تۋرنيرگە قاتىسۋعا نيەت بىلدىرگەن كوماندالاردىڭ كوپ بولعانى سونشالىق, اۋەلى ءبىر ايعا جۋىق ۋاقىت بويى ولار ىرىكتەۋ سايىستارىنا قاتىستى. سول سىناقتان ىركىلمەي وتكەن سەگىز ۇجىم عانا فينالدىق باسەكەلەردە باق سىناۋ قۇرمەتىنە يە بولدى. سولاردىڭ اراسىنان بوستاندىق اۋدانىندا ورنالاسقان «وربيتا» مەشىتىنىڭ ويىنشىلارى وزا شاپتى. قۇرامىندا ورازحان قالنازاروۆ, داستان ەسقوجا, سانات ساعىمبەك, ەرجان مۇرات, ءاليحان احمەدوۆ, بەكزات ءابدىراسىلوۆ سياقتى ۆولەيبولشىلار بار كوماندا بۇعان دەيىن دە شاشاسىنا شاڭ جۇقتىرماي كەلگەن ەدى. شەشۋشى تۇستا دا ولار شيراق قيمىلداپ, كوزدەگەن ماقساتتارىنا قول جەتكىزە الدى. اقتىق سايىستا ناۋرىزباي اۋدانىنداعى يبراھيم مەشىتى جاماعاتىنان باسىم تۇسكەن «وربيتا» كومانداسى باس جۇلدەنى قانجىعاسىنا بايلادى. ەسەپ – 25:21, 25:21. ءۇشىنشى ورىندى الاتاۋ اۋدانىنداعى نۇرمۇباراك مەشىتى يەلەندى.
– «اسىل مۇرا» باعدارلاماسى اياسىندا ۇيىمداستىرعان وسى سپورتتىق ءىس-شارانىڭ نەگىزگى ماقساتى – مەشىت جاماعاتى اراسىندا دەنە شىنىقتىرۋ مەن سپورتتى, سالاماتتى ءومىر سالتىن ناسيحاتتاۋ. سونىمەن قاتار يسلامنىڭ ءداستۇرلى ەمەس اعىمىنىڭ جەتەگىندە جۇرگەن جاندارعا اسىل ءدىننىڭ وڭ جولىن كورسەتۋ ارقىلى ولاردى باۋىرعا تارتۋ, – دەيدى الماتى قالاسىنداعى ءدىن ىستەرى جونىندەگى باسقارمانىڭ ءبولىم باستىعى باقداۋلەت ءابدىحاميتوۆ.
ءبىر ايتا كەتەر جايت, وسىعان دەيىن دە الماتىدا مەشىت جاماعاتى اراسىندا كوپتەگەن سپورتتىق ءىس-شارا ۇيىمداستىرىلدى. ماسەلەن, بيىل شاعىن فۋتبول جارىسىندا 400-دەن اسا كوماندا كۇش سىناستى. قاتىسۋشىلاردىڭ جالپى سانى 3 مىڭنان اسا ادامدى قۇردى. قالالىق ءدىن ىستەرى جونىندەگى باسقارماسىنىڭ العا قويعان جوسپارلارى وتە كوپ. «دەنى ساۋدىڭ – جانى ساۋ» دەگەن قاعيدانى ۇستانعان ولار ءدىني جانە مەملەكەتتىك مەيرامدار قارساڭىندا قوشقار كوتەرۋ, ارقان تارتۋ, گىر تاسىن كوتەرۋ, اسىق اتۋ جانە تاعى باسقا قازاقتىڭ ۇلتتىق سپورت تۇرلەرىن دامىتىپ, ناسيحاتتاۋ ماقساتىندا بىرقاتار جارىس ۇيىمداستىرۋدى كوزدەپ وتىر.
الماتى
