دەۆيس كۋبوگىنىڭ رەيتينگىندە وسى ۇشتىكتىڭ اراسىندا كانادا قۇراماسى بارىنەن جوعارى تۇر. قازىرگى كەزدە ولار 7-ورىندى يەلەنۋدە. ۇيەڭكى جاپىراقتار ەلىنىڭ وكىلدەرى الەمدىك توپتا توعىز مارتە ونەر كورسەتتى. وزدەرىنىڭ ەڭ زور تابىسىنا 2019 جىلى قول جەتكىزدى. وسىدان ەكى جىل بۇرىن يسپانيانىڭ استاناسى – مادريدتە وتكەن جارىستىڭ توپتىق سايىسىندا اقش پەن يتاليانى جولىنان ىعىستىرعان كانادالىقتار شيرەك فينالدا اۋستراليانى ۇتتى. جارتىلاي فينالدا رەسەيدەن باسىم ءتۇستى. پلەي-وففتاعى كەزدەسۋلەردىڭ ەكەۋى دە 2:1 ەسەبىمەن اياقتالدى. بىراق فينالدا يسپانياعا ەسە جىبەردى – 0:2. وسىلايشا, قۇرامىندا فەليكس وجە-الياسسيم, دەنيس شاپوۆالوۆ جانە ۆاشەك پوسپيشيل بار كانادا قۇراماسى ايتۋلى جارىستا ەكىنشى ورىندى يەلەندى.
پيرەنەي تۇبەگىندە تولاعاي تابىسقا قول جەتكىزگەن ۇيەڭكى جاپىراقتار ەلى بيىلعى جارىستا دا ءدال سول سەركە ويىنشىلارىنا سەنىم ارتۋدى قۇپ كورىپ وتىر. بۇگىنگى تاڭدا وسى مەملەكەتتىڭ ەڭ ۇزدىك تەننيسشىلەرى – فەليكس وجە-الياسسيم مەن دەنيس شاپوۆالوۆ. الەمدىك رەيتينگتە ەكەۋى قاتار تۇر: فەليكس – 12, دەنيس 13-ورىندا. مونرەال قالاسىنىڭ تۋماسى وجە-الياسسيم نەبارى 21 جاستا. سوعان قاراماستان ول سوڭعى ۋاقىتتا ايشىقتى ونەرىمەن كوزگە ءتۇسىپ ءجۇر. بيىل فەليكس اۋستراليانىڭ اشىق بىرىنشىلىگىنىڭ ءتورتىنشى كەزەڭىندە ويناسا, ۋيمبلدوننىڭ شيرەك فينالىنا شىقتى. ال US وpen سايىسىندا جارتىلاي فينالعا دەيىن جەتتى.
دەنيس شاپوۆالوۆ تا – جاستار بۋىنىنىڭ وكىلى. ونىڭ اكە-شەشەسى كەڭەس وداعىندا تۋىپ, كەيىننەن يزرايلگە قونىس اۋداردى. دەنيس سول جاقتا دۇنيەگە كەلدى. ارادا ءبىراز جىل وتكەن سوڭ شاپوۆالوۆتار وتباسى كاناداعا كوشتى. ال دەنيستىڭ ەڭ ۇزدىك ناتيجەسى – بيىل ۋيمبلدوننىڭ جارتىلاي فينالىنا جولداما الۋى. بىلتىر ول اقش-تىڭ اشىق بىرىنشىلىگىنىڭ شيرەك فينالىندا كۇش سىناستى.
اتر رەيتينگىندە 85-ورىندا تۇرعان ۆاشەك پوسپيشيل – چەحيانىڭ تۋماسى. 31 جاستاعى ساقا سپورتشىنىڭ جۇلدىزدى ساتتەرى ارتتا قالعانىمەن, ءالى دە ءتۇرلى تۋرنيرلەرگە قاتىسىپ, ايتارلىقتاي تابىستارعا قول جەتكىزىپ ءجۇر. اسىرەسە, ول – جۇپتىق ويىننىڭ حاس شەبەرى. كەزىندە پوسپيشيل امەريكالىق دجەك سوكپەن بىرگە ۋيمبلدون تۋرنيرىندە توپ جاردى. سونداي-اق كانادا قۇراماسى ساپىندا برايدەن شنۋر (اتر-ءدىڭ جۇپتار رەيتينگىندە 226-ورىندا) مەن پيتەر پولانسكي (اتر رەيتينگىندە 284-ورىندا) سەكىلدى ويىنشىلار بار.
شۆەتسيا قۇراماسى دەۆيس كۋبوگىنىڭ الەمدىك توبىندا اقش جانە چەحيامەن بىرگە 31 مارتە ونەر كورسەتتى. بۇل – رەكوردتىق كورسەتكىش. ولار 12 رەت فينالعا شىعىپ, سونىڭ جەتەۋىندە جەڭىمپاز اتاندى. اتاپ ايتساق, شۆەدتەر 1975, 1984, 1985, 1987, 1994, 1997 جانە 1998 جىلدارى شاشالارىنا شاڭ جۇقتىرمادى. بىراق سوڭعى كەزدەرى ولار دۇنيەجۇزىلىك رەيتينگتە 14-ورىندى قاناعات تۇتۋدا.
