كەزىندە قازاق ەلىنىڭ بالۋاندارى ءدۇبىرلى دودالاردا سان مارتە توپ جارىپ, ميلليونداعان جانكۇيەردىڭ قوشەمەتىنە بولەنگەنى بارشاعا ءمالىم. اسىرەسە, گرەك-ريم كۇرەسى شەبەرلەرىنىڭ قارقىنى وتە كۇشتى ەدى. ءبىزدىڭ ەلدەن وليمپيا ويىندارىنىڭ جەڭىمپازدارى مەن الەم چەمپيوندارى كوپتەپ شىقتى. ال قازىر قولا مەدالعا قولىمىز جەتسە, سونىڭ وزىنە كادىمگىدەي قۋاناتىن بولدىق. ارينە, قازاقستان سەكىلدى بالۋاندىق ونەردە باي ءداستۇرى بار ىرگەلى مەملەكەت ءۇشىن بۇل تىم ۇيات جاعداي. ءتىپتى «ەلدىگىمىزگە سىن» دەسەك تە, ەشكىم دە ايىپقا بۇيىرا قويماس.
كۇنى كەشە عانا سەربيانىڭ استاناسى – بەلگرادتا «بەلەكسپوتسەنتر» سپورت كەشەنىندە 23 جاسقا دەيىنگى بالۋاندار اراسىندا الەم چەمپيوناتى (U-23) ءوتتى. بۇل جارىستا دا جەرلەستەرىمىز سەنىم ۇدەسىنەن شىعا المادى. ماسەلەن, گرەك-ريم كۇرەسى بويىنشا 10 بالۋانىمىز باق سىنادى. سولاردىڭ ەكەۋى عانا جۇلدەلى ورىندار ءۇشىن تالاستى. ولار – اسلان ابدۋراحمانوۆ (55 كگ) پەن سۇلتان اسەت ۇلى (67 كگ). بىراق قولا مەدال ءۇشىن تارتىستا ولاردىڭ جولى بولمادى. ەكەۋى دە تۇركيانىڭ تاستۇلەكتەرىنە ەسە جىبەردى. اسلان ادەم بۋراك ۋزىننان جەڭىلسە, سۇلتان كادىر كەمالدىڭ وسال تۇسىن تابا المادى.
اتالعان كۇرەس ءتۇرى بويىنشا رەسەيدىڭ ەكىپىنە ەشكىم شىداي المادى. ولار 4 التىن, 1 كۇمىس جانە 4 قولا مەدالدى يەلەنىپ, جالپىكوماندالىق ەسەپتە كوش باستادى. 2 التىنى مەن
1 قولاسى بار گرۋزيا ەكىنشى ورىندى ولجالادى. ءۇشىنشى ورىندا – يران. پارسى ەلىنىڭ اپايتوستەرى 1 التىن 4 كۇمىس جانە 2 قولانى قورجىنعا سالدى. سونداي-اق ماجارستان (1+1+1), ازەربايجان (1+0+2 قولا) جانە گەرمانيا (1+0+0) قۇرامالارى باس جۇلدەنى ەنشىلەدى.
گرەك-ريم كۇرەسىنەن الەم چەمپيونى اتانعان بالۋاندار: 50 كگ – انۆار اللاحياروۆ (رەسەي), 55 كگ – ماۆلۋد ريزمانوۆ (رەسەي), 63 كگ – لەرري ابۋلادزە (گرۋزيا), 67 كگ – حاسرار جافاروۆ (ازەربايجان), 72 كگ – يدريس يباەۆ (گەرمانيا), 77 كگ – تاماش لەۆاي (ماجارستان), 82 كگ – ايۆەنگو ريكادزە (گرۋزيا), 87 كگ – الەكساندر كوماروۆ (رەسەي), 97 كگ – ارتۋر سارگسيان (رەسەي) جانە 130 كگ – امين ميرزازادە (يران).
ايەلدەر كۇرەسىنەن وتكەن جارىستا وتانداستارىمىزدىڭ دەنى باستاپقى باسەكەلەرىندە ءسۇرىندى. تەك 55 كگ سالماقتاعى اينۇر ءاشىموۆا مەن ءدىلناز مۇلكىنوۆانىڭ عانا جەڭىس تۇعىرىنا كوتەرىلۋگە جاقسى مۇمكىندىكتەرى بولدى. بىراق ولار شەشۋشى تۇستا جەڭىلىستىڭ كەرمەك ءدامىن تاتتى. قولا مەدال ءۇشىن بەلدەسۋدە اينۇر تۇركيالىق ەدا تەكينگە ءبىر عانا ۇپاي ايىرماشىلىعىمەن ۇتىلسا, ءدىلناز كولۋمبيالىق تاتيانا رەنتەريگە جول بەردى.
