شاعىن اۋدانداعى 2 765 ابونەنت بۇعان دەيىن جەكەمەنشىك ترانسفورماتور قىزمەتىن پايدالانىپ كەلگەن بولاتىن. شاعىن اۋدانعا ساپالى ەلەكتر قۋاتىنىڭ بەرىلۋى, اۋقىمدى جوبا - «1-م-1» قوسالقى ەلەكتر ستانتسياسىنىڭ پايدالانۋعا بەرىلۋ ناتيجەسىندە مۇمكىن بولدى.
قالانىڭ ەنەرگەتيكا سالاسىنداعى ماڭىزدى كەشەننىڭ ىسكە قوسىلۋىنا شىمكەنت قالاسىنىڭ اكىمى مۇرات ايتەنوۆ قاتىستى.
- قالانى ساپالى ەلەكتر قۋاتىمەن قامتۋ سالاسىندا اۋقىمدى جۇمىستار قولعا الىندى. ەلەكتر ساپاسى تومەن 16 ەلدى مەكەندە ەلەكتر جەلىلەرىن جاڭارتۋ جۇمىستارى جالعاسۋدا. 7 ەلدى مەكەندەگى قۇرىلىس جۇمىستارى جىل سوڭىنا دەيىن اياقتالادى. ناتيجەسىندە 21 مىڭنان استام ادام تۇتىناتىن ەلەكتر قۋاتىنىڭ ساپاسى ارتادى, جىلدار بويى قوردالانعان ماسەلەنىڭ وڭتايلى شەشىمى ءۇشىن ۋاقىت كەرەك. ەنەرگەتيكا ماماندارى بارىن سالىپ ەڭبەك ەتۋدە. ولاردىڭ جۇمىسىنا تۇسىنىستىكپەن قاراپ, قولداۋ كورسەتۋگە شاقىرامىن - دەدى شاھار باسشىسى.
«اسار-2» شاعىن اۋدانىنىڭ ىشكى ورامدىق كوشەلەرىنە 87 شاقىرىمنان اساتىن ەلەكتر جەلىلەرى تارتىلىپ, 24 جيناقتى ترانسفورماتور قوسالقى ستانتسيالارى ورناتىلدى.
جاڭادان ىسكە قوسىلعان ستانتسيادان قۋات الۋى جوسپارلانعان «سولتۇستىك ساياجاي», «قايناربۇلاق», «دوستىق» شاعىن اۋداندارى, ىشكى ورامدىق جۇيەلەرىنىڭ قۇرىلىسى اياقتالعاندا كەزەڭ-كەزەڭىمەن قوسىلاتىن بولادى.
