تاعدىردىڭ جازۋى... قازاق بالاسى ءۇشىن كوز كورىپ, قۇلاق ەستىمەگەن اۋعانستان... ون ەكىدە ءبىر گ ۇلى اشىلماعان جاپ-جاس بوزداقتارىمىزدىڭ بوتەن ەلدە اجال قۇشىپ, جەر جاستانارىن كىم بىلگەن؟
قاپيادا كەتكەن باۋىر
سامات مۇباراك ۇلى نۇرعاليەۆ 1961 جىلى بالقاش قالاسىنىڭ ماڭىنداعى شىعىس قوڭىراتتا تۋىپ وسكەن. مەكتەپ بىتىرە سالىسىمەن ازاماتتىق بورىشىن وتەۋگە اتتاندى. اركىمگە ۇرەي تۋعىزعان اۋعانستانعا كەڭەستىك اسكەر كىرگىزۋ جۇزەگە اسىرىلعان 1979 جىل ەدى. سامات بىردەن مۇسىلمان باتالونىنا قابىلدانىپ, پارتيزان فورماسىمەن سول جىلى-اق اۋعانستان توپىراعىن باستى. كابۋلدان الىس جاتقان فايزاباد ەلدى مەكەنى. دۇشمانداردىڭ كوپ شوعىرلانعان ورداسى. سوعىس... بۇل سوعىس كوزگە كورىنبەيتىن, ماقسات-مۇددەسى ايقىندالماعان باسقاشا سوعىس ەدى. ۇرىسقا كىرىسكەن سامات جانە ونىڭ قارۋلاس دوستارى العاشقى كۇننەن-اق دۇشماندارمەن بەتپە-بەت كەلىپ, بىرنەشە قويان-قولتىق شايقاستى وتكەرىپ ۇلگەردى. 1980 جىلدىڭ 31 جەلتوقسانى, ەلدە جۇرسە عوي, جاڭا جىلدى قارسا الۋعا دايىندالىپ, قىز-جىگىتتەر مارە-سارە كۇي كەشىپ, كوتەرىڭكى كوڭىل كۇي, يگى تىلەكپەن كەلەر جىلدى قارسى الار ەدى. بوزبالالار اپپاق قارداي اق تىلەكتەرىن ارۋلارعا جەتكىزىپ, اسقان ءبىر سۇيىسپەنشىلىككە بولەنەر ەدى. ال بۇل كەزدە سامات جانە ونىڭ دوستارى كەزەكتى ءبىر شايقاستى باستارىنان وتكىزىپ جاتقان-تىن. سول قاندى قىرعىندا 31 جەلتوقساندا سامات قاپيادا مەرت بولدى. قايران بوزداق قىرشىنىنان قيىلدى. *** – ەكەۋمىز تەتە بولاتىنبىز, – دەيدى ساماتتىڭ اپكەسى ءلاززات مۇباراكقىزى نۇرعاليەۆا. – مەن 1960 جىلى تۋىپپىن. كۇنى بۇگىنگە دەيىن كوز الدىمدا. ساماتتى اسكەر قاتارىنا زامانداستارىمەن بىرگە شىعارىپ سالدىق. نەگە ەكەنىن قايدام, ەسىكتەن شىعىپ بارا جاتىپ, كىلت توقتاي قالدى, ارتىنا قارادى, شيراق ءجۇرىپ كەلىپ مەنى قۇشاقتادى, قيماي قوشتاستى... وسىعان كورىنگەن ەكەن عوي, ءبىر جىل تولعاندا تەمىر تابىتپەن اكەلىپ, تۋعان توپىراعىنا جەرلەدى. ماڭگىلىك اعىل دا تەگىل ساعىنىش وسىلاي باستالدى...كەۋدەنى كەك كەرنەپ...