قىزدار باسەكەسىندە ۋكراينا وكىلدەرىنىڭ مىسى باسىم بولدى. ولار 4 التىن, 2 كۇمىس جانە 2 قولا مەدالدى ولجالادى. بالقان تۇبەگىندە فرانتسيا (1+1+0), كانادا (1+0+1), اقش (1+0+1), رۋمىنيا (1+0+1), ەكۆادور (1+0+0), پولشا جانە قىرعىزستاننىڭ دا (1+0+1) ءانۇراندارى شىرقالدى.
ايەلدەر كۇرەسىنەن الەم چەمپيونى اتانعان بالۋاندار: 50 كگ –ەمەلي شيلسون (اقش), 53 كگ – لۋتسيا گۋزمان (ەكۆادور), 55 كگ – اندرەيا بەاتريس انا (رۋمىنيا), 57 كگ – الينا اكوبيا (ۋكراينا), 59 كگ – انگەلينا لىساك (ۋكراينا), 62 كگ – انا پاۋلا گونزالەس (كانادا), 65 كگ – اناستاسيا لاۆرەنچۋك (ۋكراينا), 68 كگ – كۋمبا لارروك (فرانتسيا), 72 كگ – اناستاسيا الپەەۆا (ۋكراينا) جانە 76 كگ – ايپەري مەدەتكىزى (قىرعىزستان).
جارىستى ەركىن كۇرەس شەبەرلەرى قورىتىندىلادى. سەربياعا اتتانعان 10 بالۋانىمىزدىڭ بىرەۋى عانا جەڭىس تۇعىرىنا كوتەرىلدى. ول – اسىل ايتاقىن. 61 كگ سالماق دارەجەسىندە كۇش سىناسقان جالىندى جاس العاشقى اينالىمداردا مولدوۆالىق ۆاديم بەرەگوي مەن ۋكراينالىق كاميل كەريمدى قاپى قالدىرعانىمەن, جارتىلاي فينالدا ارمەنيالىق ارتەم حارۋتيۋنيانعا ەسە جىبەردى. ودان كەيىن ماجارستاندىق گامزاتگادجي حاليدوۆتان ايلاسىن اسىرعان اسىل الەم چەمپيوناتىنىڭ قولا جۇلدەگەرى اتاندى.
بالقان تۇبەگىندە ءبىز قازاقستاننىڭ ۇلتتىق قۇراما كومانداسىنىڭ مۇشەسى, الەم چەمپيوناتى مەن دۇنيەجۇزىلىك اسكەريلەر ويىندارىنىڭ كۇمىس جۇلدەگەرى, ازيانىڭ ەكى دۇركىن چەمپيونى نۇرقوجا قايپانوۆقا زور سەنىم ارتقان ەدىك. بىراق تالاي دۇرمەكتى كورگەن بەلدى بالۋان بەلگرادتا ايشىقتى كۇرەسە المادى. 74 كگ سالماقتا بەلدەسكەن نۇرقوجا جارىستى وتە جاقسى باستاعانىمەن, ەكىنشى كەزەڭدە ارمەنيالىق حرايار اليكحانياننان ۇتىلىپ, كورەرمەندەر قاتارىنا قوسىلدى.
ەركىن كۇرەستە دە رەسەي قۇراماسىنا تەڭ كەلەر كوماندا تابىلمادى. ولار 2 التىن, 3 كۇمىس جانە 1 قولانى ەنشىلەدى. ەكىنشى ورىندا – ازەربايجان. قاپ تاۋىنىڭ قىراندارى 2 التىن مەن 1 قولانى قانجىعالارىنا بايلادى. سونداي-اق التىن تۇعىرعا كوتەرىلگەندەر قاتارىندا يران (1+2+5), ارمەنيانىڭ (1+1+3), قىرعىزستان مەن گرەكيانىڭ (1+1+0) جانە اقش پەن ۋكراينانىڭ (1+0+1) جالىندى جاستارى بار.
ەركىن كۇرەستەن الەم چەمپيونى اتانعان بالۋاندار: 57 كگ – اليابباس رزازادە (ازەربايجان), 61كگ – ارتەم حارۋتيۋنيان (ارمەنيا), 65 كگ – گەورگيوس پەليديس (گرەكيا), 70 كگ – ەرنازار اكماتاليەۆ (قىرعىزستان), 74 كگ – چەرمەن ۆاليەۆ (رەسەي), 79 كگ – ماگومەد ماگوماەۆ (رەسەي), 86 كگ – مۋحامەد اليەۆ (ۋكراينا), 92 كگ – وسمان نۋرماگومەدوۆ (ازەربايجان) جانە 125 كگ – ەنتوني لاۆرەنتسە كاسسيوپپي (اقش).
