«بۇگىن بالىق شارۋاشىلىعى سالاسىنداعى ءىرى بيزنەس وكىلدەرىمەن كەزدەستىم», - دەپ جازدى مينيستر تۆيتتەردەگى پاراقشاسىندا.
كەزدەسۋ بارىسىندا جەڭىلدىكتى سالىق سالۋ, ينۆەستيتسيالىق جانە شارۋاشىلىق شىعىنداردى سۋبسيديالاۋ, اينالىم قاراجاتىن تولىقتىرۋ ءۇشىن جەڭىلدەتىلگەن نەسيەلەندىرۋگە قول جەتكىزۋ جانە تەحنولوگيالىق جابدىق ساتىپ الۋ بولىگىندە مەملەكەتتىك قولداۋ كورسەتۋ ماسەلەلەرى تالقىلاندى. سونداي-اق بالىق جانە بالىق ونىمدەرى مونيتورينگىنىڭ اقپاراتتىق جۇيەسىن ەنگىزۋ ماسەلەلەرى دە ورتاعا سالىندى.
مينيستر بۇگىنگى تاڭدا بالىق شارۋاشىلىعىن دامىتۋدىڭ 2030 جىلعا دەيىنگى باعدارلاماسى جۇزەگە اسىرىلىپ جاتقانىن, ونىڭ شەڭبەرىندە بالىق وسىرۋمەن اينالىساتىن سۋبەكتىلەر ءۇشىن قولايلى جاعداي جاساۋ, وزەكتى ماسەلەلەردى شەشۋ جانە زاڭنامانى جەتىلدىرۋ بويىنشا جۇيەلى شارالار قابىلداناتىنىن اتاپ ءوتتى.
كەزدەسۋ سوڭىندا مينيستر بالىق شارۋاشىلىعى كوميتەتىنە بيزنەس سۋبەكتىلەرى كوتەرگەن ماسەلەلەردى قاراستىرىپ, ولاردى شەشۋ بويىنشا ناقتى تاپسىرمالار بەردى.