قازاق قىزدارى باتىر كەلەدى, ەرجۇرەك. مۇنى قازاق تاريحى, قازاق شەجىرەسى الدەقاشان دالەلدەگەن. ءلاززات ءمۇباراكقىزىنىڭ كەۋدەسىندە كەك ويناپ, اۋعانستانعا بارۋعا بەل بۋدى. – سەنبەيمىن. اۋعانستاننىڭ جاقپار تاستى تاۋلارىنىڭ ءبىر جەرىندە جۇرگەن شىعار, كەزدەسەرمىن بالكىم, جولىقتىرارمىن, جان باۋىرىمدى. ساماتتان كوز جازىپ قالۋىم مۇمكىن ەمەس, – دەيدى ءلاززات. وسىنداي ويمەن بالقاش قالالىق اسكەري كوميسسارىنا بارادى. ولار العاشقى بەتتە سەنبەيدى. – اتا-اناڭدى نەگە ايامايسىڭ؟ ونسىز دا قايعى جۇتىپ وتىر عوي, – دەيدى اسكەري كوميسساريات باسشىسى. – جوق, جىبەرىڭىزدەر, اۋعانستاندا باۋىرىم ساماتتىڭ اۋزىنا بىرەۋلەر سۋ تامىزعان شىعار. مەن مەدبيبىمىن, سامات سياقتى جاۋىنگەرلەرگە كومەكتەسۋىم كەرەك, قولدان كەلگەنشە ساماتتىڭ كەگىن قايتارامىن دۇشمانداردان, – دەپ ايتقانىنان قايتپايدى. اسكەري كوميسسار قايسار قىزدىڭ العان بەتىنەن قايتپايتىنىنا كوزى جەتتى. ءسويتىپ, 1986 جىلى ءوز وتىنىشىمەن اسكەر قاتارىنا الىنىپ, ودان ءارى اۋعانستانعا اتتانباق. اتا-اناسىمەن قوشتاسۋعا ەكى-اق ساعات ۋاقىتى قالىپتى. ەڭىرەپ, ەتەگى جاسقا تولىپ ولار قالدى. جەزقازعان وبلىستىق اسكەري كوميسسار اسكەر قاتارىنا قىزمەت ەتۋگە كەلگەندەردىڭ ەسىمىن اتاپ, قاي جاققا اتتاناتىندارىن حابارلاپ جاتتى. ءبارى دە كورگەن تۇستەي بۇگىن, جۇرەگى الىپ ۇشادى. ءبىر توپ انە, گەرمانياعا اتتانادى, ەندى ءبىر توپ جاس ساربازدار پولشاعا قىزمەت ەتۋگە ءبولىنىپتى. چەحوسلوۆاكياعا... ءبىر كەزدە جالعىز عانا قازاق قىزىنىڭ ەسىمى اتالدى, ول ءلاززات ەدى. اۋعانستانعا بۇل اسكەري شاقىرىلۋعا تەك ءلاززات قانا باردى. وبلىستىق اسكەري كوميسسار جان دۇنيەسى جىلى, باۋىرمال جىگىت اعاسى ەكەن, جىلاپ جىبەرىپتى. – ساماتتىڭ اپكەسى كەتىپ بارادى دەگەن حاباردى ەستىگەنمىن. سەن ەكەنسىڭ عوي, اۋىلىڭا قايت, ءۇش-ءتورت كۇن رۇقسات بەرەمىن, ءۇي-ىشىڭمەن جاقسىلاپ قوشتاس, بالقاشتان بىردەن تاشكەنت قالاسىنا سامولەت بار. قايتا عوي, – دەيدى. ءلاززات شىعىس قوڭىراتتاعى اتا-اناسىنا, باۋىرلارىنا كەلىپ, كوڭىلى جاي تاپقان سوڭ, قالالىق اسكەري كوميسساردىڭ ىقپال ەتۋىمەن تاشكەنت قالاسىنا ۇشادى. ودان ءارى اۋعانستاننىڭ استاناسى كابۋلعا كەتەدى.جالالاباد. دۇشماندار. قاندى قىرعىن.
