قوعامعا كەلتىرەر پايداسى مول, جان-جاعىنا تەك جاقسىلىق نۇرىن شاشاتىن جانداردىڭ عۇمىرىنىڭ قىسقا بولاتىنى دا – ءومىر زاڭدىلىعى. اۋرۋ دەگەن اۋىر سىناقتى قايسارلىقپەن كوتەرگەن كەڭەسحان اسىلحان ۇلىنىڭ ومىردەن وتكەنىنە دە ءبىر جىلعا تاياپ قالىپتى. قىمبات جاننىڭ قازاسى بارىمىزگە اۋىر تيگەنى انىق. جاقسى ادامدى جۇرەك قيسىن با, جول باستار تالىمگەر, سىيلى ارىپتەس, ادال دوستى ىزدەپ, قابىرعامىزدىڭ قايىساتىنى دا راس.
كەڭەسحان اسىلحان ۇلى قىسقا عۇمىرىندا تۋعان-تۋىس, دوس-جاراندارى مەن ارىپتەستەرىنىڭ قامقورشىسى بولا ءبىلدى. كاسىپپەن اينالىسا ءجۇرىپ قوعامدىق ىستەرگە دە كوڭىل ءبولدى. كاسىبىن جاڭادان باستاعاندارعا جول كورسەتىپ, زاماناۋي بيزنەس-جوبالاردى ۇسىنىپ, ءوز كاسىپتەرىن دوڭگەلەنتىپ كەتكەنىنشە قامقورلىعىن كورسەتتى. ءال-اۋقاتى تومەن وتباسىلارعا قامقورلىق جاساپ, ءاردايىم كومەكتەسىپ تۇردى.
وتباسىنا دا قامقورشى اكە, ادال جار بولا ءبىلدى, ومىرلىك قوساعى ايمان زامانبەكقىزىن قاتتى سىيلادى, بالالارى مەن نەمەرەلەرىن جانىنداي جاقسى كوردى. تۋعان-تۋىس, قۇدا-قۇداعيلارىمەن دە سىيلاستىقتا بولدى. كۇيەۋ بالالارىن ءوز بالالارىنداي كوردى, ولارعا اقىلشى, كەڭەسشى, دوس بولا ءبىلدى.
باسىنا قانداي اۋىرتپاشىلىق تۇسسە دە سىر بەرمەيتىن بايسالدى كىسى ەدى. كوڭىل كۇيى بولماي, ىشتەي كۇيزەلىپ جۇرسە بىلدىرمەيتىن. قازىر ويلاساق, ول دا جاقىندارىنا دەگەن شىنايى قامقورلىقتىڭ ۇلگىسى, «مەنى ويلاپ الاڭداماسىن, ۋايىمعا سالىنىپ, قينالماسىن» دەگەنى ەكەن-اۋ؟!
كەڭەسحان اسىلحان ۇلىنىڭ تۋىپ-وسكەن مەكەنى – الماتى وبلىسى, ەسكەلدى اۋدانى, شۇبار اۋىلىنا دەگەن ماحابباتى ەرەكشە ەدى. ءاردايىم اۋىلىن ساعىنىپ جۇرەتىن, قاجەت بولعاندا قامقور قولىن سوزۋدان ەش تارتىنبايتىن. وسىنداي اياداي اۋىلدان بالا كەزدەن بىلىمگە قۇشتار, ءار نارسەنىڭ سىرىن بىلۋگە, زەرتتەۋگە ىنتىق بولىپ ءوسىپ, ۇلكەن ومىرگە قادام باستى, بيىك بەلەستەردى باعىندىردى ەمەس پە؟!
كەڭەسحان اسىلحان ۇلىنىڭ ومىردەرەگىنە توقتالار بولساق, ول ەڭبەك جولىن 1983 جىلى ممتۋ-54-تە وقىتۋشى بولىپ باستادى. 1985 جىلى امتۋ-3, 1990 جىلى تالدىقورعان زووۆەتەرينارلىق تەحنيكۋمىندا وقىتۋشى بولدى. 1994 جىلى «تەمىر» فيرماسىنىڭ ديرەكتورى, 1998 جىلى «جاركەنت» مقكك ديرەكتورى, 2005 جىلى «الرۋن» اسىل تۇقىمدى زاۋىتى» جشس تالدىقورعان ايماقتىق فيليالىنىڭ ديرەكتورى قىزمەتتەرىن اتقاردى.
كانديداتتىق ديسسەرتاتسياسىن «شارۋا جانە فەرمەر قوجالىقتارىندا قويلاردىڭ ونىمدىلىگىن ارتتىرۋ ءۇشىن ەتتى باعىتتاعى تۇقىمدىق قوشقارلاردى پايدالانۋ» تاقىرىبىنا ارنادى. 2016 جىلى قازاقستان رەسپۋبليكاسىنىڭ قوي شارۋاشىلىعى رەسپۋبليكالىق پالاتالارىن قۇرىپ, ءومىرىنىڭ سوڭىنا دەيىن وسى پالاتالاردىڭ ديرەكتورى قىزمەتىن اتقاردى. «قازاقستان قوي وسىرۋشىلەر وداعىنىڭ» جانە «جەتىسۋ قوي وسىرۋشىلەر اسسوتسياتسياسىنىڭ» پرەزيدەنتى بولدى.
اۋىل شارۋاشىلىعى ءمينيستىرىنىڭ العىس حاتىمەن, 2018 جىلى «اۋىل شارۋاشىلىعى سالاسىنىڭ ۇزدىگى» توسبەلگىسىمەن ماراپاتتالدى.
قازاقستان رەسپۋبليكاسى جانە الماتى وبلىسى قوي شارۋاشىلىعى سالاسىن 2030 جىلعا دەيىن دامىتۋ باعدارلامالارىنىڭ جەتەكشىسى رەتىندە تالاي جارقىن ءىستىڭ باستاماشىسى بولعان, ءتۇرلى مەنشىك نىساندارىندا قويلاردىڭ گەنەتيكاسى مەن ونىمدىلىگىن جوعارىلاتۋدا سەلەكتسيالىق-اسىلداندىرۋ جۇمىستارىنىڭ وتاندىق زاماناۋي ادىستەرىن ەنگىزۋدە بەلسەندىلىك تانىتقان جاننىڭ ەڭبەگى, ەلى ءۇشىن جاساعان قىزمەتى زور.
كەڭەسحان اسىلحان ۇلىنىڭ نۇرلى بەينەسى, ادامي ۇلكەن قاسيەتى, ەڭبەككە دەگەن ىنتا-ىقىلاسى, جىگەرلىلىگىمەن بىزگە ارقاشان ۇلگى بولىپ قالا بەرمەك.
«قىلشىق ءجۇندi (ەدiلباي, قازاقتىڭ قىلشىق ءجۇندى قۇيرىقتى, ورداباسى, سارىارقا قىلشىق ءجۇندى قۇيرىقتى) ونىمدىلىك باعىتىنداعى قويلاردىڭ» رەسپۋبليكالىق پالاتاسى
