بىرلىگى جاراسقان ەلمىز

شىمىلدىعى شىرايلى شى­عىس­تا, اسقارالى التاي وڭىرىندە ءتۇرى­لىپ, ودان ءارى قاسيەتتى اۋليەاتا جەرىندە جالعاسقان «ماڭگىلىك ەل» ۇلتتىق يدەياسىن قولداۋعا ارنالعان پاتريوتتىق اكتسيا ماعجان ەلىنە جەتتى. قازاقستان حالقى اسسام­بلەيا­سىنىڭ قولداۋىمەن ۇيىمداس­تىرىلعان ايتۋلى شارا م.قوزى­باەۆ اتىنداعى سولتۇستىك قازاق­ستان مەملەكەتتىك ۋنيۆەرسيتەتىندە جالاۋىن جەلبىرەتىپ, ەلباسىمىز ءداستۇرلى جولداۋىندا بەلگى­لەپ بەرگەن ۇلتتى ۇيىس­تى­رىپ, ۇلى ماقساتتارعا جەتە­لەي­تىن, ۇلتىمىزدىڭ ۇلى باع­دا­رى – «قا­زاقستان-2050» ستراتە­گيا­سىنىڭ ءتۇپ قازىعى ىسپەتتى ماڭگىلىك ەل يدەياسى تاتۋلىق, دوستىق, بىرلىك سە­ك­ىلدى اسىل قۇندىلىقتارىمىز­دى ءاس­پەتتەۋمەن, ارداقتاۋمەن وزگەشە جاراسىم, كەرەمەت ۇيلەسىم تاپتى. ەڭبەك ۇجىمدارىنىڭ, ۇكىمەتتىك ەمەس ۇيىمداردىڭ, ەتنومادەني بىرلەستىكتەر, جاستار وكىلدەرىنىڭ, ارداگەرلەردىڭ بەلسەنە قاتىسۋىمەن وتكەن اكتسيا بارىسىندا مەملەكەت باسشىسىنىڭ بۇكىلحالىقتىق قولداۋعا يە بولعان تۇرمىسى با­قۋاتتى, ءتۇتىنى ءتۇزۋ ۇشقان, ەرتەڭىنە سەنىممەن قارايتىن با­قىتتى ەل بولۋ زاڭعارىنا جەتەلەيتىن قاعيداتتارى مەن تالاپتارى اتا-بابالارىمىزدىڭ سان مىڭ جىلدان بەرى اڭساعان اسىل ارمانىنىڭ شىنايى كەلبەتىن تانىتقانداي. القالى فورۋمدى وبلىس اكى­مى سامات ەسكەندىروۆ اشىپ, پرە­زي­دەنتتىڭ سىندارلى دا بايىپتى ساياساتىنىڭ ارقاسىندا ەگەمەندى دامۋدىڭ 22 جىلىندا بارشا قا­زاق­ستاندىقتاردى بىرىكتىرەتىن, ور­تاق ماقساتقا جۇدىرىقتاي جۇ­مىلدىراتىن ارقاۋلى قۇن­دىلىقتار قالىپتاسقانىن, وسى­نىڭ ارقاسىندا الەۋمەتتىك-ەكو­نو­ميكالىق جەتىس­تەرىمىزدىڭ, تابىستارىمىزدىڭ نى­عايا تۇسكەنىن جەتكىزدى. ەندىگى ماق­سات, جولداۋدا اتاپ وتىلگەندەي, بار­لىق كۇش-جىگەرىمىزدى جۇمساي وتىرىپ, «2050» ستراتەگياسىنىڭ باستى تالاپتارىن جۇزەگە اسىرۋ بولىپ تابىلادى. ەلباسى جاستارعا ارناعان سوزىندە «ونى جۇزەگە اسىراتىن دا, جەمىسىن كورەتىن دە سىزدەر. ەلدىڭ بولاشاعىن بارشا حالىقپەن بىرگە جاساڭىزدار!» دەگەن مىندەت قويدى. ولاي بولسا, ماڭگىلىك ەل بولۋ ءوز قولىمىزدا. وتانىمىز – بىرەۋ. قوعامىمىزداعى ۇلتتىق بىرلىك, بەيبىتشىلىك پەن كەلىسىم قازاقستاننىڭ بولاشاعىن باياندى ەتۋگە ارنالعان. قازاقستان حالقى اسسامبلەياسى ءتورا­عاسىنىڭ ورىنباسارى – حات­­شىلىق مەڭگەرۋشىسى ەرا­لى توع­جانوۆ ءوز سوزىنە «قازاق­ستان-2050» – ەلباسى نەگىزىن سالىپ بەرگەن ماڭگىلىك ەلگە باستايتىن ابىروي­لى دا مارتەبەلى جولدىڭ ارماننان اقيقاتقا اينالعانىن ارقاۋ ەتە كەلىپ, اسسامبلەيانىڭ حح سەس­سياسى «ءبىر ەل, ءبىر حالىق, ءبىر تاع­دىر» ۇرانىمەن وتكەنىن, تاريح­تىڭ, مادەنيەتتىڭ, ءتىلدىڭ ورتاق­تىعى جوعارى رۋحانياتتى, زايىرلى مەملەكەت قۇرۋعا كەڭ جول اشقانىن ەسكە سالدى. ودان ءارى تاۋەلسىزدىگىمىزدىڭ نەگىزگى ايشىقتى بەلگىلەرىنىڭ بىرەگەيى سانالاتىن جاڭا ەلوردامىزدىڭ تۇرعىزىلىپ, از عانا ۋاقىتتىڭ ىشىندە تورتكۇل دۇنيە تورىنەن ويىپ تۇرىپ ورىن العانىن ماقتانىشپەن جەتكىزدى. سقمۋ ستۋدەنتى اسقار باي­مۇ­قانوۆتىڭ جىگەرلى سوزدەرى دە ءار جۇرەكتى تولقىتىپ, ۇلكەن وي سال­عانى انىق. ول ءوز ءسوزىن «ەلبا­سىمىزدىڭ سەنىمىن ۇزدىك وقۋمەن, جاسامپاز ەڭبەكپەن اقتايىق!» دەگەن كوتەرىڭكى لەپپەن اياقتاسا, وبلىستىق اسسامبلەيا جانىنداعى «بىرلىك» جاس­تار قوعامدىق ءبىر­لەستىگىنىڭ لي­دەرى نايرا زارگاريان ماڭگىلىك تاۋەل­سىزدىگىمىزدى كوزدىڭ قاراشىعىنداي ساقتاي ءبى­لۋ­گە ۇندەدى. «ديپلوممەن – اۋىل­عا!» باعدارلاماسى ارقىلى جۇ­مىس­قا ورنالاسۋ مۇمكىندىگىنە يە بولعان ديپلومدى مامان ءاليا شيرو­جەەۆا جاستاردىڭ وزىق جو­با­لارعا قاتىسۋى جايلى وي قوز­عا­دى. پەتروپاۆل اسكەري ينستيتۋ­تىنىڭ كۋرسانتى مۇرات ەرزات بوس­تان­دىق, ازاتتىقتى قانشا اڭ­سا­­سا دا جەتە الماي كەتكەن اتا-بابا­­­لا­رىمىزدىڭ اسىل مۇرات, يگى تىلەگى ورىندالعانىن, ۇلت رەتىندە تۇتاس­تىعىمىزدى ساقتاۋدىڭ جولى وتكەننەن تاعى­لىم الا وتىرىپ, كەلە­شەككە سەنىم­مەن قاراۋ ەكەنىن تىلگە تيەك ەتتى. باسقا دا سويلەۋشىلەر «ءماڭ­گى­لىك ەل» پاتريوتتىق اكتىسى بىرلىككە, پاتريوتيزم مەن ىنتىماققا جەتە­لەيتىنىن اتاپ كورسەتتى. اكتسيا شەڭبەرىندە «ماڭگىلىك ەل» يدەياسىنا قاتىستى تىلەك­تەر جا­­زىلعان كىتاپقا سولتۇستىك­قا­زاق­ستان­­دىقتار دا ىستىق ىقىلاستى لەبىز­دەرى مەن قولتاڭبالارىن قال­دىردى. سالتاناتتى شارا ءان مەن بيلەرگە جالعاسىپ, كەش شىرايىن اشا ءتۇستى. ونىڭ سوڭى مەملەكەتتىك ءانۇراننىڭ ورىندالۋىمەن ءتۇيىن­دەلدى. «ماڭگىلىك ەل» يدەياسىن قول­داۋ­عا ارنالعان پاتريوتتىق اكتسيا­نىڭ كەزەكتى ەستافەتاسىن قىزىل­وردا مەن پاۆلودار وبلىستارى قابىلداپ الدى. ءومىر ەسقالي, «ەگەمەن قازاقستان». سولتۇستىك قازاقستان وبلىسى. –––––––––––––––– سۋرەتتى تۇسىرگەن امانگەلدى بەكمۇراتوۆ.