قوعام • 02 قاراشا، 2021

وڭىرلەر پەدياترسىز قالۋى مۇمكىن - Nur Otan

51 رەت كورسەتىلدى

مەديتسينا ماماندارىن دايارلاۋعا ارنالعان گرانتتار مەن ءبىلىم بەرۋ باعدارلامالارىنىڭ سانىن ارتتىرۋ، اۋرۋحانالاردى زاماناۋي قۇرال-جابدىقتارمەن جاراقتاندىرۋ جانە پارتيانىڭ سايلاۋالدى ۋادەلەرىنىڭ باسقا دا پۋنكتتەرىن «Nur Otan» جانىنداعى ۇلت دەنساۋلىعى ماسەلەلەرى جونىندەگى رەسپۋبليكالىق قوعامدىق كەڭەستىڭ مۇشەلەرى تالقىلادى، دەپ حابارلايدى Egemen.kz.

قازىرگى تاڭدا دەنساۋلىق ساقتاۋ مينيسترلىگى «Nur Otan» سايلاۋالدى باعدارلاماسىن ىسكە اسىرۋ جونىندەگى جول كارتاسىنىڭ 4 تارماعىن ورىندادى. ەگدە ادامداردىڭ اۋرۋلارىن ەمدەۋگە ماماندانعان مەديتسينا ماماندارىن دايارلاۋدىڭ 3 ءبىلىم بەرۋ باعدارلاماسى ازىرلەنىپ، مەديتسينا قىزمەتكەرلەرىن، ونىڭ ىشىندە ارناۋلى سالاعا ماماندانعان كادرلاردى دايارلاۋعا 4685 گرانت ءبولىندى.

سالالىق ۆەدومستۆونىڭ بەرگەن اقپاراتىنا سايكەس، 3 زەرتحانا جوعارى تەحنولوگيالىق جابدىق العان، ال اۋداندىق اۋرۋحانالار مەن پەرزەنتحانالار قاجەتتى جابدىقپەن 76،8%-عا قامتاماسىز ەتىلگەن.

«بيىل 1000 دانا بوساندىرۋ جابدىعى، 75 رەنتگەن اپپاراتى جانە 16 كومپيۋتەرلىك توموگراف ساتىپ الىندى. سونىمەن قاتار، ارناۋلى سالاعا بەيىندەلگەن مامانداردى دايارلاۋعا گرانتتار ءبولۋ كەزىندە وڭىرلەردىڭ وتىنىمدەرىنە سۇيەنەتىنىمىزدى اتاپ وتكىم كەلەدى. مىسالى، پەدياتريا بويىنشا رەزيدەنتۋرادا وقۋعا 111 ءوتىنىش ءتۇستى»، دەدى دەنساۋلىق ساقتاۋ ۆيتسە-ءمينيسترى اجار عينيات.

وسى ورايدا كەڭەس توراعاسى، ءماجىلىس دەپۋتاتى لاريسا پاۆلوۆەتس ارناۋى سالاعا بەيىندەلگەن مەديتسينالىق ماماندارعا دەگەن وبلىستارداعى سۇرانىستىڭ ازدىعىنا قاتىستى ءوز الاڭداۋشىلىعىن ءبىلدىردى.

«پەدياترلار ءىس جۇزىندە جوقتىڭ قاسى، ەندى ەكى جىل ىشىندە بالالارىمىزدى ەمدەيتىن ەشكىم بولمايدى. وسى 111 ادامنىڭ بارلىعى ءوز ماماندىعى بويىنشا جۇمىس ىستەيتىنىنە كىم كەپىلدىك بەرە الادى؟ جەرگىلىكتى جەرلەردەگى دەنساۋلىق ساقتاۋ باسقارمالارى گرانتتارعا وتىنىمدەر بەرۋ كەزىندە بارىنشا مۇقيات بولۋى كەرەك دەپ ويلايمىن»، دەدى لاريسا پاۆلوۆەتس.

وتىرىس بارىسىندا پارتيالىقتار تەمەكى ونىمدەرىن جارنامالاۋعا جانە ورنالاستىرۋعا تىيىم سالۋ ماسەلەسىن دە كوتەردى. ۇلتتىق ەكونوميكا مينيسترلىگىنىڭ وكىلى ماحامبەت مىڭباەۆ تۇتىنۋشىلاردىڭ قۇقىقتارىن قورعاۋ تۋرالى نورما بارىن جانە ساتۋشىلار ساتىپ الۋشىعا تاۋاردى ەركىن تاڭداۋدى قامتاماسىز ەتۋى ءتيىس ەكەنىن، تاۋاردى ورنالاستىرۋ رەتى – بۇل ساتۋشىنىڭ مىندەتى جانە ول جارناما بولىپ تابىلمايتىنىن العا تارتتى.

كەڭەس توراعاسىنىڭ ورىنباسارى ءجاميلا سادىقوۆا ونىمەن تۇبەگەيلى كەلىسپەدى. ول 2006 جىلى قازاقستان ددۇ-نىڭ تەمەكىگە قارسى كۇرەس جونىندەگى نەگىزدەمەلىك كونۆەنتسياسىن راتيفيكاتسيالاعانىن ەسكە سالدى. وعان سايكەس تاۋاردى ورنالاستىرۋ رەتى جارناما بولىپ تابىلادى.

وسى تۇستا ءجاميلا سادىقوۆا بيزنەس سۋبەكتىلەرىنە تەمەكى ونىمدەرىن ساتۋدىڭ جاڭا ەرەجەلەرىن ساقتاۋ تۋرالى تۇسىندىرمە حات جىبەرمەگەن ساۋدا مينيسترلىگىنىڭ جۇمىسىن دا سىنعا الدى. ونىڭ ايتۋىنشا، بۇل تاپسىرمانى پرەمەر-ءمينيستردىڭ ءبىرىنشى ورىنباسارى 6 تامىزدا بەرگەن. وسىعان بايلانىستى ۆيتسە-پرەمەردىڭ اتىنا ءتيىستى شاعىم جولدانادى.

جيىن قورىتىندىسى بويىنشا كەڭەس ۇلتتىق ەكونوميكا مينيسترلىگى مەن ساۋدا مينيسترلىگىنە پارمەندى ءتۇسىندىرۋ جۇمىستارىن جۇرگىزۋدى، ال دەنساۋلىق ساقتاۋ مينيسترلىگىنە مەديتسينالىق تەحنيكامەن جابدىقتاۋ دەڭگەيى تومەن اۋداندارداعى احۋالدى تۇزەتۋ جونىندە شارالار قابىلداۋدى ۇسىندى.

سوڭعى جاڭالىقتار

وتكەن تاۋلىكتە 8 ادام كۆي جۇقتىردى

كوروناۆيرۋس • بۇگىن، 10:35

ۇقساس جاڭالىقتار