ء«بىز ۇلتتىق قوردان كەپىلدەندىرىلگەن ترانسفەرت تۋرالى جانە 2022-2024 جىلدارعا ارنالعان رەسپۋبليكالىق بيۋدجەت تۋرالى زاڭ جوبالارىن قارادىق. جالپى الداعى ءۇش جىلعا ارنالعان بيۋدجەت ەلىمىزدىڭ دامۋىنداعى باسىمدىقتاردى قامتاماسىز ەتۋگە باعىتتالعان. سوڭعى جىلدارى قازاقستاندا پاندەميا سالدارىن ەڭسەرۋگە باسىمدىق بەرىلگەنى بەلگىلى», دەدى ماۋلەن اشىمباەۆ سەناتتىڭ جالپى وتىرىسىندا.
ونىڭ ايتۋىنشا, مەملەكەت باسشىسىنىڭ تاپسىرماسىمەن ازاماتتار مەن زارداپ شەككەن كاسىپورىندارعا قولداۋ كورسەتۋگە قوماقتى قاراجات جۇمسالۋدا.
«جاعداي ءالى دە ءماز ەمەس. بىراق, قازاقستان پاندەميا داعدارىسىن ەڭسەرىپ كەلەدى دەپ ايتۋعا بولادى. سوندىقتان الداعى ءۇش جىلدىڭ بيۋدجەتى قايتا قالىپقا كەلۋگە جانە دامۋعا باعىتتالىپ وتىر. پرەزيدەنتتىڭ بيىلعى جولداۋىندا پاندەميادان كەيىنگى كەزەڭدە ەكونوميكانى قالپىنا كەلتىرۋدىڭ ناقتى مىندەتتەرى بەلگىلەندى. ونەركاسىپتىڭ تيىمدىلىگىن ارتتىرۋعا, وڭىرلەردى دامىتۋعا, حالىقتى الاڭداتقان وزەكتى الەۋمەتتىك ماسەلەلەردى شەشۋگە قاتىستى ماقسات-مىندەتتەر ايقىندالدى. مەملەكەت باسشىسىنىڭ تاپسىرماسىنا سايكەس, جاڭا مەملەكەتتىك جوسپارلاۋ جۇيەسى اياسىندا 10 ۇلتتىق جوبا ازىرلەنىپ, بەكىتىلدى. ولار ەكونوميكانىڭ وسۋىنە جانە ازاماتتارىمىزدىڭ ءومىر ءسۇرۋ ساپاسىن جاقسارتۋعا باعىتتالعان», دەدى سەنات سپيكەرى.
جوعارى پالاتا توراعاسى بۇگىن قارالعان ءۇش جىلدىق بيۋدجەتتە سول جوبالاردى ىسكە اسىرۋ ءۇشىن ءتيىستى قاراجات ءبولىنىپ وتىرعانىن اتاپ ءوتتى. ول ءار تەڭگەنى ورىندى پايدالانىپ, مەملەكەت قارجىسىنىڭ تيىمدىلىگىن ارتتىرۋ اسا ماڭىزدى ەكەندىگىن باسا ايتتى.
«جالپى, الداعى ۇشجىلدىق بيۋدجەتتى ۇكىمەت ءۇشىن ۇلكەن سىناق دەۋگە بولادى. سەبەبى, ۇكىمەت ەكونوميكانى دامىتۋ قارقىنىن ارتتىرۋ جانە كولەڭكەلى سەكتوردى ازايتۋ ارقىلى بيۋدجەتتىڭ كىرىسىن 35%-عا ءوسىرۋدى كوزدەپ وتىر. سونىمەن بىرگە بيۋدجەت تاپشىلىعىن كەزەڭ-كەزەڭىمەن تومەندەتۋ جانە ۇلتتىق قوردان بولىنەتىن ترانسفەرتتەر كولەمىن قىسقارتۋ جوسپارلانعان. بۇل ماسەلەنى سەنات دەپۋتاتتارى بۇعان دەيىن دە كوتەرگەن بولاتىن. بۇگىن ۇكىمەتتىڭ وسى باعىتتاعى بەلسەندىلىگىن بايقاپ وتىرمىز. وسىنداي باستامالاردى ءبىز, ارينە, قولدايمىز. سوعان قاراماستان مەملەكەتتىڭ بارلىق الەۋمەتتىك مىندەتتەمەلەرى تولىعىمەن ورىندالا بەرەدى», دەدى ماۋلەن اشىمباەۆ.