اۋىر سالماقتى يل-76 اسكەري ۇشاعى اۋعانستان تەرريتورياسىن وڭاي باعىندىرىپ, قازانداي قايناپ جاتقان كابۋلعا اكەپ توپ ەتكىزدى. بار ويى سامات قىزمەت ەتكەن فايزابادقا جەتۋ. بىراق, ول جاقتان جاڭادان شاقىرىلعانداردى الىپ كەتەتىن «ساتىپ الۋشىلار» كەلمەپتى. امالسىز اسكەري باسشىلاردىڭ ۇيعارىمىمەن جالالابادقا جىبەرىلدى. كەيدە تاعدىردىڭ نە نارسەنى وپ-وڭاي قيۋلاستىرىپ جىبەرەتىنىنە دە تاڭعالاسىڭ جانە سەنەسىڭ. بالقاشتاعى اسكەري كوميسسارياتتاعىلار – تاتيانا گۋششينانى تاۋىپ ال, ونىڭ قىزمەت ەتكەنىنە ءبىراز بولىپ قالدى عوي, – دەپ كەڭەس ايتقان. قاشان دا تالماي ىزدەنگەن مۇراتىنا جەتەدى, ءلاززات تانيانى كوپ ۇزاماي جولىقتىرادى. ەكەۋى بالقاشتاعى مەديتسينالىق ۋچيليششەدە بىرگە وقىعان. ەكى بويجەتكەندى اۋعانستاندا جولىقتىرىپ, ءبىر-بىرىنە جىلاپ كورىستىرگەن سول كەزدەگى ساياساتتىڭ دا كەڭ اۋقىمدى قارماعىنا تاڭداي قاعاسىڭ. *** تاتيانا ۇلكەن اسكەري گوسپيتالدە قىزمەت ەتەدى ەكەن. كابۋل قالاسىنىڭ ماڭىندا. ەندى جەرلەسىنە جولىعىپ, ماۋقىن باسقان لاززاتقا جالالابادقا جەتۋ كەرەك. – جالالابادقا جەتۋگە ەكى مۇمكىندىك بار, ءبىرى ۇشاقپەن, ەكىنشىسى اۆتوبۋسپەن جەتۋگە بولادى. جانىمىزدا رەسەيدىڭ ءتورت قىزى بولدى. ءاپ-ادەمى جاپ-جاس بويجەتكەندەر, سول قىزدار جالالابادقا جەتۋگە اسىقتى. ءسويتىپ, ءبىرىنشى ۇشاققا ىلىكتى. ۇشاقتىڭ اۋەگە كوتەرىلگەنى سول-اق ەكەن, كوز الدىمىزدا بۇرق ەتكىزىپ, اتىپ ءتۇسىردى. ۇشاقتاعى 26 ادام تۇگەل جانىپ كەتتى. كەيىنگى ۇشاقپەن ءبىز دە جەتتىك. كابۋل سۋىق ەدى. ال جالالاباد ىستىق, ءبىز بارعاندا 57 گرادۋستى كورسەتىپ تۇردى. پاكىستاننىڭ شەكاراسىنان 43 شاقىرىم جەردە تۇردىق. جاڭبىر ءجيى جاۋادى, قىسى جوق. اسكەري ومىرگە كىرىستىك. كوز الدىمدا ايانىشتى وقيعالار ءوتىپ جاتتى. سوعىستىڭ اتى سوعىس قوي. جارالى جاۋىنگەرلەردىڭ جاي-كۇيىن ايتۋعا ءتىلىم بار بولعىر كەلمەيدى. مەنىڭ دە سامات باۋىرىم وسىنداي جاعدايدا وپات بولدى-اۋ دەپ ويلاپ قويامىن, – دەيدى ءلاززات اۋعان كۇندەرىن ەسىنە الىپ. ءلاززات سانينسترۋكتور بولىپ ۋاقىتپەن ساناسپاي ەڭبەك ەتتى. ءبىر سانينسترۋكتور 300-گە تارتا ساربازعا دارىگەرلىك قىزمەت كورسەتىپ, كۇندىز-ءتۇنى جانتالاسادى. دەم الۋ, دامىلداۋ دەگەن اتىمەن جوق. جارالىلاردىڭ جاراقاتىن ەمدەۋ, تاڭۋ, العاشقى دارىگەرلىك كومەك كورسەتۋ... ءبارى ءبارى ءلاززات جانە ونىڭ ارىپتەستەرىنىڭ موينىندا. سوناۋ 500 مەتر جەردەگى اسحانادان شاتىرلى قالاشىققا تاماق جەتكىزەدى. وعان دا