ءالى ەسىمىزدە, 2010 جىلى وزبەكستان استاناسىندا الەم چەمپيوناتى دۇركىرەپ وتكەن ەدى. ءبىز دە سول جارىستىڭ كۋاسى بولدىق. ءدۇبىرلى دودادا قازاقستاننىڭ ەرلەر مەن ايەلدەر قۇرامالارى 2 التىن, 1 كۇمىس جانە 5 قولا مەدالدى يەلەنىپ, جالپىكوماندالىق ەسەپتە ءۇشىنشى ورىنعا تۇراقتادى. جەرلەستەرىمىز تەك رەسەي مەن بەلارۋستەن عانا قالىپ قويدى. تاشكەنت تورىندە ەربولات بايباتىروۆ پەن ازامات مۇقانوۆ التىن السا, ءاليا جىلقىباەۆا كۇمىسپەن كۇپتەلدى. ال ارسەن حاتيپ, سايات شامشيەۆ, لينارا مەڭعازوۆا, ءالميرا يساتاەۆا جانە انار سەيتىمەتوۆا قولاعا جۇلدەگە يەلىك ەتتى.
سودان بەرى 11 جىل ءوتتى. سامبو كۇرەسىنىڭ اكادەميگى سانالعان اتاقتى باپكەر كەرەي قويشىبەكتىڭ تۇسىنداعى سول تابىسىمىزدى قايتالاۋعا قازىر دە جاقسى مۇمكىندىك بار. سەبەبى بۇگىنگى تاڭدا ۇلتتىق قۇراما ساپىنا ىلىككەن جىگىتتەر مەن قىزداردىڭ اراسىندا وسالى جوق. بارلىعى دا تالاي ءىرى دۇرمەكتە ىسىلعان ساقا سپورتشىلار. ەرلەر اراسىندا نۇربول سەرىكوۆ پەن بولاتبەك رايىمقۇلوۆقا ەرەكشە سەنىم ارتىلۋدا. ولاردىڭ ەكەۋى دە باتىس قازاقستان وبلىسىنىڭ تۇلەكتەرى. 71 كيلو سالماقتا سايىسقا تۇسكەلى وتىرعان سەرىكوۆ 2018 جىلى الەم مەن ازيا چەمپيوناتتارىندا قارسىلاس شاق كەلتىرمەي, باس جۇلدەنى قانجىعاسىنا بايلادى. 58 كيلو سالماقتاعى رايىمقۇلوۆ سەۋلدە وتكەن دۇنيەجۇزىلىك دودادا كۇمىس مەدالدى موينىندا جارقىراتتى. نۇربول مەن بولاتبەكتىڭ تاعى باسقا دا تولىپ جاتقان اتاقتارى بار. وڭتۇستىك كورەيانىڭ استاناسىندا 64 كيلو سالماقتاعى قاراعاندىلىق راحات جاڭانيەتتىڭ دە اسىعى الشىسىنان ءتۇسىپ, قولا جۇلدەنى قورجىنعا سالدى. وسى جىگىتتەر تاشكەنتتەگى جارىستىڭ باستى فاۆوريتتەرىنىڭ ءبىرى سانالادى. بۇل بالۋانداردان بولەك, ايدىن دارتاەۆ (79 كيلو), ەركەبۇلان قالەش (88 كيلو), مارات بايكامۋروۆ (98 كيلو) جانە تەمىرلان كولباي (+98 كيلو) الداعى كۇندەرى بوز كىلەمگە شىعادى.
ايەلدەر قۇرامىنداعى ەڭ اتاقتى بالۋانىمىز ءدىلداش قۇرىشباەۆا ەكەنى داۋسىز. 72 كيلو سالماقتا بەلدەسىپ جۇرگەن الماتى وبلىسىنىڭ تۋماسى الەم چەمپيوناتىندا باقانداي بەس رەت جەڭىس تۇعىرىنا كوتەرىلدى. 2014 جىلى ناريتادا, 2019 جىلى سەۋلدە كۇمىس مەدالدى يەلەنسە, 2013 جىلى سانكت-پەتەربۋرگ, 2015 جىلى كاسابلانكا جانە 2016 جىلى سوفيادا قولا جۇلدەنى ەنشىلەدى. قۇرلىق بىرىنشىلىگىندە بەس مارتە توپ جاردى. 2018 جىلى جاكارتادا الاۋى تۇتانعان ازيا ويىندارىندا التىننان القا تاقتى. ءبىر سوزبەن ايتساق, قۇرىشباەۆا – كۇرەس ونەرىنىڭ جىلىك مايىن شاققان اككى بالۋان. ونىڭ قورجىنىندا تەك دۇنيەجۇزىلىك دودانىڭ باس جۇلدەسى عانا جوق. ءدىلداش سول ولقىلىقتىڭ ورنىن تاشكەنتتە تولتىرادى دەپ ۇمىتتەنەمىز.
65 كيلو سالماق دارەجەسىندە باق سىناپ جۇرگەن اجار سالىقوۆا وسىدان ەكى جىل بۇرىن سەۋلدە الەم چەمپيوناتىنىڭ قولا جۇلدەگەرى اتاندى. قازاق قىزىنىڭ ەندىگى ارمانى – التىن تۇعىرعا كوتەرىلۋ. ازيا ويىندارىنىڭ قولا جۇلدەگەرى ايجان جىلقىباەۆانىڭ دا الەۋەتى ماماندار تاراپىنان جوعارى باعالانۋدا. ول 50 كيلو سالماقتا كۇرەسەدى. سونىمەن قاتار, تاشكەنتتە مارجان بيزاق (59 كيلو), ازمان اماەۆا (80 كيلو) جانە ارايلىم ابەنوۆانىڭ (+80 كيلو) دا ونەرىن تاماشالايمىز.
جاۋىنگەرلىك سامبودان وتەتىن جارىستا نۇركەن دومباەۆ (58 كيلو), ادىلبەك سەيىسوۆ
(64 كيلو), امانجول نۇرالى ۇلى (71 كيلو), نۇرلان تۇرعانباەۆ (79 كيلو), ۋمار يانكوۆسكي (88 كيلو), رايحان ءمادي
(98 كيلو) جانە ماقسوت دايىرباەۆ
(+71 كيلو) ەل نامىسىن قورعايدى. جەكپە-جەككە شىعاتىن بۇل جىگىتتەر دە جارقىن جەڭىستەرىمەن ءوز جانكۇيەرلەرىن قۋانتادى دەپ ويلايمىز.
تاعى ءبىر ەرەكشە توقتالا كەتەتىن جايت, FIAS بيىلعى الەم چەمپيوناتىنا ارنايى جۇلدە تاعايىنداپ وتىر. تاشكەنتتە ول 231 000 اقش دوللارىن قۇرايدى. ياعني وسى جولى باس جۇلدەنى ولجالاعان بالۋانعا 4 مىڭ $ بەرىلەدى. كۇمىس العاندارعا 3 مىڭ $, ال قولاعا قول جەتكىزگەندەرگە 2 مىڭ $ تيەسىلى بولادى.
