ءار جىل سايىن ايەلدەر اراسىندا ۇزدىكسىز ءوتىپ تۇراتىن ءداستۇرلى تۋرنير بۇعان دەيىن فەدەراتسيا كۋبوگى دەپ اتالىپ كەلدى. بىلتىردان بەرى ول بيللي دجين كينگ كۋبوگى دەگەن اتاۋعا يە بولدى. بۇل ەسىم جانكۇيەرلەرگە جاقسى تانىس. امەريكالىق تەننيسشى وتكەن عاسىردىڭ 60-شى جانە 70-ءشى جىلدارى ءدۇبىرلى دودالاردا دارا تالانتىمەن وقشاۋلانىپ, كوپتەگەن تولاعاي تابىستارعا قول جەتكىزدى. كينگ «ۇلكەن دۋلىعا» ساناتىنداعى تۋرنيرلەردە 36 مارتە توپ جاردى. تارقاتىپ ايتساق, 12 رەت جەكەلەگەن باسەكەنىڭ جەڭىمپازى اتانىپ, 16 رەت جۇپتىق سايىستا دارا شىقتى. تاعى ءبىر مارتە ميكستە باس جۇلدەنى ولجالادى. WTA تۋرنيرلەرىن 67 رەت ۇتىپ, الەمنىڭ ءبىرىنشى راكەتكاسى اتانعان بيللي ءوز ءداۋىرىنىڭ دارا تۇلعالارىنىڭ ءبىرى بولدى.
اتالعان دودادا اقش قۇراماسى ەڭ كوپ ولجاعا كەنەلدى. امەريكالىقتار 18 جارىستا الدارىنا جان سالمادى. چەحيا 11 مارتە شاشاسىنا شاڭ جۇقتىرماسا, اۋستراليانىڭ اسىعى 7 رەت الشىسىنان ءتۇستى. سونداي-اق يسپانيا – 5, يتاليا مەن رەسەي – 4, فرانتسيا – 3, گەرمانيا – 2, بەلگيا, سلوۆاكيا جانە وار ءبىر-ءبىر رەتتەن تەڭدەسسىز دەپ تانىلدى.
جەكەلەگەن ويىنشىلار اراسىندا كريس ەۆەرتتىڭ شوقتىعى بيىك. ايگىلى امەريكالىق تەننيسشى ءوز كومانداسىمەن بىرگە كۋبوكتىڭ سەگىز مارتە يەگەرى اتاندى. بيللي دجين كينگ پەن روزماري كاسالس اقش قۇراماسىنىڭ ەڭ بيىك بەلەستەردەن كورىنۋىنە جەتى رەت وراسان زور ۇلەس قوستى. پەترا كۆيتوۆا مەن باربورا سترىتسوۆا سىندى تەننيسشىلەر چەحيانى التى تۋرنيردە ورگە سۇيرەدى. يسپانيالىق كونچيتا مارتينەس پەن ارانچا سانچەس-ۆيكاريو, چەحيالىق لۋتسيا گرادەتسكايا مەن لۋتسيا شافارجوۆا بەس مارتە ءدال سونداي قۇرمەتكە بولەندى. مىنە, اتالعان جارىستا ەڭ تابىستى ونەر كورسەتكەن ويىنشىلار وسىلار.