ءيا, كەزىندە سكانديناۆيا تۇبەگىنەن بورن بورگ, ماتس ۆيلاندەر, يواكيم نيۋسترەم, اندرەس پەر يارريد, ستەفان ەدبەرگ, يوناس لارس بوركمان, توماس ەنكۆيست جانە تاعى باسقا ساڭلاقتاردىڭ كوپتەپ شىققانىن جانكۇيەرلەر جاقسى بىلەدى. سولاردىڭ ءبىرازى «ۇلكەن دۋىلعا» ساناتىنداعى تۋرنيرلەردى سان مارتە ۇتىپ, بىرەر جىلدار بويى الەمدىك رەيتينگتە جەكە-دارا كوش باستادى. بىراق ءححى عاسىر تابالدىرىقتان اتتاعاننان كەيىن شۆەتسيا تەننيسى توقىراۋعا ۇشىرادى. كۇنى بۇگىنگە دەيىن ولار سول ولقىلىقتىڭ ورنىن تولتىرا الماي كەلەدى. بۇگىنگى تاڭدا ايتۋلى ەلدىڭ ەڭ ۇزدىك ويىنشىسى 23 جاستاعى ميكاەل يمەر اتر تىزىمىندە 101-ورىندى ەنشىلەۋدە. ونىڭ اعاسى ەلياس يمەر 168-ساتىعا جايعاسقان. اندرە يورانسسون (اتر-ءدىڭ جۇپتار رەيتينگىندە 66-ورىندا) مەن دجوناتان مريدحانىڭ (اتر رەيتينگىندە 551-ورىندا) كورسەتكىشتەرى دە كوڭىلدەگىدەي ەمەس.
بۇگىنگى تاڭدا دەۆيس كۋبوگىنىڭ رەيتينگىندە 17-ورىندى يەلەنىپ وتىرعان قازاقستان قۇراماسى دا پيرەنەي تۇبەگىندە قانداي قۇرامدا ونەر كورسەتەتىنىن جاريا ەتتى. قازىرگى كەزدەگى وتانداستارىمىزدىڭ اراسىنداعى ەڭ ۇزدىك ويىنشى الەكساندر بۋبليك ەكەنى ءمالىم. 24 جاستاعى تەننيسشى ۇزدىكتەر تىزىمىندە 34-ورىندى يەلەنۋدە. تاجىريبەلى ميحايل كۋكۋشكين مەن دميتري پوپكوعا دا زور سەنىم ارتىلىپ وتىر. العاشقىسى اتر رەيتينگىندە 159-ورىنعا تۇراقتاسا, ەكىنشىسى 162-ورىندى ەنشىلەۋدە. جۇپتىق باسەكەدە اندرەي گولۋبەۆ (اتر-ءدىڭ جۇپتار رەيتينگىندە 35-ورىندا) پەن الەكساندر نەدوۆەسوۆ (اتر-ءدىڭ جۇپتار رەيتينگىندە 76-ورىندا) ونەر كورسەتەدى دەپ جوسپارلانۋدا.
جەرلەستەرىمىز دەۆيس كۋبوگىنىڭ الەمدىك توبىندا 2011 جىلدان بەرى ونەر كورسەتىپ كەلەدى. سول ارالىقتا بەس رەت شيرەك فينالعا دەيىن جەتتىك. ىرىكتەۋ تۋرنيرىنەن ىركىلمەي ءوتىپ, العاش رەت الەمنىڭ ەڭ ۇزدىك كوماندالارىمەن كۇش سىناسۋ مۇمكىندىگىنە يە بولعان كەز كۇنى كەشەگىدەي كوز الدىمىزدا. پلەي-وفف سايىسىنىڭ العاشقى اينالىمىندا قۇرامىندا توماش بەردىح سىندى ساڭلاعى بار چەحيانى (3:2) تىزە بۇكتىرىپ, مارە-سارە بولعان ەدىك. الايدا شيرەك فينالدا ارگەنتيناعا (0:5) ءالىمىز جەتپەدى. 2013 جىلى اۋستريادان (3:1) ايلامىزدى اسىرعانىمىزبەن, چەحتار (1:3) شاڭ قاپتىرىپ كەتتى. 2014 جىلى بەلگيادان (3:2) باسىم تۇسكەنىمىزبەن, شۆەيتسارياعا (2:3) ەسە جىبەردىك. 2015 جىلى يتاليانى (3:2) قاپى قالدىرعانىمىزبەن, اۋستراليادان (2:3) ۇتىلدىق. 2018 جىلى شۆەيتساريالىقتاردى (4:1) سان سوقتىرعانىمىزبەن, حورۆاتياعا (1:3) جول بەردىك.
