– ءبىزدىڭ جوبامىزدىڭ ەرەكشەلىگى – ەكولوگيالىق تۇرعىدان تازا ءونىم ەكەنىندە. كۇندەلىكتى تۇرمىستا قولدانىپ جۇرگەن پوليەتيلەن پاكەتتەردىڭ جويىلۋىنا 100 جىلدان اسا ۋاقىت كەرەك. ال ءبىزدىڭ ءونىمىمىز ءۇش جىلدىڭ ىشىندە قاراشىرىككە اينالىپ كەتەدى. ال ەگەر قىشقىلدىق ورتاعا تۇسەر بولسا ون مينۋتتا جويىلادى, – دەيدى بىرنەشە سىناق جۇمىستارىن جۇرگىزگەن ەرنار مەن اسيا.
زياتكەرلەردىڭ ايتۋىنشا, العاشىندا مەكتەپ اينالاسىنداعى ارامشوپتەردى كادەگە جاراتۋ قاجەتتىلىگى بايقالعان. كەيىن ۇستازدارىمەن ويلانا كەلە بيوپلاستيك جاساپ كورۋگە بەل بايلاعان.
– ءبىز ءارامشوپتى يكەمدى ەتۋ ءۇشىن بىرنەشە قولجەتىمدى قوسپالاردى قوستىق. كۇندەلىكتى تۇرمىستا قولدانىپ جۇرگەن كراحمال, بوياعىش, جاعىمسىز ءيىستى جويۋ ءۇشىن حوش ءيىس قوسپالارىن دا قوستىق, – دەيدى ەرنار ومىرزاق.
سونداي-اق وقۋشىلار بيوپاكەتتىڭ تىعىزدىعىن ءارتۇرلى دەڭگەيدە جاساۋعا بولاتىنىن ايتتى.
– قازىرگى پاكەتىمىز 500 گرامعا دەيىن كوتەرە الادى جانە بىرنەشە تۇستە بار. ءبىزدىڭ ەسەپتەۋىمىز بويىنشا تەحنولوگيانى اۆتوماتتاندىرعان جاعدايدا ءبىر ءونىمنىڭ قۇنى 30 تەڭگەگە شىعادى. الداعى ۋاقىتتا جوبامىزدىڭ اۆتورلىق قۇقىعىن قورعاپ, نارىققا شىعارعىمىز كەلەدى, – دەيدى اسيا تەدجەن.
زەرتتەۋشىلەر قازىرگى تاڭدا پروتسەستى اۆتوماتتاندىرۋ ستانوگىنىڭ مەحانيزمىن دايىنداۋ ۇستىندە. سونىمەن قاتار ستانوكتى جاساۋعا تەحنيكالىق كومەك كورسەتۋگە دايىن كوماندا ىزدەپ جاتىر.
نازارباەۆ زياتكەرلىك مەكتەپتەرى جەلىسىندە قاراشانىڭ 1-ءى مەن 5-ءى ارالىعىندا عىلىمي جوبالار بايقاۋى ءوتىپ جاتىر. اقتاۋداعى نازارباەۆ زياتكەرلىك مەكتەبىنەن 12 جوبا قاتىسۋدا. ەرنار مەن اسيانىڭ بۇل جوباسى دا رەسپۋبليكالىق بايقاۋدا سىنعا تۇسەدى.
ماڭعىستاۋ وبلىسى
