سپورت • 02 قاراشا، 2021

جاپونيادان جۇلدەسىز ورالدىق

35 رەت كورسەتىلدى

جاپونيانىڭ كيتاكيۋسيۋ قالاسىندا كوركەم گيمناستيكادان الەم چەمپيوناتى ءوز مارەسىنە جەتتى. وكىنىشكە قاراي، اتالعان جارىستان قازاقستان قۇراما كومانداسىنىڭ قورجىنى بوس قايتتى. جەكەلەگەن جاتتىعۋلاردا اۋىز تولتىرىپ ايتارلىقتاي تابىستارعا جەتە الماعانىمىز بىلاي تۇرسىن، كوپسايىستىڭ قورىتىندىسىنا دا كوڭىلىمىز تولمادى. بۇل باسەكەدە ەلجانا تانيەۆا مەن ءدىلناز بايلەنوۆا ونەر كورسەتكەن ەدى. العاشقى باعدارلامادا ۇزدىك 18 گيمناسشىنىڭ قاتارىنا قوسىلا الماعان قازاق قىزدارى جارىستىڭ فينالدىق بولىگىنە وتە المادى.

ۇلتتىق كوماندامىزدىڭ باس باپكەرى ءاليا يۋسۋپوۆا جەر­لەس­تەرىمىزدىڭ الەمدىك دوداداعى ونە­رىنە مىناداي باعا بەردى: «كۇن­شىعىس ەلىندە بيىك بەلەستەردى باعىندىرا الماۋىمىزدىڭ وزىندىك سەبەپتەرى بار. بىرىنشىدەن، ءبىزدىڭ قۇ­راماداعى قىزداردىڭ بارلىعى دا الەم چەمپيو­ناتىنا العاش رەت قاتىسىپ وتىر. سول سەبەپتى دە ءبى­راز قوبالجۋ بولدى، تاجىريبەنىڭ از­دىعى دا سەزىلدى. مەنىڭ ويىمشا، وسىنداي ءدۇبىرلى دودادا العاش رەت باق سىناپ وتىرعان ەلجانا تانيەۆا ءۇشىن 21-ورىن جامان كورسەتكىش ەمەس. 31-ساتىعا تابان تىرەگەن ءدىلنازدىڭ اڭگىمەسى مۇلدە بولەك. نەگىزى ونىڭ ورنىنا ءسابينا باقاتوۆا بارۋعا ءتيىس ەدى. الايدا ول جاراقات الۋىنا بايلانىستى ەلدە قالىپ قويدى. ءبىز ءسابينانى دەرەۋ دىلنازبەن الماستىرۋعا ءماجبۇر بولدىق. سوندىقتان دا ەلىمىزدىڭ ءۇشىنشى ءنومىرلى سپورتشىسىنىڭ بۇل كورسەتكىشىن جامان دەپ ايتۋعا اۋىز بارمايدى. ەكىنشىدەن، قۇراما ۇنەمى جاڭارتىلۋدا. ودان قالسا، پاندەميا سالدارىنان سوڭعى كەزدەرى كوپتەگەن جارىستان شەت قالدىق. وسىنىڭ بارلىعى كەرى اسەرىن تيگىزدى. بىراق ءبىز قول قۋ­سىرىپ وتىرعان جوقپىز. كوركەم گيمناستيكانى دامىتۋ ءۇشىن بارىنشا كۇش سالىپ جاتىرمىز. الداعى ۋاقىتتا قازاق ەلىنىڭ ارۋلارى وزدەرىنىڭ ايشىقتى ونەرىمەن جانكۇيەرلەرىن قۋانتاتىنىنا سەنىمدىمىن»، دەدى ول.

چەمپيوناتتىڭ سوڭعى كۇن­دەرى كوماندالار اراسىنداعى باسەكەلەر ءوتىپ، ايدانا مەن دايانا شاياح­مە­توۆالار، ميلانا بۋدنيك، الينا چەر­نىشەۆا، ايسۇلۋ مىر­زاعاليەۆا جانە ساعينا مۇراتوۆا ەل نامى­سىن قورعادى. بۇل جارىس­تى جەر­لەستەرىمىز 16-ورىنمەن قورى­تىن­دىلادى.

