شىمكەنت – ەلىمىزدەگى ءىرى قالالار ساپىنداعى ءورىسىن كەڭگە جايعان, حالقى شاعىن جانە ورتا كاسىپكەرلىكتىڭ كوزىن تاپقان, ەكونوميكاسى دامىعان, باستىسى, بۇگىننەن بولاشاعى جارقىن شىرايلى شاھارلاردىڭ ءبىرى. ستاتيستيكالىق دەرەك بويىنشا, وڭتۇستىك قازاقستان وبلىسىندا 2,7 ملن.-نان استام تۇرعىن بار, سونىڭ 850 مىڭعا جۋىعى شىمكەنتتە تۇرادى.
2012 جىلى بەكىتىلگەن باس جوسپارعا ساي, قالا اۋماعى كەڭىپ, جاڭا اكىمشىلىك ءىسكەرلىك ورتالىقتىڭ قۇرىلىسى قارقىندى جۇرگىزىلۋدە. ۇلتىمىزدىڭ ۇيىتقىسى اتانعان ءوڭىردىڭ جاعىمدى يميدجىن, الەۋمەتتىك-ەكونوميكالىق جەتىستىكتەرىن, ينۆەستيتسيالىق الەۋەتىن تانىتۋدا شىمكەنت قالاسىنىڭ ورنى بولەك.
وڭتۇستىك قازاقستانعا جاساعان جۇمىس ساپارىندا مەملەكەت باسشىسى ن.ءا.نازارباەۆ: «شىمكەنت − ساۋلەتتى قالا. تاريحقا تۇنىپ تۇر. استانا, الماتىدان كەيىنگى قازاقستاننىڭ ءۇشىنشى قالاسى − شىمكەنت دەگەندى مەن بۇرىن دا ايتقانمىن. حالقىنىڭ سانى 1 ميلليونعا جەتەرلىك قالانىڭ كوركى بۇگىنگىسىنەن دە كوركەم بولادى!» دەگەن ەدى. بۇگىندە وسى ءبىر ءسوز شىندىققا اينالدى. سوڭعى جىلدارى شىمكەنت قالاسىن اباتتاندىرۋ, كوگالداندىرۋ ماقساتىندا جۇيەلى جۇمىستار جاسالدى. ناتيجەسىندە اباي, جەڭىس, ورتالىق ساياباقتارى مەن دەندروساياباق كۇردەلى جوندەۋدەن ءوتىپ, جاڭعىرتىلدى. ەل تاۋەلسىزدىگىنىڭ 20 جىلدىعى قارساڭىندا جاڭا تاۋەلسىزدىك ساياباعى سالىندى. «داڭق», «وتان-انا», «مەملەكەتتىك رامىزدەر الاڭى» سياقتى بىرقاتار ساۋلەتتىك نىساندار بوي كوتەردى.
وتكەن جىلى جاڭا اكىمشىلىك-ىسكەرلىك ورتالىقتا «وتىرار» كىتاپحاناسى مەن كورمە ورتالىعى پايدالانۋعا بەرىلدى. «ناۋرىز» الاڭى اشىلىپ, س.بايتەرەكوۆتىڭ ەسكەرتكىشى بوي كوتەردى. بەس مىڭ ورىندىق ورتالىق مەشىتتىڭ قۇرىلىسى اياقتالدى.
بۇگىندە قالا اۋماعىنداعى بادام, قوشقاراتا وزەندەرى ماڭىن اباتتاندىرۋ, كورىكتەندىرۋ جۇمىستارى جالعاسۋدا.
ورالحان ءداۋىت,
«ەگەمەن قازاقستان».
وڭتۇستىك قازاقستان وبلىسى.
