قاپشاعايدا كۇن ەلەكتر ستانساسى بار

وركەنيەتكە ۇمتىلعان ەلىمىزدە تابىس كوزىنىڭ تاعى ءبىرى كۇن نۇرىنان ەلەكتر قۋاتىن الۋ بولىپ وتىر. تابيعات-انانىڭ وسىناۋ تەڭدەسسىز تارتۋى الماتى وبلىسىنىڭ قاپشاعاي قالاسىندا پايدالانىلۋدا. ەلدىڭ تۇراقتى دامۋىن قامتاماسىز ەتەتىن تەتىكتىڭ ءبىرى جاسىل ەكونوميكا ەكەندىگى بيىك مىنبەلەردە ايتىلىپ, جالپى تابيعات جاناشىرلارى ورتاسىندا دا دالەلدەنۋدە. مىنە, سول جاسىل ەكونوميكاعا كوشۋ قازاقستاندى الەمدەگى دامىعان 30 وركەنيەتتى مەملەكەت قاتارىنان ورىن الۋىنا مۇمكىندىك تۋدىراتىنى اقيقات. ەلباسىنىڭ جاسىل ەكونوميكاعا كوشۋ تۋرالى جارلىعىنا سايكەس «سامۇرىق-ەنەرگو» اكتسيونەرلىك قوعامى كۇن كوزىنەن كۇش الاتىن قۋاتتىلىعى 2 مەگوۆاتت ەلەكتر ستانساسىنىڭ قۇرىلىسىن قاپشاعاي قالاسىندا اياقتادى. جوبانىڭ باستى ماقساتى – كۇن نۇرىنىڭ الەۋەتىن تولىعىمەن پايدالانىپ, وڭىردە ەلەكتر ەنەرگياسىن وندىرۋدە اتموسفەرالىق اۋا قاباتىنا شىعارىلاتىن زياندى گاز مولشەرىن ازايتىپ, ەلەكتر ەنەرگياسىنا دەگەن قاجەتتىلىكتى تولىعىمەن قامتاماسىز ەتۋ بولىپ تابىلادى. بۇل جوبانى جۇزەگە اسىرۋ بارىسىندا ەۋروپانىڭ وزىق تەحنولوگياسى پايدالانىلدى. قۇرالداردىڭ 70 پايىزى كۇن نۇرىنان بويىنا ساۋلە تارتىپ, ۇستاپ تۇرسا, تالاپقا ساي قوندىرعىلاردىڭ وزگە 30 پايىزى كۇن نۇرىن ءۇزىلىسسىز ءوندىرىپ پايدالانۋعا دايىندايدى. كۇن ەلەكتر ستانساسى بارلىعى 6 گەكتار جەردى الىپ جاتىر. وندا 8 مىڭ كۇن مونوكريستالدى پانەلدەرى قويىلعان. سونىڭ ىشىندە 2,5 مىڭعا جۋىعى ترەكەرلىك قوندىرعىعا ورناتىلعان. ستانسادا قوندىرعى قۇرالداردى پايدالانۋ جونىندە ارنايى وقىپ, كاسىبي بىلىكتىلىگىن كوتەرىپ كەلگەن جوعارى ساناتتى 5 مامان جۇمىس ىستەيدى. قاپشاعايداعى كۇن ەلەكتر ستانساسى جىلىنا 3 ملن. 600 مىڭ كيلوۆاتت ساعات ەلەكتر ەنەرگياسىن وندىرەدى. قۋاتتىلىعى 2 مەگوۆاتت. بۇگىنگى تاڭدا قاپشاعاي قالاسىندا سالىنعان كۇن ەلەكتر ستانساسى قازاقستاندا كۇن ماسشتابىنداعى ەڭ ءبىرىنشى كۇن ەلەكتر ستانساسى بولىپ سانالادى. جوباعا تاپسىرىس بەرۋشى «سامۇرىق-ەنەرگو» اق. جوبا قۇنى – 1 700,1 ملن. تەڭگە. جوبا 2011-2013 جىلدارى جۇزەگە اسىرىلدى. 7995 كۇن پانەلى ورناتىلدى. وسى ستانسا قوندىرعىلارىن ورنالاستىرۋ كەزىندە 100 ادام جۇمىسقا تارتىلعان ەدى, بۇگىندە دايىن قوندىرعىلاردى 11 ادام باسقارىپ, ءوندىرىس ورنىن توقتاۋسىز جۇمىس ىستەتىپ تۇر. ءسويتىپ, ءوڭىر ەكونوميكاسىن دامىتقان ۇستىنە دامىتا ءتۇسۋ بارىسىندا بىرلەسە جۇمىس اتقارىلۋدا. نۇربول الدىباەۆ, «ەگەمەن قازاقستان». الماتى وبلىسى, قاپشاعاي قالاسى.