ەلدىگى – بىرلىگىندە, ەرلىگى – شەجىرەسىندە

«نۇر وتان» پارتياسىنىڭ باستى ۇستانىمى وسى

«نۇر وتان» پارتياسىنىڭ ساياسي دوكتريناسىن وقىعان تۇستا, ءسوز جوق, قازاقستاننىڭ ءححى عاسىرداعى مۇراتتارى, مەملەكەت پەن ونىڭ ازاماتتارى اراسىنداعى ورتاق ماقساتتارعا نەگىزدەلگەن ۇنامدى دا وڭدى ارەكەت-قيمىلدار, ەل دامۋىنا قاتىستى باسىم باعىتتار مەن جاڭا قاعيداتتار كەڭ ورىن العانىن كورەسىڭ. جاڭا باعىتتار مەن ورتاق قۇندىلىقتارعا, بىرلىك پەن قوعامدىق كەلىسىمگە, الەۋمەتتىك سايا­سات پەن زياتكەر ۇلت مۇراتتارىنا, رۋحانيات پەن مادەنيەت ارنالارىنا, ەلدىك پەن ەرلىك شەجىرەلەرىنە كوپ كوڭىل بولگەنىنە كوز جەتكىزەسىڭ. ۇلت پەن تاريح الدىنداعى جاۋاپكەرشىلىككە, ادام مەن ونىڭ بوستاندىعىنا, قۇقىقتىق ەرەكشەلىكتەرىنە, اشىق قوعام مەن باسەكەگە قابىلەتتىلىككە, الەمدىك دامۋ ۇدەرىستەرىنە ايرىقشا نازار اۋدارىلعانىن اڭعاراسىڭ. ەلىمىزدىڭ ەلۋلىككە ەنۋى – ەلباسى ساياساتىنىڭ, ستراتەگيالىق ماقساتىنىڭ بەرىك تە ايقىندىعىنىڭ جارقىن كورىنىستەرىنىڭ ءبىرى. ەلباسىنىڭ قازاقستان حالقىنا جولداۋى مەن «قازاقستاننىڭ الەۋمەتتىك جاڭعىرتىلۋى: جالپىعا ورتاق ەڭبەك قوعامىنا قاراي 20 قادام» اتتى كەڭ كولەمدى, تەرەڭ مازمۇندى ەڭبەگىندە «قازاقستان-2050» ستراتەگياسىندا قالىپتاسقان مەملەكەتتىڭ جاڭا ساياسي باعىتى, ەل دامۋىنىڭ بولاشاعى, ماقسات-مۇراتتارى جان-جاقتى ايقىندالدى. ۇلت پەن ۇرپاق قامى, مادەني-رۋحاني اسپەكتىلەر, ءبىلىمي-عىلىمي ارنالار, ءتالىم-تاربيە تاعىلىمدارى دا نەگىزگى نازاردا بولدى. وسى رەتتە «نۇر وتان» پارتياسى جاڭا ساياسي دوكتريناسىنىڭ باستى باعىتتارىنان قازاقستاننىڭ ەكونوميكاسى مەن ساياسي-الەۋمەتتىك جۇيەسى كەڭ كولەمدە ورىن العان. ەل دامۋىنىڭ وركەندى ورىستەرى, باسەكەلەستىككە قابىلەتتىلىك, الەۋمەتتىك باعدارلى مەملەكەت قۇرۋ ماسەلەلەرى جان-جاقتى قوزعالعان. باستىسى, «نۇر وتان» پارتياسىنىڭ بۇكىل حالىقتىق ميسسياسىندا ۇلتتىق مۇرات-مۇددە باسىم باعىتتارعا يە بولىپ, ازاماتتىق قوعام مەن زياتكەرلىك ۇلتتىڭ بەلگى-ەرەكشەلىكتەرى ايقىندالىپ وتىر. ادام ءومىرى مەن ەڭبەگىنە, قۇقىقتارى مەن بوستاندىقتارىنا كەڭ ءورىس اشىلىپ, ۇلت مۇراتى, ەل تاريحى مەن دامۋىنىڭ ەۆوليۋتسيالىق جولى, بولاشاق باعىت-باعدارلارى كەڭىنەن كورىنىس تاپقان. «نۇر وتان» پارتياسىنىڭ جاڭا ساياسي دوكتريناسى بىرنەشە باسىم باعىتتاردان تۇرادى («نۇر وتان» پارتياسىنىڭ ءححى عاسىرداعى ميسسيا­سى»; «ءبىزدىڭ قۇندىلىقتارىمىز»; «ازامات جانە مەملەكەت: ءوزارا ءىس-قيمىلدىڭ جاڭا قاعيداتتارى»; «جاڭا باعىتتىڭ ماقساتتارى: تابىستى دامۋدىڭ جەتى فاكتورى»; «پارتيانىڭ تاريحي جاۋاپكەرشىلىگى»). وندا, اسىرەسە, قازاقستاندى وركەندەتۋ, تاۋەلسىزدىكتى نىعايتۋ, وتانعا سۇيىسپەنشىلىك, ۇلت تۇتاستىعى مەن قوعامدىق كەلىسىم, ازاماتتاردىڭ زياتكەرلىك جانە جاسامپازدىق الەۋەتى, وتباسى جانە ءداستۇر قۇندىلىقتارى كەڭىنەن ءسوز ەتىلەدى. ادام مەن ونىڭ ءومىرى, قۇقىقتارى مەن بوستاندىقتارىنا زور ماڭىز بەرىلەدى. ازاماتتىق قوعام, دەموكراتيالىق داستۇرلەر مەن مادەنيەتتىڭ دامۋى جان-جاقتى ورىن الادى. الەۋمەتتىك ساياسات, ەكونوميكالىق دامۋ, يننوۆاتسيالىق باعىتتارعا كەڭ ءورىس اشىلادى. بارلىق قازاقستاندىقتاردىڭ ساپالى ءبىلىم الۋى, مەديتسينالىق قىزمەت پەن قولجەتىمدى تۇرعىن ءۇي ماسەلەلەرى دە باستى نازاردا بولادى. ۇلتتىق مۇرات-مۇددەگە ادالدىق, قورعانىس قابىلەتىن نىعايتۋ, قاۋىپسىزدىكتى قامتاماسىز ەتۋ ماسەلەلەرى دە كەڭىنەن قوزعالادى. ەلدىڭ قوعامدىق ءھام ساياسي باعىتى, الەۋمەتتىك ارنالاردىڭ وركەندەۋى مەن تۇراقتىلىعى باستى نازاردا بولادى. جاھاندانۋ جانە باسەكەگە قابىلەتتىلىك باعىتتارى دا نازاردا تۇرادى. قوعامدىق كەلىسىم مەن ۇلتارالىق تاتۋلىققا, دوستىق قارىم-قاتىناسقا كوپ كوڭىل بولىنەدى. ەلباسى باستامالارى مەن ۇستانىمدارى, تاۋەلسىزدىك تابيعاتى مەن تاعىلىمى, ەلدىك مۇددە مەن ءداستۇر قۇندىلىقتارى جان-جاقتى قوزعالادى. باستىسى, ۇلت مۇراتى مەن قۇندىلىقتارى, اتاپ ايتقاندا, ادام مەن ونىڭ ەڭبەگى, ءومىرى مەن ونەگەسى كەڭ ورىن الادى. ول تۋرالى: «ءبىزدىڭ ميسسيامىز – دامۋدىڭ ەۆوليۋتسيالىق جولىن قامتاماسىز ەتۋ, سونداي-اق, وركەندەگەن, باسەكەگە قابىلەتتى ءارى الەۋمەتتىك باعدارلى مەملەكەتتى قۇرۋ. مۇندا ءاربىر ماقساتكەر, ەڭبەكقور جانە زاڭ ءتارتىبىن ساقتايتىن ازامات تابىسقا جەتىپ, وزىنە دە, قوعامعا دا پايدا كەلتىرەدى», دەپ اتاپ كورسەتەدى. دوكترينادا ۇلت مۇراتى مەن تاۋەل­سىزدىك ماسەلەسىنە كەڭ ورىن بەرىلەدى.