جاپونياداعى الەم چەمپيوناتىندا توعىز جۇلدە جيىنتىعى ساراپقا سالىندى. بۇل جولى دا رەسەيدىڭ كوركەم گيمناسشىلا­رى الدىنا جان سالماي، وسى سپورت تۇرىندەگى جەر-جاھاننىڭ ەڭ ۇزدىك كومانداسى ەكەنىن تاعى ءبىر دالەلدەدى. جەكەلەگەن جات­تى­عۋلاردىڭ تورتەۋىندە ولارعا تەڭ كە­لەر ەشكىم تابىلمادى. تارقاتىپ ايتساق، جالعىز دينا اۆەرينانىڭ ءوزى بەس مارتە جەڭىس تۇعىرىنىڭ ەڭ بيىك ساتىسىنا كوتەرىلدى. 23 جاستاعى نيجني نوۆگورود قالا­سىنىڭ تۋماسى «شەڭبەر»، «دوپ»، «ۇرشىق» جاتتىعۋلارى مەن كوپ­سايىستا التىننان القا تاقتى. ال «تاسپادا» بە­لارۋستىق الينا گورنوسكو باس جۇلدەنى ولجا­لاسا، اۆەرينا كۇمىس مەدالدى قاناعات تۇتتى.

كيتاكيۋسيۋدە جوعارىدا ەسىم­دەرى اتالعان گيمناسشىلار­دان بولەك، دينانىڭ ەگىزى ارينا اۆە­رينا 2 كۇمىس پەن 1 قولا مەدالدى موينىنا ءىلدى. بەلارۋستىق اناس­تاسيا سالوس پەن يتا­ليالىق سوفيا راففاەللي دە ءۇشىنشى ورىنعا تابان تىرەدى. ال توپتىق با­سەكەلەردىڭ بىرەۋىندە يتاليا قۇ­را­ماسى وزسا، تاعى ءبىر التىن رە­سەيگە بۇيىردى.

جاپونياداعى جارىستىڭ باستى جۇلدىزىنا اينالعان دينا اۆەرينانىڭ تابىسىنا، راسىندا دا، تاڭدانباۋ مۇمكىن ەمەس. 1998 جىلدىڭ 13 تامىزىندا نيجني نوۆگورود وبلىسىنىڭ زاۆولجە قالاسىندا دۇنيەگە كەلگەن ول 2017-2021 جىلدار ارالىعىندا جا­لاۋى جەلبىرەگەن ءتورت الەم چەم­پيوناتىندا 18 التىن، 3 كۇمىس جانە 1 قولا مەدالدى جەڭىپ الدى. بيىل توكيو وليمپياداسىندا ويدا-جوقتا يزرايلدىك لينوي اشرامعا ەسە جىبەرىپ، كۇمىسپەن كۇپتەلدى. سونداي-اق ونىڭ ەۋرو­پا ويىندارىنىڭ ءۇش دۇركىن جەڭىمپازى جانە 10 دۇركىن ەۋروپا چەمپيونى دەگەن اتاقتارى تاعى بار. ال دينانىڭ ەگىزى – ارينا الەم چەمپيوناتتارىندا 5 التىن، 3 كۇمىس جانە 2 قولانى ولجالادى. ول ەۋروپا بىرىنشىلىكتەرىندە توعىز رەت التىننان القا تاقتى. مىنە، بۇگىنگى تاڭدا رەسەي كوركەم گيمناستيكاسىنىڭ كوسەگەسىن كو­گەرتىپ وتىرعان ءدال وسى اپالى-ءسىڭ­لىلى اۆەرينالار.

سوڭعى جاڭالىقتار

سىردىڭ سۋى تومەندەپ بارادى

ايماقتار • بۇگىن، 17:27

دوللار ارزاندادى

قارجى • بۇگىن، 16:56

الماتى ماڭىندا جەر سىلكىندى

ايماقتار • بۇگىن، 16:38

قازاقستاندا ەت قىمباتتادى

قوعام • بۇگىن، 15:10

ەلىمىزدە كيىك سانى كوبەيىپ كەلەدى

قازاقستان • بۇگىن، 14:41

ۇقساس جاڭالىقتار