شابۋىل جاسالادى. قانشاما جاس سارباز وسى ارەكەتتىڭ ۇستىندە وپات بولىپ جاتتى. جاۋىنگەرلەرگە دە, مەديتسينالىق قىزمەتكەرلەرگە ۇيىقتاتپايتىن ءدارى بەرەدى ەكەن. سونى ىشسە ەكى تاۋلىك بويىنا ۇيىقتامايدى. ۇرەيلى, ايانىشتى ءارى كەۋدەگە وكىنىش تولعان كەكتى كۇندەر ءوتىپ جاتتى. – ۇلى وتان سوعىسىنان اۋعان سوعىسىنىڭ ايىرماشىلىعى جەر مەن كوكتەي. ۇلى وتان سوعىسىندا تىل بولدى, سوعىستىڭ العى شەبى بولدى, باعىت-باعدار بەلگىلى. ال, اۋعان سوعىسىندا بولجام جوق. قاي جاعىڭنان جاۋ كەلەدى؟ بەلگىسىز, جاڭا عانا ساپەرلەر تازالاپ وتكەن جول ءۇستى ارتىنشا مينا جارىلىپ, استان-كەستەنى شىعىپ جاتادى. جەر استىنان قالاشىق جاساپ العان, كەڭەس اسكەرلەرىنىڭ قالاي ءجۇرىپ, قالاي تۇراتىنىن جان-جاقتى زەرتتەگەن, ايانبايدى, ايامايدى. قولعا تۇسكەندى قىرا بەرەدى, سونىڭ ءبارىن كوزىمىز كوردى. كەڭەس اسكەرلەرى جاۋىنگەرلەرىنىڭ دەنەسىن ءتىلىم-ءتىلىم ەتىپ, كەسىپ تاستايدى. كەكتەنەمىز, ءبىزدىڭ ساربازدار دا ايانىپ قالمايدى, سارباز باۋىرلاردىڭ ىڭىرسىعان, ىشقىنعان, شىعارعا جانى جوق ارەكەتىن كوردىك. ولاردى جىگەرلەندىرەمىز, ءبارىمىزدىڭ ماقساتىمىز دۇشماندارمەن سوعىسۋ, قالاي جەڭىسكە جەتەمىز, قاشان جەتەمىز, سوعىس قانداي جاعدايدا اياقتالادى, ول جاعى تۇماندى, كۇماندى دۇنيە ەدى. ءاربىر ساربازعا كورسەتكەن كومەگىمدى, ايالى قامقورلىعىمدى, بويىمداعى بار ىزگىلىكتى, اپكەلىك ماحابباتىمدى جاپ-جاس ساربازدارعا ارنادىم. ايانبادىم, ساماتىمنىڭ كەگىن وسىلاي قايتارسام دەدىم, – دەپ ءلاززات تاعى دا اۋىر كۇرسىندى.سارتاپ ساعىنىش
قولىنداعى سارعايعان سۋرەتتەرگە قارايدى, باۋىرى ساماتتىڭ ءۇنسىز بەينەسىن كەۋدەسىنە قىسىپ, كوز جاسىن توگەدى. ءاي, ءپاتۋاسىز دۇنيە-اي, ءبىر كۇنگى جارىق ساۋلەگە نە جەتسىن! ءبىر-ءبىرىمىزدىڭ قادىرىمىزدى ءبىلۋ ءۇشىن سوعىسقا اتتانۋىمىز كەرەك پە؟ جاقىنىڭدى ساعىنۋ ءۇشىن جات جەردە جەر جاستاندىرۋ كەرەك پە؟ مىنە, تىرشىلىكتىڭ قادىرى, سىيلاستىقتىڭ وزەگى. ءلاززات مۇباراكقىزى وسىنداي بولمىستى ءوز باسىنان وتكەرىپ, ەندى ماڭايىنا, ءوز ورتاسىنا اسا ءبىر ىزگىلىكپەن قارايدى. يت ماراكۋ تىرشىلىكتىڭ قاسيەتىن وزگەمىزگە تۇسىندىرگىسى كەلەدى كوز جاسىمەن. جەر باسىپ جۇرگەندەر ۇعا قويامىز با ونى. ايتىسامىز, تارتىسامىز, ولەكسەگە تالاسقان يتتەي ىرىلداسامىز, كەيدە وسىلاي پەندەلىكتى ەسكە ءتۇسىرىپ, باتىلداۋ ايتۋعا تۋرا كەلەدى. – وتان الدىنداعى بورىشىمىزدى اتقاردىق, سوعىس شىعىنسىز بولمايدى, تەك سامات قانا ما؟ قانشاما وتباسىنىڭ الپەشتەگەن, بولاشاعىنان زور ءۇمىت كۇتكەن, شاڭىراعىنا يە بولاتىن جاستار باقيعا اتتانىپ جاتتى. اۋعانستانداعى سوعىستا كەڭەس اسكەرلەرىنە الەۋمەتتىك, تۇرمىستىق جاعداي ءجوندى كورسەتىلگەن جوق. بيتتەپ, قۇرتتاپ, ءىش سۇزەگىنە شالدىققاندار كوپ بولدى. ول جاقتاعى تۇرمىس مۇلدە بولەك. ءتىپتى, ەكى عاسىرداي ارتتا قالعان دەسەم, ارتىق ەمەس. مەن دە ءتورت وپەراتسيانى باستان وتكەردىم, دەنساۋلىعىمىزدى بەردىك. ول جاقتا كوكنار, بەينەلەپ ايتساق, ءبىزدىڭ ەگىنجايىمىزداي ىرعالىپ, تەڭىزدەي تەربەلىپ تۇرادى. ارنايى ەگىپ تاستايدى, كوكنار ساۋداسى بار جەردە ءتارتىپ بولمايدى. ءبىز اندا-ساندا اۋعان حالقىنىڭ اراسىنا كىرىپ, دارىگەرلىك قىزمەت كورسەتەمىز, ۇگىت-ناسيحات جۇرگىزەمىز, بەيبىت ومىرگە ەشتەڭە جەتپەيدى دەيمىز. كۇندىز ەم-دوم كورسەتكەن ادامدار تۇندە وزىڭە شابۋىل جاسايدى, دۇشماندار... كەيدە دۇشمان ەكەنىن تەز اڭعارامىز, بىزگە قارالۋعا كەلگەندەردىڭ يىعىندا مىلتىق اسىنعان بەلگىلەرى قالىپ قويادى. تىتىركەنەسىڭ, ال ەسىرتكىلەر ءار ءۇيدىڭ بوساعاسىندا قاپ-قابىمەن تۇرادى. بالشىقتان سوققان ءۇي... ونىڭ ىشىندە ادام دا, مال دا جاتادى, – دەپ ءلاززات اڭگىمەنىڭ ءالقيسساسىن ءبىر تۇيىندەپ قويدى. ءلاززات مۇباراكقىزى اۋعان سوعىسىنان 1988 جىلدىڭ كوكتەمىندە ورالدى. بالقاش قالاسى ماڭىنداعى اۋە قورعانىسى پولكىندا قىزمەت ەتىپ, كاپيتان شەنىندە زەينەتكە شىقتى.ءۇش جىلعا تارتا اۋعانستاندا قىزمەت ەتتى. قايسار قىز ايتقانىن ورىندادى. شارشادى, شالدىقتى, دەنساۋلىعىن جوعالتتى.لاززاتقا قۇرمەت – قازاققا قۇرمەت
1989 جىل. بالقاش قالاسىنا سوناۋ قاپ تاۋىنان 15 جىگىت توپ ەتە ءتۇستى. قالاعا كاۆكازدىقتار كەلىپتى دەگەن ءسوز لەزدە تارادى. نە ءۇشىن كەلدى, كىمدى ىزدەپ ءجۇر, ولاردى كىم شاقىردى؟ سايدىڭ تاسىنداي ىرىكتەلگەن جىگىتتەر. مىنە, ىزگىلىك, جاقسىلىق قاشان دا ۇمىتىلمايدى, جۇرەگى جايساڭ, قادىر-قاسيەتىڭدى ۇعاتىن جاندار بار عوي بۇل ومىردە. جاڭاعى 15 كاۆكازدىق جىگىتتەر ءبىزدىڭ ءلاززات قىزىمىزدىڭ شاپاعاتىن كورىپتى. قازاقى مەيىرىمدىلىك تۇرعىسىنان جارالى جىگىتتەردى تۋعان باۋىرىنداي كۇتىپ, ەمدەپ, قاتارعا قوسىپ اسكەري قالاشىققا جونەلتە بەرەدى. ءلاززات اپكەلەرىن ىزدەپ كەلگەن جىگىتتەر ارنايى داستارقان جايىپ, مەيرامحاناعا شاقىرىپ, ارقا-جارقا كۇي كەشەدى. جەرگىلىكتى قازاق جىگىتتەرى نامىسقا باسىپ, قىر كورسەتەدى. ويتپەگەندە قايتسىن, مايداننان ەسەن-ساۋ ورالعان ساربازدار ءلاززاتتى ورتالارىنا الىپ, كەزەك-كەزەك