2019 جىلى مادريدتە جالاۋى جەلبىرەگەن جارىستىڭ تۇساۋكەسەر كەزدەسۋىندە قازاقستان نيدەرلاند قۇراماسىن 2:1 ەسەبىمەن ۇتتى. تارقاتىپ ايتساق, ميحايل كۋكۋشكين بوتيك ۆان دە زاندسحۋلپتان باسىم ءتۇستى – 6:2, 6:2. الەكساندر بۋبليك روبين حاسەگە ەسە جىبەردى – 5:7, 6:3, 6:7. جۇپتىق سايىس ءبىزدىڭ جىگىتتەردىڭ پايداسىنا شەشىلدى – 6:4, 7:6. كەلەسى ويىندى ۇلىبريتانياعا قارسى وتكىزدىك. بىراق بۇل جولى جولىمىز بولمادى. كۋكۋشكين كايل ەدمۋندكە ەسە جىبەردى – 3:6, 3:6. بۋبليك دەنيەل ەۆانستان ايلاسىن اسىردى – 5:7, 6:4, 6:1. جۇپتار اراسىنداعى باسەكە تۇماندى البيون ەلى وكىلدەرىنىڭ جەڭىسىمەن اياقتالدى – 6:1, 6:4. وسىلايشا, ءوز توبىندا ەكىنشى ورىن العان جەرلەستەرىمىز شيرەك فينالعا شىعا المادى. ال 2020 جىلى كوروناۆيرۋسقا بايلانىستى دەۆيس كۋبوگى وتپەي قالدى.
وزدەرىڭىز بايقاپ وتىرعانداي, سوڭعى 10 جىلدا قازاقستان قۇراماسى الەمدەگى ەڭ ۇزدىك سەگىز كوماندانىڭ قاتارىنا بەس رەت قوسىلدى. وتانداستارىمىز ءۇشىن بۇل ەلەۋلى تابىس ەكەنى ءسوزسىز. سەبەبى الەمدىك توپقا جولداما العان كوماندالاردىڭ ساپىندا ۇنەمى كىلەڭ ىعاي مەن سىعاي ونەر كورسەتەدى. ارالارىندا اتاعى جەر جارعان جۇلدىزدار دا جەتەرلىك. ال ءبىزدىڭ ەلدىڭ قۇرامىندا ەشۋاقىتتا ونداي دۇلدۇلدەر بولعان ەمەس. ەگەر اتر رەيتينگىنە زەر سالساڭىز, وسى كۇنگە دەيىن بىردە-ءبىر جەرلەسىمىزدىڭ «توپ-30» ويىنشىنىڭ ساناتىنا ەنبەگەنىن اڭعارامىز. ماسەلەن, تاسى ورگە دومالاپ تۇرعان كەزىنىڭ وزىندە اندرەي گولۋبەۆ 33-ورىننان اسقان ەمەس. ماقتاۋلى ميحايل كۋكۋشكين سول مەجەگە دە جەتە العان جوق. ونىڭ اتر-دەگى ەڭ جاقسى ناتيجەسى – 39-ورىن. باسقالارىنىڭ كورسەتكىشتەرى دە تومەن. سوعان قاراماستان, وتاندىق تەننيسشىلەرىمىز ەل نامىسى سىنعا تۇسكەن ساتتە ءبىر جۇدىرىق بولىپ جۇمىلا ءبىلدى. سونىڭ ناتيجەسىندە دەۆيس كۋبوگىندا ءبىرسىپىرا مىقتى كوماندالاردى جولىمىزدان ىعىستىرىپ, اۋىز تولتىرىپ ايتارلىقتاي تابىستارعا قول جەتكىزدىك. ال وسى جولى كوزدەگەن مەجەمىز – جارتىلاي فينال. ەگەر سول جوسپارىمىز جۇزەگە اسسا, بۇل قازاقستان تەننيسى تاريحىنداعى تەڭدەسسىز وقيعا بولماق.
ەستەرىڭىزگە سالا كەتەيىك, ۆ توبىنداعى باسەكەلەر يسپانيانىڭ استاناسى – مادريدتە وتەدى. جەرلەستەرىمىز العاشقى كەزدەسۋىن 27 قاراشادا شۆەتسيامەن وتكىزەدى. كەلەسى كۇنى كانادامەن كۇش سىناسادى. ال وزگە توپتاردا مىنا كوماندالار ءوزارا شەبەرلىك بايقاسادى: ا ت؟؟؟وبى – يسپانيا, رەسەي جانە ەكۆادور. س توبى – فرانتسيا, ۇلىبريتانيا جانە چەحيا. D توبى – حورۆاتيا, اۋستراليا جانە ماجارستان. ە ت؟؟؟وبى – اقش, يتاليا جانە كولۋمبيا. F توبى – سەربيا, گەرمانيا جانە اۋستريا.
