وسى ورايدا ماڭعىستاۋ وبلىسى بويىنشا قىلمىستىق-اتقارۋ جۇيەسىنە قاراستى مەكەمەلەردە جازاسىن وتەۋشىلەردىڭ ومىرگە دەگەن قۇلشىنىسىن ارتتىرۋ ماقساتىندا ءتۇرلى ءىس-شارالار, ەڭبەككە تارتۋ جۇمىستارى تۇراقتى جۇرگىزىلىپ كەلەدى.
بۇعان ماڭعىستاۋ وبلىسى بويىنشا قىلمىستىق-اتقارۋ جۇيەسىنە قاراستى گم-172/8 قاۋىپسىزدىگى بارىنشا تومەن مەكەمەسىندە جازاسىن وتەۋشىلەردىڭ «ۋنيۆەرسال اكتاۋ» جاۋاپكەرشىلىگى شەكتەۋلى سەرىكتەستىگىندە جۇمىس ىستەۋى دالەل. سەرىكتەستىك 20 سوتتالعاندى جۇمىسپەن قامتىپ وتىر.
– جازاسىن وتەۋشىلەر پلاستيك تەرەزەلەر جاساپ ۋاقتىلى جالاقىلارىن الىپ, مەملەكەت شىعىنىنا جانە جابىرلەنۋشىگە كەلتىرگەن شىعىندارىنا جالاقىلارىنىڭ 50%-ىن تولەپ كەلەدى. جازاسىن وتەۋشىلەر مەكەمە اۋماعىندا اشىلعان «ۋنيۆەرسال اكتاۋ» جاۋاپكەرشىلىگى شەكتەۋلى سەرىكتەستىگى باسشىسىنا جانە گم-172/8 مەكەمە اكىمشىلىگىنە ريزاشىلىعىن بىلدىرەدى. جالپى مەكەمەدە جازاسىن وتەۋشىلەرگە ءتالىم-تاربيە بەرۋ, ولاردىڭ ءومىر ءسۇرۋ ساپاسىن ارتتىرۋعا باعىتتالعان جۇمىستار جان-جاقتى جانە تۇراقتى جۇرگىزىلىپ كەلەدى, دەيدى جاساق باستىعى, ادىلەت مايورى ەربول سارسەنباەۆ.
اقتاۋ – قۇرىلىس جۇمىستارى قارقىن العان قالا. سوتتالعان ازاماتتاردىڭ شەبەر قولىنان شىققان پلاستيك تەرەزەلەر اقتاۋدىڭ كورىكتى ۇيلەرىنە پايدالانىلۋدا. سەرىكتەستىك ءۇي قۇرىلىسىن سالۋشى كومپانيالارمەن ءوزارا كەلىسىم جۇرگىزىپ, ءوز ونىمدەرىن نارىققا شىعارادى. جىراقتا جازاسىن وتەپ جۇرسە دە ەل دامۋىنا قاناتىمەن سۋ سەپكەن قارىلعاشتاي بولىپ ءوز ۇلەستەرىن قوسقانىنا سوتتالۋشىلار دا ريزا.