بيللي دجين كينگ كۋبوگى فينالىنا جولداما الۋ ءۇشىن قازاقستاننىڭ تەننيسشىلەرى گەرمانيامەن وينايدى. بۇل باسەكە كەلەسى جىلدىڭ 15-16 ءساۋىرى كۇندەرى نۇر-سۇلتاندا وتەدى. ەگەر جەرلەستەرىمىز جەڭىسكە جەتسە, وندا ءوز تاريحىمىزدا تۇڭعىش رەت الەمنىڭ ەڭ ۇزدىك كوماندالارىمەن كۇش سىناسۋ مۇمكىندىگىنە يە بولامىز. ال سول شەشۋشى تۇستا بىزبەن باسەكەلەسەتىن كوماندا جايىندا نە بىلەمىز؟
گەرمانيا قۇراماسى اتالعان جارىستىڭ تۇساۋى كەسىلگەن كەزدەن, ياعني 1963 جىلدان بەرى ۇزدىكسىز ونەر كورسەتىپ كەلەدى. سول 51 جىلدىڭ ىشىندە ولار 44 رەت الەمدىك توپتا وينادى. بارلىعى 141 كەزدەسۋ وتكىزىپ, 91 رەت جەڭىسكە جەتتى. قۇرامىندا شتەففي گراف پەن كلاۋديا كودە-كيلش سىندى مىقتى ويىنشىلارى بار نەمىستەر 1987 جىلى باس جۇلدەنى ولجالاسا, سول كورسەتكىشىن 1992 جىلى تاعى قايتالادى. ول كەزدە كوماندا نامىسىن شتەففي گرافتان بولەك, انكە حۋبەر مەن باربارا ريتتنەر قورعاعان ەدى. شەشۋشى تۇستا ولار العاشىندا اقش, ودان كەيىن يسپانيا قۇرامالارىن قاپى قالدىردى. ال 1966, 1970, 1982, 1983 جانە 2014 جىلدارى نەمىس قىزدارى اقتىق سايىستا ۇتىلدى.
بۇل كۇندەرى دە گەرمانيا قۇراماسى جەر-جاھانداعى ەڭ مىقتى كوماندالاردىڭ ساناتىندا. الەمدىك رەيتينگتە ولار 7-ورىندى يەلەنۋدە. نەمىستەردىڭ بۇگىنگى تاڭداعى ەڭ ۇزدىك ويىنشىسى 33 جاستاعى انجەليكا كەربەر ەكەنى داۋسىز. كەزىندە اقش پەن اۋستراليانىڭ اشىق بىرىنشىلىكتەرىن ۇتىپ, ۋيمبلدوندا توپ جارعان ول وسىدان بەس جىل بۇرىن عانا الەمدىك رەيتينگتىڭ كوش باسىندا تۇردى. قازىرگى كەزدە كەربەر WTA تىزىمىندە 16-ورىندى يەلەنۋدە. الەمدىك توپقا جولداما الۋ ءۇشىن ءبىزدىڭ قىزدارعا ەڭ ءبىرىنشى كەزەكتە وسى تەننيسشىنى تۇساۋلاۋ كەرەك.
گەرمانيانىڭ ەكىنشى راكەتكاسى 34 جاستاعى اندرەا پەتكوۆيچتىڭ ەڭ جاقسى كورسەتكىشى – رولان گارروستىڭ جارتىلاي فينالىنا دەيىن جەتىپ, WTA تۋرنيرلەرىندە جەتى رەت باس جۇلدەنى ولجالاۋى. تاسى ورگە دومالاپ تۇرعان كەزىندە پەتكوۆيچ «توپ-10» تەننيسشىنىڭ قاتارىنا ەنسە, بۇگىنگى تاڭدا ول 75-ورىندى ەنشىلەۋدە. سونىمەن قوسا, لاۋرا زيگەمۋند, دجۋلي نيمايەر جانە اننا-لەنا فريدزامدى دا اتاپ وتۋگە بولادى. ەسىمدەرى اتالعان نەمىس قىزدارىنىڭ بارلىعى دا «توپ-150» ويىنشىنىڭ ساناتىندا.
قازاقستان قۇراما كومانداسىنىڭ مۇشەلەرى اراسىندا ەلەنا رىباكينانىڭ قارقىنى ايتارلىقتاي. قازىرگى كەزدە جەرلەسىمىز الەمنىڭ 14-راكەتكاسى اتانىپ وتىر. ەلەنا پۋتينتسەۆا 42-ورىنعا جايعاسسا, زارينا دياس 97-ساتىعا تۇراقتادى. نۇر-سۇلتاندا وتەتىن جارىستا وسى ۇشەۋىنە ەرەكشە سەنىم ارتىلادى. جاستار بۋىنى اراسىنان اننا دانيلينانىڭ اياق الىسى جامان ەمەس. ازىرگە ول WTA رەيتينگىندە 340-ورىندا تۇرعانىمەن, بىرتە-بىرتە شەبەرلىگى شىڭدالىپ كەلە جاتىر دەۋگە نەگىز بار.
