قوقىس پوليگونىنىڭ كەشەنى وسكەمەنگە تاياۋ جەردەگى 4,2 گەكتار اۋماققا سالىنىپ جاتىر. ونىڭ قۇرىلىسىمەن رەسپۋبليكا بويىنشا قالدىقتاردى جيناۋ, تاسىمالداۋ, قايتا وڭدەۋ جانە كادەگە جاراتۋدى ۇيىمداستىرۋشى «وكم وپەراتور» كومپانياسى وكىلدەرى تانىستىرعان-تۇعىن. قازىرگى ۋاقىتتا عيماراتتىڭ ىرگەتاسى قۇيىلىپ, كوممۋنيكاتسيا جۇرگىزىلدى. العاشقى اپپاراتتار ورناتىلدى. گرەكيانىڭ SABO كومپانياسىنىڭ قۇرىلىسشىلارى مەتالل كونسترۋكتسيادان جاسالعان كورپۋستى مونتاجداۋ جۇمىستارىن جۇرگىزىپ جاتىر.
– جۇمىس كەستەگە سايكەس اتقارىلۋدا. ەندىگى كەزەكتە ەلەكتريكتەر, باعدارلاماشىلار كەلىپ جۇمىستى جالعاستىرادى. ولار قوقىس سۇرىپتاۋعا ارنالعان اپپاراتتاردى ىسكە قوسادى, – دەيدى جوبا مەنەدجەرى كوستاس سولاماديس.
مامانداردىڭ ايتۋىنشا, كەشەن ىسكە قوسىلعان سوڭ جىلىنا 100 مىڭ تونناعا دەيىن تۇرمىستىق قالدىقتار سۇرىپتالادى. زاۋىتقا كەلگەن قوقىستىڭ پاكەتى ارنايى ماشينادا اشىلادى. سودان كەيىن ءتورت ادامدىق كابينادا وڭدەۋگە جارامسىز ءىرى قالدىقتار قولمەن الىنىپ تاستالادى. ودان ءارى بارابان سەپاراتوردا ۇساق, ءىرى قالدىقتار ەلەكتەن وتەدى, بالليستيكالىق سەپاراتوردا قالدىقتار تويتارىلادى, ماگنيت سەپاراتوردا قارا مەتالدار ىرىكتەلەدى, قۇيىن توك سەپاراتورىندا اليۋميني مەتالداردى سۇرىپتايدى, وپتيكا سەپاراتورىندا قالدىقتار ساۋلە ارقىلى جەكە-جەكە (مىسالى, قاعاز, پلاستيك, تسەللوفان) بولىنەدى دە سوڭعى كەزەڭ – نىعىزداۋعا جىبەرىلەدى. بۇل بولىمدە سۇرىپتاۋدان وتكەن قالدىقتار جينالىپ, بۋنكەرگە ساقتاۋعا قويىلادى. قويما تولعاندا قالدىقتار نىعىزدالىپ, پاكەتتەلەدى دە وڭدەيتىن زاۋىتتارعا جونەلتىلەدى.
اۆتوماتتاندىرىلعان Sabo برەندىنىڭ جابدىقتارى گرەكيادان 1,35 ملرد تەڭگەگە ساتىپ الىنىپ, قالا اكىمدىگىنىڭ بالانسىنا بەرىلمەك. رەسمي مالىمەتتەرگە سۇيەنسەك, اۆتومات جابدىقتاردى باسقارۋعا وتىزعا جۋىق ادام جۇمىسقا الىنادى. ودان بولەك ءتورت-بەس ادام كۇزەتشى رەتىندە جۇمىسپەن قامتىلماق.
قازىردىڭ وزىندە وسكەمەندە تۇرعىن ءۇي اۋلالارىنا سارى, كوك جانە جاسىل ءتۇستى قوقىس كونتەينەرلەرى قويىلدى. ارقايسىسىنىڭ سىرتىندا قانداي قالدىقتاردى تاستاۋ كەرەگى تايعا تاڭبا باسقانداي ەتىپ جازىلعان. سارى كونتەينەر قاعاز, پلاستيك قالدىقتارعا, كوك كونتەينەر شىنى ىدىستارعا, ال جاسىل كونتەينەر تاماق قالدىقتارىنا ارنالعان. ەندىگى كەزەكتە حالىق ءتۇسىنىپ, ءتۇيسىنىپ قالدىقتاردى سۇرىپتاپ تاستاسا يگى.
– ەكولوگيالىق احۋال الەمدە ۋشىعىپ تۇرعاندىقتان, قورشاعان ورتانى تازا ۇستاپ, تابيعي ءونىم تۇتىنعانىمىز ءجون. ەگەر تۇرعىندار قالدىقتىڭ ءبارىن ءبىر كونتەينەرگە سالسا, جوبا جۇمىسىنا ايتۋلى كەدەرگى كەلتىرەدى. ايتا كەتسەك, ءار كونتەينەردەگى قوقىستى ءارتۇرلى جۇك كولىگى زاۋىتقا جەتكىزىپ تۇرادى, – دەدى «وكم وپەراتورى» كومپانياسىنىڭ ديرەكتورى مەدەت قۇمارعاليەۆ.
ونىڭ ايتۋىنشا, تۇرعىنداردىڭ ماكۋلاتۋرا, پلاستيك, شىنى جانە مەتالل قالدىقتارىن قوقىس وڭدەۋ زاۋىتىنا تاپسىرىپ, تابىس تابۋعا دا مۇمكىندىكتەرى بولماق. ەلىمىزدە قاعاز, شىنى قالدىقتاردى وڭدەيتىن زاۋىتتار بار. بىراق ولار شيكىزاتقا ءزارۋ كورىنەدى. سوندىقتان زاۋىت جۇمىسى قاي جاعىنان بولسىن, ءتيىمدى بولارى انىق. قالدىقتىڭ 30 پايىزى وڭدەلسە, قالعان تاعام قالدىقتارى وڭدەۋگە جارامايدى. ولار قولدانىستاعى پوليگونعا تاستالا بەرمەك. كەلەسى جىلدارى قوقىس ورتەيتىن زاۋىت سالىنۋى مۇمكىن. دەمەك ەكى-ءۇش جىلدىڭ ىشىندە وسكەمەندىكتەر ءۇشىن قوقىس پوليگونىنىڭ قاجەتى بولمايدى. راس, قالادا قوقىس پوليگونىنىڭ ماسەلەسى كوپ جىلدان بەرى شەشىمىن تاپپاي كەلگەن. ەندىگى كەزەكتە تابيعاتتى تازا ۇستاۋ ماقساتىندا جۇزەگە اسىرىلىپ جاتقان جوباعا حالىق بولىپ اتسالىسۋ كەرەك.
وسكەمەن
