جوعارىدا اتالعان كوماندالاردىڭ بارلىعى دا قازىرگى كەزدە ءوز قۇرلىقتارىنىڭ ۇزدىكتەرى. ماسەلەن, ۆەنەتسيا وڭىرىندەگى ترەۆيزو پروۆينتسياسىنا قاراستى كونەليانو دەپ اتالاتىن شاعىن عانا قالادا جاساقتالعان «يموكو ۆوللەيدىڭ» يتاليانىڭ ءتورت دۇركىن چەمپيونى, سول ەلدىڭ سۋپەركۋبوگىنىڭ ءتورت مارتە يەگەرى, ەۋروپا چەمپيوندارى ليگاسىنىڭ جەڭىمپازى جانە تاعى باسقا تولىپ جاتقان اتاقتارى بار. 2019 جىلى ءدال وسى ۇجىم الەمنىڭ كلۋبتىق چەمپيوناتىندا باس جۇلدەنى ولجالادى. ءبىر عاجابى, 2020-2021 جىلدارى ولار ءتورت بىردەي اسا ءىرى حالىقارالىق دودالارعا قاتىسىپ, بارلىعىندا جەڭىسكە جەتتى. سول جارىستاردا اپەننين تۇبەگىنىڭ ارۋلارى 45 كەزدەسۋ وتكىزىپ, بىردە-ءبىر رەت جەڭىلىستىڭ كەرمەك ءدامىن تاتقان جوق. بۇل كۇندەرى دانيەلە سانتارەللي جاتتىقتىراتىن كوماندانىڭ ساپىندا پولشالىق يوننا ۆولوش, يتاليالىق پاولا ەگونۋ, رافاەلا فولە, مونيكا دي دجەننارو, سارا فار, لوۆەت ومورۋي, امەريكالىق كەترين پلاممەر مەن مەگان كورتني, حورۆاتيالىق بوجانا بۋتيگان جانە بولگاريالىق حريستينا ۆۋچكوۆا سىندى ۆولەيبولشىلار ونەر كورسەتەدى.
تۇركيانىڭ «ۆاكىفبانكى» 2013, 2017 جانە 2018 جىلدارى كلۋبتىق الەم چەمپيوناتىندا دارا شىقسا, 2011 جىلى كۇمىس مەدالدى يەلەندى. ال 2016 جانە 2019 جىلدارى قولا جۇلدەنى ەنشىلەدى. سوڭعى جارىستىڭ جارتىلاي فينالىندا تۇركيالىقتار ءدال سول «يموكو ۆوللەيگە» ەسە جىبەرسە, ءۇشىنشى ورىن ءۇشىن باسەكەدە يتاليانىڭ «يگور گورگوندزولاسىن» ويسىراتا ۇتتى. ىستانبۇلدىق ۆولەيبولشىلار ءتورت رەت قارت قۇرلىقتىڭ تەڭدەسسىزى دەپ تانىلدى. سونداي-اق ولار ءوز ەلىنىڭ سان مارتە چەمپيونى جانە ءتۇرلى كۋبوكتاردىڭ يەگەرلەرى. ءبىر سوزبەن ايتساق, سوڭعى جىلدارى اتالعان مەملەكەتتەگى ەشبىر ۇجىمى «ۆاكىفبانككە» تويتارىس بەرە الماي ءجۇر. بۇل كوماندانىڭ بۇگىنگى تاڭداعى باستى جۇلدىزدارى – چياكا وگبوگۋ مەن ميشەل بارچ-حاكلي. ەكەۋى دە بيىل اقش قۇراماسى ساپىندا وليمپيا ويىندارىنىڭ جەڭىمپازى اتاندى. «ۆاكىفبانكتىڭ» قۇرامىندا برازيليا مەن شۆەتسيادان كەلگەن ءبىر-ءبىر لەگيونەردەن بار, ال قالعاندارى جەرگىلىكتى ويىنشىلار.
تۇركيانىڭ تاعى ءبىر كلۋبى «فەنەرباحچەنىڭ» دە باعىندىرعان بەلەستەرى ءبىر توبە. ىرگەتاسى سوناۋ 1927 جىلى قالانعان ۇجىم تۇركيا بىرىنشىلىگىندە 13 مارتە توپ جاردى. 2010 جىلى كلۋبتىق الەم چەمپيوناتىندا التىننان القا تاقسا, 2012 جىلى قولاعا قول سوزدى. 2012 جىلى چەمپيوندار ليگاسىندا جەڭىسكە جەتسە, تاعى ءۇش رەت جۇلدەگەرلەر قاتارىنا قوسىلدى. سەربيالىق مامان زوران تەرزيچ تىزگىنىن ۇستاعان كوماندادا برازيليالىق انينيا, رەسەيلىك اننا لازارەۆا مەن ارينا فەدوروۆتسەۆا, سەربيالىق مينا پوپوۆيچ جاسىنداي جارقىلداۋدا. ءوز ەلىنىڭ ويىنشىلارى اراسىندا دا اسقان شەبەرلىگىمەن جانكۇيەرلەردى ءتانتى ەتىپ جۇرگەن ۆولەيبولشىلار از ەمەس.
وڭتۇستىك امەريكادان ات تەرلەتىپ كەلگەلى وتىرعان ەكى كوماندانىڭ دا شابىسى شيراق. ولاردىڭ ەكەۋى دە برازيليانىڭ بىرنەشە دۇركىن چەمپيوندارى, قۇرلىقتىق جارىستاردا دا سان مارتە جەڭىس تۇعىرىنىڭ ەڭ بيىك ساتىسىنان كورىندى. ماسەلەن, «ميناس» بىلتىر لاتىن امەريكاسىنىڭ كلۋبتىق چەمپيوناتىنىڭ جەڭىمپازى اتانسا, «دەنتيل-پرايا» سول اتاققا بيىلعى ماۋسىمدا قول جەتكىزدى. ودان بولەك, «ميناستىڭ» بويشاڭ بۇرىمدىلارى 1992 جانە 2018 جىلدارى وتكەن الەم بىرىنشىلىكتەرىندە كۇمىس مەدالدى مويىندارىندا جارقىراتتى.
مىنە, وسكەمەننىڭ «التايىنا» انادولى ەلىندە وسىنداي مىقتى كوماندالارمەن كۇش سىناسۋعا تۋرا كەلىپ وتىر. جەرلەستەرىمىز الەمدىك دەڭگەيدەگى جارىستاردا ەلەۋلى تابىستارعا قول جەتكىزە الماعانىمەن, قۇرلىقتىق دودالاردا وزدەرىن جاقسى قىرىنان كورسەتۋدە. بيىل تايلاندتىڭ ناكحونراتچاسيم قالاسىندا وتكەن ازيا بىرىنشىلىگىندە قازاقستاندىق ۆولەيبولشىلار قارسىلاس شاق كەلتىرمەي, التىننان القا تاقتى. وسى جارقىن جەڭىسىنىڭ ناتيجەسىندە كەندى التايدىڭ ارۋلارى الەمنىڭ ەڭ مىقتى كوماندالارىمەن كۇش سىناسۋ قۇرمەتىنە يە بولدى.
