالىقتار