كۋپەر قانداي قاتەلىك جىبەردى؟
J توبىنىڭ سوڭعى تۋر ويىنى الدىندا بەنين قۇراماسى 10 ۇپايمەن تۋرنير كەستەسىندە ءبىرىنشى ورىندا, كونگو 8 ۇپايمەن ەكىنشى ساتىدا تۇر ەدى. ماتچتى ءوز الاڭىندا وتكىزەتىن كونگو ەگەر بۇل ويىندا جەڭىسكە جەتسە, ءبىرىنشى ورىنمەن كەلەسى ىرىكتەۋ كەزەڭىنە شىعادى, ال تەڭ ناتيجە تىركەلسە قوناق قۇراما جارىستى جالعاستىرادى. بىراق بۇل كەزدەسۋدە 2:0 ەسەبىمەن كونگو باسىم ءتۇسىپ, ءوز توبىندا ءبىرىنشى ورىنمەن كەلەسى كەزەڭگە شىقتى.
كەزدەسۋدىڭ 90-مينۋتىندا «ۆالەنسيانى» ەكى مارتە چەمپيوندار ليگاسىنىڭ فينالىنا شىعارعان تاجىريبەلى باپكەر ەكتور كۋپەر ۋاقىتتان ۇتۋ ماقساتىندا قاجەتتىلىك جوق كەزدە الاڭعا ءتورتىنشى مۇمكىندىكتە ءتورتىنشى فۋتبولشىنى شىعاردى. ال فيفا رەگلامەنتى بويىنشا ويىندا ءۇش مۇمكىندىكتى پايدالانا وتىرىپ, بەس ويىنشىنى اۋىستىرۋعا رۇقسات بەرىلگەن. قالايدا قاتارعا باراتىنداردىڭ قاتارىنان تابىلۋدى كوزدەگەن بەنين قۇراماسى ويىننان كەيىن قارسىلاستارىنىڭ ماتچ ەرەجەسىن ورەسكەل بۇزعانىن بايقاپ, فيفا-عا شاعىم ءتۇسىردى.
ەندى بۇل جايت افريكا شەڭبەرىنەن اسىپ ءتۇسىپ, بۇكىل الەمگە تارادى. ال فيفا ءوز كەزەگىندە بەنين فۋتبول قاۋىمداستىعىنان ويىن رەگلامەنتىن بۇزعان كونگو قۇراماسى ۇستىنەن تۇسىرىلگەن شاعىم حات العانىن جانە ونىڭ الداعى ۋاقىتتا قاراستىرىلاتىنىن مالىمدەدى.
كونگونى قانداي جازا كۇتىپ تۇر؟
فيفا 3 مۇمكىندىكتە 5 ويىنشى اۋىستىرۋعا رۇقسات بەرگەن ۋاقىتتان بەرى ەۋروپانىڭ توپ-5 چەمپيوناتىنداعى ەكى كوماندا كونگو قۇراماسى سياقتى ەرەجە بۇزعانى ءۇشىن جازالانعان. ماسەلەن, ماۋسىم باسىندا گەرمانيا كۋبوگى اياسىندا «ۆولفسبۋرگ» قارسىلاسىنان باسىم تۇسسە دە, تۋرنيردەن شەتتەتىلگەن ەدى. سەبەبى باس باپكەر ۆان بوممەل كۋبوك ويىنىنىڭ قوسىمشا تايمىندا قاتەلەسىپ, ءتورتىنشى مۇمكىندىكتە ءتورتىنشى ويىنشىنى الاڭعا شىعارعان. ال قاڭتار ايىندا يتاليا كۋبوگى اياسىندا «روما» دا ءدال وسىنداي قاتەلىكتى قايتالاعان. ريم كلۋبى دا قوسىمشا تايمدا 6-شى فۋتبولشىنى الماستىرىپ, سوڭىندا تەحنيكالىق جەڭىلىسكە ۇشىراعانى بارشاعا بەلگىلى.
دەمەك ەگەر فيفا ويىنشىلاردى اۋىستىرۋ ەرەجەسىنە ساي شەشىم قابىلدايتىن بولسا, وندا كونگو دەموكراتيالىق رەسپۋبليكاسىن دا تەحنيكالىق جەڭىلىس كۇتىپ تۇر دەپ ايتا بەرۋگە بولاتىن شىعار. ال ونىڭ ورنىنا كەلەسى كەزەڭگە بەنين قۇراماسى وتەدى.
