قايراتتى ەرگە مال تۇرار…

وڭتۇستىكتە مال شارۋاشىلىعىن دامىتۋدىڭ ءۇش جىلدىق, ياعني 2014-2016 جىلدارعا ارنالعان جوسپارى ازىرلەندى. مۇنداعى ماقسات  ءار باستان الىناتىن ءونىمنىڭ ونىمدىلىگىن كوتەرىپ, ساپاسىن جاقسارتۋ ارقىلى ءونىمنىڭ باسەكەگە قابىلەتتىلىگىن ارتتىرۋ بولىپ تابىلادى. ءىس-شارانى جۇزەگە اسىرۋعا بيۋدجەت, قارجى ينستيتۋتتارى تاراپىنان 21,2 ملرد. تەڭگە جۇمسالاتىن بولادى. جالپى, وڭتۇستىك قازاقستان وبلىسى رەسپۋبليكا بويىنشا تىرىدەي سالماقتا ەت وندىرۋدە ءۇشىنشى, ءسۇت وندىرۋدە ەكىنشى, جۇمىرتقا وندىرۋدە التىنشى ورىندا تۇر. بۇل سالادا ونىمدىلىكتى ارتتىرۋدىڭ باستى جولى ساپالى مال ازىعىمەن قامتاماسىز ەتۋ. بۇل تۇرعىدا ەگىستىك القاپتارىن ءارتاراپتاندىرۋ بارىسىندا مال ازىعى داقىلدارىنىڭ ەگىس كولەمىن ۇلعايتۋعا باسىمدىق بەرىلىپ, 2016 جىلعا دەيىن ول 100,0 مىڭ گەكتارعا ارتىق ەگىلەتىن بولادى. وسى كولەمدى يگەرۋگە جاڭادان 542 تەحنيكا الۋعا 2,4 ملرد. تەڭگە جوسپارلانۋدا. سونداي-اق, ءسۇتتى باعىتتاعى ءىرى قارا مال سالاسىن دامىتۋ 3 باعىتتا جۇرگىزىلەتىن بولادى. 2016 جىلدىڭ سوڭىنا دەيىن وبلىستا جالپى 13  تاۋارلى ءسۇت  فەر­مالارىن اشۋ جوسپارلانۋدا. قازىردىڭ وزىندە 5  تاۋارلى ءسۇت فەرمالارىنىڭ ناقتى يەلەرى انىقتالىپ, 2 650 باس ءىرى قارا مال ساتىپ الۋ جوسپارلانۋدا. قازىردىڭ وزىندە شەتەلدەن ساتىپ الىنعان 890 باس اسىل تۇقىمدى مالدىڭ سانى 1600-دان استى. وسىعان بايلانىستى قوسىمشا مال بورداقىلاۋ الاڭدارىن اشۋ قاجەتتىلىگى تۋىنداپ, ءىس-شارا اياسىندا 10-15 باسقا ارنالعان 1151 بىرلىك مال بورداقىلاۋ الاڭدارىن اشۋ جوسپارلاندى. جاڭادان اشىلاتىن سەلولىق تۇتىنۋ كووپەراتسياسىنا 33 477 مىڭ تەڭگە قاراستىرىلىپ وتىر. «اگرارلىق نەسيە كورپوراتسياسى» اق «اۋىل تۇرعىندارىنىڭ اۋىلشارۋاشىلىق ونىمدەرىن بىرلەسىپ دايىنداۋ, قايتا وڭدەۋ, ساقتاۋ, تاسىمالداۋ جانە ساتۋ» باعدارلاماسى ارقىلى جىلدىق 6 پايىزدىق ۇستەمەسىمەن 1,0 ملن. تەڭگەدەن باستاپ, 10 جىلعا نەسيە الىپ, جۇمىس جاسايدى. ءىرى قارا مال ەتىنىڭ الەۋەتىن ارتتىرۋدا, وبلىستا جۇزەگە اسىرىلىپ جاتقان «سىباعا» باعدارلاماسى اياسىندا الىنعان اسىل تۇقىمدى بۇقالاردى بورداقىلاۋ ارقىلى وندىرىلگەن ەتتى الىس, جاقىن شەتەلدەرگە شىعارۋ ماقساتىندا 2016 جىلى وبلىس كولەمىندە ءىرى بازالىق تۇتىنۋ كووپەراتسياسى قۇرىلۋى ءتيىس. وبلىستا 3,6 ملن. باس قوي بار. الداعى ۋاقىتتا بيازى ءجۇندى ەتتى مەرينوس جانە قۇيرىقتى قىلشىق ءجۇندى قويىنىڭ ورداباسى تۇقىمىن كوبەيتۋ ماسەلەسى دە نازاردا تۇر. ويتكەنى, قويدىڭ ورداباسى تۇ­قىمىنىڭ ەتى مول ءارى مايسىز, قا­زىرگى نارىققا ناعىز قاجەتتى ءونىم بەرەدى. وبلىس اكىمى اسقار  مىر­زاحمەتوۆ بۇل جوبا وسى سالانى ءورىس­تەتۋگە باعىتتالعان ماڭىزدى قادام ەكەندىگىن اتاپ ءوتىپ, اۋدان, قالا اكىمدەرىنە, اۋىلدىق وكرۋگتىڭ اكىمدەرىنە وسى جوبانى حالىققا جەتكىزىپ, تيىمدىلىگى جونىندە كەڭىنەن ءتۇسىندىرۋدى جۇكتەدى.  «قايراتتى ەرگە مال تۇرار, ونەرلى ەرگە باق تۇرار» دەگەن, وڭتۇستىكتىڭ شارۋاعا بەيىم, قايراتتى جىگىتتەرىنىڭ شيراق قيمىلداپ, ۇلكەن ءبىر تىرلىكتى باستاۋعا وسى جوبا زور مۇمكىندىك بەرەتىنى ءسوزسىز. ورالحان ءداۋىت, «ەگەمەن قازاقستان». وڭتۇستىك قازاقستان وبلىسى.