ۇلتقا ادالدىق, وتانعا سۇيىسپەنشىلىك, ەڭبەككە قىزىعۋشىلىق پەن تۇراقتىلىق سىندى قاستەرلى ۇعىمداردىڭ سىر-سيپاتتارى اشىلىپ, ماڭىز-ءمانى ايقىندالادى. ۇلتقا قىزمەت پەن تاۋەلسىزدىكتىڭ باياندىلىعى جولىندا تاباندى دا تۇراقتى ەڭبەك ەتۋ – ابىرويلى دا كادەلى, ساۋاپتى ىستەردىڭ ءبىرى ەكەندىگى باسا كورسەتىلەدى. ۇلتتى قورعاۋ مەن قالىپتاستىرۋ, تاۋەلسىزدىك جولىنداعى اتا-بابالارىمىزدىڭ نايزانىڭ ۇشىمەن, بىلەكتىڭ كۇشىمەن كۇن-ءتۇن قاتىپ, جانكەشتى ارەكەتتەرگە بارۋى – ەلدىك پەن ەرلىكتىڭ ۇزدىك ۇلگىسى, عاجايىپ ونەگەسى ەكەندىگى نەگىزگى نازاردا تۇرادى. وعان تومەندەگىشە ءتۇيىن جاسالادى: «تاۋەلسىزدىك – ەلىمىزدىڭ باستى قۇندىلىعى. ءبىز بۇگىنگى جەتىستىكتەرىمىزدىڭ قاي-قايسىسىنا دا تاۋەلسىزدىكتىڭ ارقاسىندا قول جەتكىزدىك. سوندىقتان, تاۋەلسىزدىك – ءبىز ءۇشىن باعا جەتپەس بايلىق! مەملەكەت پەن قوعامنىڭ بار كۇش-جىگەرى تاۋەلسىزدىكتى نىعايتۋعا ارنالۋى ءتيىس. وسى ماقسات ءۇشىن قىزمەت ەتۋ جانە مەملەكەتتى قورعاۋ – تاريحتىڭ, سونداي-اق, كەلەشەك ۇرپاق الدىنداعى ارقايسىمىزدىڭ ازاماتتىق پارىزىمىز. مۇنى جاس ۇرپاق ارقاشان جادىندا تۇتقانى ابزال». ەلوردا مەن ەلباسى, ۇلتتىق رامىزدەر مەن مەملەكەتتىڭ مىندەتتى اتريبۋتتارى دا تيىسىنشە ورىن الىپ, وعان دەگەن جاس ۇرپاقتىڭ قۇرمەتى مەن تاعزىمى ايرىقشا بولۋ قاجەتتىلىگى ءجىتى كورسەتىلەدى. ەلدىك مۇددە مەن ۇلتتىق قاۋىپسىزدىكتى قورعاۋ ميسسياسى وسى تۇرعىدان ۇنامدى كورىنىس تابادى. قازاق رۋحانياتى مەن مادەنيەتى ماسەلەسى ۇلتتىق قۇندىلىقتاردىڭ باسىم باعىتتارىن ايقىندايدى. ۇلت تاريحىنىڭ اۋەلگى باستاۋلارى مەن دامۋ كەزەڭدەرىنىڭ ءبارى-بارىندە رۋحانيات ءورىسى, مادەنيەت ورنەكتەرى كوپتەپ كەزدەسەدى. رۋحانيات قۇندىلىقتارى قالىپتاسىپ, تاريح پەن مادەنيەت, ءداستۇر مەن ساباقتاستىق, ءدىن مەن ءدىل, ءبىلىم مەن عىلىم, تانىم مەن ءتىل, ت.ت. جۇيەلى دامۋى – مەملەكەتتىلىكتى نىعايتۋ, تاۋەلسىزدىكتى باياندى ەتۋ, باسەكەگە قابىلەتتىلىكتى ارتتىرۋ ىسىندەگى ايرىقشا فاكتورلاردىڭ ءبىرى بولعاندىقتان, ونىڭ ماڭىز-ءمانى بارىنشا ايقىن كورسەتىلىپ, بەدەرلەنىپ بەرىلەدى. تۇتاستاي العاندا, «نۇر وتان»  پار­­تياسى قازاقستاننىڭ دامۋى مەن ءور­كەندەۋ باعىتتارىن باياندى ەتۋگە, حا­لىقتى بىرلىك-بەرەكەگە شاقىرىپ, ورتاق ماقسات جولىندا ەڭبەك ەتۋگە ۇيىتقى بولىپ كەلە جاتقان بىردەن-ءبىر ساياسي كۇش رەتىندە قوعامدا ايرىقشا ورىن الادى. راقىمجان تۇرىسبەك, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى, فيلولوگيا عىلىمدارىنىڭ دوكتورى.