65 جىلدىققا – 65 ۇزدىك شىعارما

ۇلى وتان سوعىسى ارداگەرلەرىنىڭ ەرلىك ءداستۇرىن ۇلىقتاۋ بۇگىنگى ۇرپاقتىڭ اسىل پارىزى دەپ بىلەمىز. بۇگىنگى تاڭدا ەلىمىزدىڭ تۇكپىر-تۇكپىرىندە ۇلى جەڭىستىڭ 65 جىلدىعىنا ارنالعان يگى شارالار ءوتىپ جاتىر. وسىنداي شىرايلى شارانىڭ ءبىرى ەلوردالىق “استانا اقشامى” گازەتىنىڭ ۇيىمداستىرۋىمەن وتكەن “مەنىڭ اتام – مايدانگەر” اتتى مەك­تەپ وقۋشىلارى اراسىنداعى شىعارماشى­لىق بايقاۋ بولدى. جاقىندا وسى بايقاۋدىڭ قورىتىن­دىسى جاريالاندى. استانا قالاسى اكىمدىگىنىڭ قولداۋىمەن وتكەن اتالمىش بايقاۋ­عا ەلوردالىق وقۋشىلارمەن قاتار, ەلىمىزدىڭ باسقا ايماقتارىن­داعى مەكتەپ وقۋشىلارىنان 100-گە جۋىق شىعار­ما­لار كەلىپ تۇسكەن. قازىلار القاسىنىڭ تالقىسى­نان وتكەن 65 شىعارما گازەت بەتىندە جارىق كوردى. ولاردىڭ ىشىنەن 10 شىعارما ۇزدىك دەپ تانىلدى. ءبىرىنشى ورىندى استاناداعى اكادەميك ءا.مارعۇلان اتىنداعى №40 مەكتەپتىڭ 11 سىنىپ وقۋشىسى نۇربەك بورىنەمەرەسى جەڭىپ الدى. ەكىنشى ورىنعا ەلوردالىق وقۋشىلار انەل اح­ماتۋللينا مەن قازبەك مۇحاربەك يە بولدى. ءۇشىن­شى ورىندى ءۇش وقۋشى يەلەندى. بايقاۋ جەڭىم­پازدارىن ستالينگراد شايقاسىنىڭ قاھارمانى كوشكەنتاي راقىشەۆ پەن ۋكراينا مايدانىنىڭ جاۋىنگەرى سەيىلبەك ۋسين, استانا قالاسى ءبىلىم باسقارماسىنىڭ باستىعى ءاسيما بيمەندينا, “جاۋىنگەر-ينتەرناتسيوناليست ق.ابدراحمانوۆ اتىنداعى سپورتتىق-پاتريوتتىق قوردىڭ” اتقارۋشى ديرەكتورى سانسىزباي جۇمانباەۆ سالتاناتتى جاعدايدا ديپلومدار مەن باعالى سىيلىقتار تاپسىردى. “مەنىڭ اتام – مايدانگەر” بايقاۋىنا كەلىپ تۇسكەن ۇزدىك شىعارمالار جەكە كىتاپ بولىپ شىقتى. قاتىسۋشىلاردىڭ بارىنە كادەسىي رەتىندە تارتۋ ەتىلگەن بۇل كىتاپتى استاناداعى “زەردە” تىلدەردى دامىتۋ جونىندەگى يننوۆاتسيالىق ورتالىق باسىپ شىعاردى. – “مەنىڭ اتام ­– مايدانگەر” بايقاۋى سەكىلدى شارالار جاس ۇرپاقتى وتاندىق پات­ريوتيزمگە تاربيەلەيتىن يگىلىكتى شارانىڭ ءبىرى دەپ ويلاي­مىز. وسىنداي بايقاۋدى ۇيىم­داس­تىرعان استا­نا­لىق گازەتكە العىس ايتا­مىز. سوعىس­تاعى كور­گەن بەينەتىمىز بەن ەرلىگىمىزدى نەمەرەلەرىمىز بەن شوبەرەلەرىمىزدىڭ بىلگەنى ءبىز ءۇشىن شىنى­مەن دە جۇرەك تولقىتاتىن جاعداي. راحمەت, بار­شاڭىزعا, – دەدى بايقاۋ جۇلدەگەر­لەرىن قۇتتىق­تاعان قارت مايدانگەر كوشكەنتاي راقىشەۆ. “مەنىڭ اتام – مايدانگەر” بايقاۋىنىڭ قورىتىندىسىنا ارنالعان سالتاناتقا جينالعان ارداگەرلەر مەن وقۋشىلار وسى شارادان كەيىن كەڭەس وداعىنىڭ باتىرى اقان قۇرمانوۆ اتىنداعى №17 مەكتەپ-گيمنازيانىڭ “داڭق” مۋزەيىن تاماشالاپ, ەل مەن جەردىڭ قاسيەتى, ەرلىكتىڭ ونەگەسى تۋرالى پىكىر الىستى. ءاليا قاسەنوۆا, №22 مەكتەپ-گيمنازيانىڭ 11 سىنىپ وقۋشىسى. استانا.