ءامارتيدىڭ سيمۋلياتسياسى
G توبىنىڭ سوڭعى تۋرىندا وار مەن گانا قۇرامالارى ءبىرىنشى ورىن ءۇشىن ويناپ, ماتچ تاعدىرىن 11 مەترلىك ايىپ دوبىن ءساتتى ورىنداعان اندرە ءايۋدىڭ گولى شەشىپ كەتتى. بىراق وار جانكۇيەرلەرى سەنەگالدىق تورەشى الاڭ يەلەرىنە جاقتاسىپ, ادىلەتسىز پەنالتي بەلگىلەدى دەپ ەسەپتەيدى. سەبەبى وار ايىپ الاڭىندا بولعان كەزەكتى ءبىر قاربالاس ساتتە گانالىق فۋتبولشى دەنيەلا امارتي بار اكتەرلىك قابىلەتىن ىسكە قوسىپ, تورەشى سەنەتىندەي ەتىپ سيمۋلياتسيا جاسايدى. مۇنى سەنەگالدىق تورەشى ماگەتت ن’ديايە شىن قابىلداپ, وار قاقپاسىنا ەش ويلانباستان پەنالتي بەلگىلەيدى. ءيا, وسىنداي كۇماندى ساتتە تورەشى ۆار-عا نەگە جۇگىنبەگەن دەۋىڭىز مۇمكىن. افريكا قۇرلىعىنداعى ىرىكتەۋ ويىندارىندا ۆار جۇيەسى قولدانىلمايدى. فيفا مۇنداي كەزەڭدە جاڭا تەحنولوگيانى ەنگىزۋ, ەنگىزبەۋ تۋرالى شەشىمدى ءار قۇرلىقتىڭ كونفەدەراتسيالارىنا قالدىرادى. سەبەبى ۆار جۇيەسىن ورناتۋعا قىرۋار قارجى كەتەدى. ال ونداي قارجى كوپ ەلدىڭ فەدەراتسياسىنا اۋىر تيەدى.
ويىنداعى جالعىز گول گاناعا ءۇش ۇپاي سىيلاپ قانا قويماي, سوعىلعان گول ايىرماشىلىعى بويىنشا دا باسىمدىق بەردى. ال وار تۋرنير كەستەسىندە گانادان تەك دوپ ايىرماسى بويىنشا عانا ارتتا قالىپ تۇر. سوندىقتان دا گانالىقتار بۇل جانجالدان وڭاي قۇتىلىپ كەتە المايتىن سياقتى. افريكالىق فۋتبول جانكۇيەرلەرى وقيعانىڭ ءمان-جايى جازىلعان پەتيتسيا ۇيىمداستىرىپ (ازىرگە وعان 6 مىڭنان استام ادام قول قويعان), فيفا-دان ويىندى قايتا وتكىزۋدى تالاپ ەتىپ جاتىر.
ء«بىز فيفا-نىڭ ەتيكا كوميتەتىنەن سەنەگالدىق تورەشىنىڭ قاتەلىگىنەن تۋىنداعان ويىننىڭ ناتيجەسىن جويىپ, ەكى قۇراما اراسىنداعى ويىندى بەيتاراپ الاڭدا قايتا وتكىزۋدى تالاپ ەتەمىز. ال بۇل ويىنعا اراب ەلدەرىنىڭ بىرىنەن تورەشى تاعايىنداۋدى سۇرايمىز. ەگەر ماتچتى قايتا ويناتۋدىڭ مۇمكىندىگى بولماسا, وندا قاتاردا وتەتىن الەم چەمپيوناتى ءبىزدىڭ جادىمىزدا سىبايلاس جەمقورلىق پەن كەلىسىلگەن ويىندارعا تولى بولعان الەم چەمپيوناتى رەتىندە ساقتالىپ قالادى», دەلىنگەن جانكۇيەرلەردىڭ حاتىندا.
بۇل – فۋتبول تاريحىنداعى ءبىرىنشى پەتيتسيا ەمەس جانە جانكۇيەرلەر تاراپىنان بۇعان دەيىن جازىلعان شاعىمدار ەشقاشان فيفا تاراپىنان قاناعاتتاندىرىلماعان.
