بالا قۇقى قورعالادى

كەشە اسحات داۋىلباەۆتىڭ توراعالىعىمەن باس پروكۋراتۋرانىڭ القا ءماجىلىسى ءوتتى. وندا جەتىم بالالاردى جانە اتا-اناسىنىڭ قامقورلىعىنسىز قالعان بالالاردى اسىراپ الۋ, سونىڭ ىشىندە شەتەلدىك ازاماتتاردىڭ اسىراپ الۋىنىڭ ءتارتىبى تۋرالى زاڭنامالاردىڭ ساقتالۋىنا مەملەكەتتىك ۋاكىلەتتىك ورگانداردىڭ 2012-2013 جىلعى قىزمەتىنە جۇرگىزىلگەن تەكسەرۋ قورىتىندىلارى تالقىلاندى. باس پروكۋرور «قازاقستان-2050» ستراتەگياسىندا مەملەكەت باسشىسى ءاربىر بالانىڭ قۇقىعىن قورعاۋدى, سونداي-اق جەتىمدەردى اسىراپ الۋدى قولداۋدى مەملەكەت پەن قوعامنىڭ ماڭىزدى مىندەتتەرى رەتىندە بەلگىلەگەنىنە توقتالدى.سوڭعى 15 جىل كولەمىندە رەسپۋبليكادا 50 مىڭنان استام بالا اسىراپ الىنعان, ولاردىڭ 41 مىڭنان استامىن قازاقستاندىق وتباسىلار, 9 مىڭعا جۋىعىن شەتەلدىك ازاماتتار اسىراپ العان. سوڭعى جىلدارى اسىراپ الۋ راسىمىنە ساۋدانىڭ جانە قىلمىستىڭ ارالاسۋ ۇدەرىسى, كامەلەتكە جاسى تولماعانداردى ساتۋ فاكتىلەرى بايقالىپ وتىر. وتكەن جىلى بالا ساۋداسى فاكتىلەرى بويىنشا 25 قىلمىس انىقتالعان. كەيىنگى ەكى جىل ىشىندە زاڭمەن بەلگىلەنگەن ءتارتىپتى اينالىپ ءوتىپ, بالا اسىراپ الۋعا ەسەپتە تۇرماعان ادامدار 457 بالانى اسىراپ العان. الەۋەتتى اسىراپ الۋشىلار رەسمي راسىمدەردەن وتپەستەن, بالانى تىكەلەي اسىراپ الۋدى ءجون كورىپ, قاساقانا زاڭ بۇزۋعا بارادى. سونىمەن قاتار, 1858 جەتىمدى ورتالىقتاندىرىلعان ەسەپتەن الىپ تاستاعان قامقورشىلىق جانە قورعانشىلىق ورگانداردىڭ لاۋازىمدى تۇلعالارىنىڭ كىنالارىنان بالالار اسىراپ الىنۋ جانە وتباسىنا يە بولۋ مۇمكىندىگىنەن ايىرىلعان. ال قاراعاندى جانە الماتى وبلىس­تارىندا بالالاردى ناركولوگيالىق ەسەپتە تۇرعان, پسيحيكالىق اۋرۋلارى بار جانە وتەلمەگەن سوتتىلىعى بار ادامدارعا اسىراپ الۋعا بەرگەن شەكتەن شىققان جاعدايلار انىقتالدى. بالا اسىراپ العان وتباسىلارداعى, اسىرەسە, شەتەلدەردەگى بالالاردىڭ ءومىر ءسۇرۋ جاعدايىن ءتيىستى ەسەپكە الۋ جانە ولارعا باقىلاۋ جۇرگىزۋ قامتاماسىز ەتىلمەگەن. جەرگىلىكتى اتقارۋشى ورگانداردىڭ جانە شەتەلدەردەگى مەكەمەلەردىڭ ءتيىستى باقىلاۋىنىڭ بولماۋىنان اسىراپ الۋشىلار 305 مىڭ بالانىڭ ءومىر ءسۇرۋ جاعدايى تۋرالى ەسەپ بەرمەگەن, شەتەلدىك ازاماتتارعا اسىراپ الۋعا بەرىلگەن 673 قازاقستاندىق بالانىڭ تاعدىرى بەلگىسىز كۇيىندە قالىپ وتىر. وسى ماقساتتاردا ەڭ الدىمەن اسىراپ الۋ ءراسىمىن زاڭنامالىق وڭايلاتۋ, بالانى ەشبىر ارتىق فورماليزم جانە ءسوزبۇيداسىز وتباسىعا انىقتاۋعا مۇمكىندىك بەرەتىن ناقتى جانە تۇبەگەيلى ولشەمدەر ءتىزىلىمىن ازىرلەۋ تۋرالى باستاما كوتەرۋ ۇسىنىلدى. «ەگەمەن-اقپارات».