ايتۋلى تۋرنيرگە جولداما الۋدىڭ ءوزى وڭاي شارۋا ەمەس. وسى مەجەگە جەتۋ ءۇشىن قازاقستان قۇراماسىنا دا ءبىراز تەر توگۋگە تۋرا كەلدى. ىرىكتەۋ سىنىنان سۇرىنبەي وتكەن قىزدارىمىز بيىل ءساۋىر ايىندا ۇيىمداستىرىلعان پلەي-وفف سايىسىندا ارگەنتينا تەننيسشىلەرىمەن شەبەرلىك بايقاستى. اسا تارتىستى وتكەن باسەكەدە ءبىزدىڭ قىزدار 3:2 ەسەبىمەن جەڭىسكە جەتتى. ەندى شەشۋشى ويىندا گەرمانيامەن كۇش سىناسامىز. بۇل كەزدەسۋ كەلەسى جىلدىڭ 15-16 ساۋىرىندە نۇر-سۇلتاندا وتەدى. ەگەر جەرلەستەرىمىز جەڭىسكە جەتسە, وندا ءوز تاريحىمىزدا تۇڭعىش رەت بيللي دجين كينگ كۋبوگىنىڭ فينالدىق بولىگىندە ونەر كورسەتۋ قۇرمەتىنە يە بولامىز.
وزگە باسەكەلەر مىنا كوماندالار اراسىندا وتەدى: اۋستراليا – سلوۆاكيا, فرانتسيا – يتاليا, اقش – ۋكراينا, چەحيا – ۇلىبريتانيا, بەلارۋس – بەلگيا, كانادا – لاتۆيا, يسپانيا – نيدەرلاند جانە رۋمىنيا – پولشا.