ءسوز سويلەپ, قۇرمەتتەيدى. ءىستىڭ ناسىرعا شاباتىنىن ولار دا سەزەدى, ىلە ءسوز الىپ, جينالعان جەرگىلىكتى جىگىتتەرگە ءمان-جايدى تۇسىندىرە باستايدى. – سىزدەر عافۋ ەتىڭىزدەر, قازاقتار, ءبىز سوناۋ كاۆكازدان ەرىككەننەن كەلىپ تۇرعان جوقپىز. ءبىزدى اجالدان الىپ قالعان سىزدەردىڭ ءلاززات جەرلەستەرىڭىز, ەگەر دە ءلاززات بولماعاندا بىزدەر ءدال وسىلاي جەر باسىپ جۇرمەس ەدىك. قانشاما جىگىتتەردى اجال تىرناعىنان اراشالادى. مايداندا ءجۇرىپ, ءلاززات اپكەمىزدىڭ جان دۇنيەسىن سەزىنە وتىرىپ, جالپى قازاق حالقىنىڭ اياۋلى جانىن ۇققانداي بولاتىنبىز. ەندى مىنە, اپكەمىزدى ىزدەپ, سالەم بەرىپ, قۇرمەت كورسەتىپ قايتساق دەگەن وي ەدى, – دەدى ءسوز ىڭعايىن كەلتىرە بىلەتىن كاۆكازدىق جىگىت. مەيرامحانادا وتىرعان بۇكىل جۇرتشىلىق جىلادى. جەرگىلىكتى جىگىتتەر ەرتەڭىندە ءلاززات اپكەسىن ىزدەپ كەلگەن كاۆكاز جىگىتتەرىنە سىي-قۇرمەتىن كورسەتىپ, شىعارىپ سالعان. ەرمەك دەگەن كاۆكازدىق بالانىڭ اكە-شەشەسى كۇنى كەشەگە دەيىن حات جازىپ تۇردى. اللانىڭ جازۋى عوي, سوناۋ اۋعانستاننان امان قايتقان ەرمەك كاۆكازدا جول اپاتىنان قايتىس بولىپتى. اكە-شەشەسىنە ۇنەمى ءلاززات تۋرالى ايتادى ەكەن. ەندى بىردە قارالى حات جەتكەن. – سۇيىكتى ءلاززاتىم-اۋ, سەنى اۋزىنان تاستامايتىن ەرمەگىمىزدەن ايىرىلىپ قالدىق, – دەپ اناسى ەگىلە حات جازادى. سارعايعان حاتتار جان-جاقتان كەلەدى. بارىندە دە حات يەلەرىنىڭ لاززاتقا دەگەن ىڭكارلىگى, قۇرمەتى, ساعىنىشى باياندالادى. – مىنە, ىزگىلىك.ءتۇيىن
ءلاززات وتاعاسى باقىتجان ەكەۋى ءۇش بالا تاربيەلەپ ءوسىردى. ۇلكەن ۇلى دانيار, ەگىز ۇلدارى اسىلان, باعلان تاۋەلسىز ەلدىڭ بالعىن شىبىعى سەكىلدى ءوسىپ كەلەدى. ءيا, اۋعانستان سوعىسىنا قاتىسقان جاۋىنگەرلەرگە الەۋمەتتىك كومەك, قامقورلىق ءالى دە ولقى سوعىپ جاتىر. ءلاززات اڭگىمە اراسىندا پاتەرسىز جۇرگەن جىگىتتەردىڭ كۇنى بۇگىنگە دەيىن ورتالارىندا بار ەكەنىن ايتىپ, قىنجىلدى. جىل سايىن №18 ورتا مەكتەپتە سامات نۇرعاليەۆتى ەسكە الۋعا ارنالعان قازاقشا كۇرەستەن جارىس وتكىزىلىپ تۇرادى. وعان سپورت جاناشىرى باقتىباي باۋىرىمىز ۇيىتقى بولىپ ءجۇر. شۇكىرشىلىك. *** ءيا, اۋعانستان سوعىسىنا ءوز ەركىمەن قاتىسىپ, كەۋدەسى كەككە تولعان ءلاززات ءمۇباراكقىزىنىڭ سارقىلمايتىن ساعىنىش الەمى وسىنداي ەدى. ورالبەك جۇنىس ۇلى, قازاقستان جۋرناليستەر وداعىنىڭ مۇشەسى. قاراعاندى وبلىسى. –––––––––––––––– سۋرەتتە: اۋعان سوعىسىنىڭ ارداگەرى, كاپيتان ءلاززات نۇرعاليەۆا
