تۇركىستانعا جولى تۇسكەن جاندار قوجا احمەت ياساۋي بابامىزدىڭ باسىنا بارىپ, رۋحىنا ءتاۋ ەتىپ كەتكەندى ءجون كورەدى. ەر تۇرىكتىڭ بەسىگى تۇركىستانعا وتكەن جىلى 701 مىڭنان استام تۋريست كەلىپتى. ياعني, ارعى جىلمەن سالىستىرعاندا كيەلى قالاعا قىدىرىپ كەلۋشىلەردىڭ سانى 15 پايىزعا ارتقان دەگەن ءسوز. بۇل, ارينە, تۇركىستاندا ءتۋريزمنىڭ ءتۇتىنى ءتۇزۋ ۇشىپ, قالا كوركەيىپ, قىزمەت كورسەتۋ دەڭگەيى جىل ساناپ دامىپ كەلە جاتقانىن بىلدىرسە كەرەك.
قالانىڭ كوركەيىپ, تۇرلەنىپ كەلە جاتقانىن مۇنداعى قۇرىلىستىڭ قارقىنىنا قاراپ تا ءبىلۋگە بولادى. ءتۋريزمدى دامىتۋ ماقساتىندا مۇندا قولونەر ورتالىعىنىڭ قۇرىلىسى جۇرگىزىلىپ, ءىسكە قوسىلعان. بۇدان بولەك, 200 ورىنعا ارنالعان تۋريستەرگە قىزمەت كورسەتۋ ورتالىعى سالىنۋدا. ءوتكەن جىلى بۇل وڭىردە 3 مەكتەپ عيماراتى سالىنىپ, 28 مەكەمەگە كۇردەلى جانە اعىمداعى ءجوندەۋ جۇرگىزىلىپتى. «بالاپان» باعدارلاماسىنىڭ اياسىندا 5 بالاباقشا پايدالانۋعا بەرىلىپ, قالا بويىنشا 3-6 جاستاعى بالانىڭ 65,1 پايىزى مەكتەپكە دەيىنگى مەكەمەلەرمەن قامتىلعان. اسىرەسە, اۋىسىمىنا 500 ادام قابىلدايتىن قالالىق ەمحانا ىسكە قوسىلعانى تۇركىستاندىقتاردى ەرەكشە قۋانتتى. بۇدان بولەك 200 توسەكتىك كوپ بەيىندى بالالار اۋرۋحاناسىنىڭ قۇرىلىسى جۇرگىزىلىپ, 3 ەلدى مەكەندە فەلدشەرلىك-اكۋشەرلىك بەكەت پايدالانۋعا بەرىلگەن. جەرگىلىكتى بيۋدجەت ەسەبىنەن ورتالىق كىتاپحانا عيماراتى سالىندى. «وڭىرلەردى دامىتۋ» باعدارلاماسى بويىنشا 10 اۋىلدىق كلۋب اعىمداعى جوندەۋدەن وتكەن. ەندى بۇگىندە وبلىس بيۋدجەتىنەن 260 ملن. تەڭگە ءبولىنىپ «جابىق ءجۇزۋ باسسەينىنىڭ» قۇرىلىسى جۇرگىزىلۋدە جانە جەكە ينۆەستورلار ەسەبىنەن جالپى قۇنى 222 ملن. تەڭگەنى قۇرايتىن سپورتتىق ساۋىقتىرۋ كەشەنى سالىنۋدا. سونداي-اق, 80 پاتەرلى جانە 60 پاتەرلى 5 قاباتتى تۇرعىن ءۇي قۇرىلىسىنىڭ بوي كوتەرىپ كەلە جاتقانى اللا بۇيىرتسا, الداعى ۋاقىتتا بۇل قالادا ءبىر قاۋىم ەل قونىس توي تويلايتىنىن ايعاقتاپ تۇرعانداي. «تۇرعىن ءۇيدى جاڭعىرتۋ» باعدارلاماسى بويىنشا 11 كوپقاباتتى ۇيلەرگە جوندەۋ جۇمىستارى جۇرگىزىلگەن.
مىنە, وسىناۋ قاپتاعان قۇرىلىستىڭ ءبارى كونە تۇركىستاننىڭ جاڭا زامانعا ساي كەلبەتىن, ساۋلەتىن جاساپ, اجارىن اشا تۇسۋدە. ەڭ باستىسى, حالىقتىڭ يگىلىگى ءۇشىن جاسالىپ جاتقان بۇل تىرلىكتەردىڭ قارقىنى ەش تولاستامايدى, جالعاسىن تابا بەرەدى.
ورالحان ءداۋىت,
«ەگەمەن قازاقستان».
وڭتۇستىك قازاقستان وبلىسى.
