ءابسوليۋتتى الەم چەمپيونى اتاعى ءۇشىن تارتىستىڭ العاشقى ءۇش راۋندىندا اقش بوكسشىسى ءسال عانا باسىمدىق تانىتقانداي كورىندى. دەسەك تە بىرتە-بىرتە «كانەلو» تىزگىندى ءوز قولىنا الدى. پلانتتىڭ قارىمتا شابۋىلعا جۇگىنۋدەن باسقا امالى قالمادى. بىراق مەكسيكالىق مارعاسقا قارقىنىن كۇشەيتكەن سايىن جەرگىلىكتى بوكسشى ءجيى قاتەلىككە ۇرىنا باستادى. 11-راۋندتا الۆارەستىڭ سول قولى قارسىلاسىنا ءدوپ ءتيدى. تورەشى ەسەپ اشتى. سوققىنىڭ قاتتى بولعانى سونشالىق, پلانت ورنىنان ازەر تۇردى. قارسىلاسىنىڭ ءالى دە ەسىن جيا الماي تۇرعانىن بايقاعان ساۋل تەگەۋرىنىن ودان ءارى كۇشەيتتى. ونىڭ تاعى ءبىر ەكپىندى شابۋىلىنان كەيىن امەريكالىق بوكسشى قايتا قۇلادى. بۇل جولى تورەشى جەكپە-جەكتى توقتاتتى. وسىلايشا, ساۋل الۆارەس الەمنىڭ ءابسوليۋتتى چەمپيونى اتاندى.
بۇل – 31 جاستاعى «كانەلونىڭ» كاسىپقوي رينگتەگى 60-شى جەكپە-جەگى. سونىڭ 57-ءسىن ول جەڭىسپەن اياقتاپ, 39 قارسىلاسىن ەسىنەن تاندىردى. ءبىر رەت ۇتىلىپ, تاعى ەكى كەزدەسۋ تەڭ اياقتالدى. ال 22 رەت شارشى الاڭعا كوتەرىلگەن پلانت كەشە العاش رەت جەڭىلىستىڭ كەرمەك ءدامىن تاتتى. وسىعان دەيىن ول 12 باسەكەنى مەرزىمىنەن بۇرىن اياقتاپ, 9 كەزدەسۋدە تورەشىلەردىڭ شەشىمى بويىنشا جەڭىسكە جەتكەن ەدى.
