جالپى, بيىل ايماقتا 13 666 گەكتار ەگىستىك جەر يگەرىلگەن. سونىڭ 4 917 گەكتارىنا ءداندى داقىل, 3 941 گەكتارىنا جازدىق ارپا, 976 گەكتارىنا داندىك جۇگەرى, 3 437 گەكتارىنا مايلى داقىل, 400 گەكتارىنا كارتوپ, 1 831 گەكتارىنا كوكونىس, 250 گەكتارىنا باقشا داقىلى, 600 گەكتارىنا قانت قىزىلشاسى جانە 2 231 گەكتارىنا مال ازىعىنا قاجەتتى ءشوپ ەگىلگەن ەكەن. ءونىم ويداعىداي. اسىرەسە, الماتى ايماعىنداعى پياز ءوسىرۋدىڭ ورتالىعىنا اينالعان شەڭگەلدى اۋىلىنىڭ شارۋالارى بيىل تابىستى بولىپ وتىر. ولاردىڭ ىشىندە شەڭگەلدى اۋىلىنداعى «ەتەكباەۆ» شارۋا قوجالىعى دا بار. قوجالىقتىڭ بۇل جولدا جۇمىس ىستەپ جاتقانىنا 20 جىلعا جۋىقتاعان. قوجالىقتا جەرگىلىكتى اۋىلدىڭ 8 ادامى ەڭبەك ەتەدى.
قوجالىق باسشىسى بيىل ءوز يەلىگىندەگى 140 گا القاپتىڭ 70 گەكتارىنا ءداندى جۇگەرى, 27 گەكتارىنا قانت قىزىلشاسىن, 15 گەكتارىنا پياز جانە قالعان 8 گەكتارعا جەمىس-جيدەك ەككەن كورىنەدى. ءتۇسىم جامان ەمەس. اسىرەسە, پيازدىڭ ونىمدىلىگى گەكتارىنا 600 تسەنتنەردەن اينالدى. ياعني 15 گەكتار القاپتان 40 توننادان استام ءونىم جينادى.
– تامشىلاتىپ سۋارۋ جۇيەسىنىڭ ناتيجەسىندە مول ءونىم الىپ وتىرمىز. جىل سايىن ءبىزدىڭ قوجالىق سياقتى ونداعان شارۋا مەملەكەت قولداۋىن سەزىنىپ كەلەدى. سۋعا, جانار-جاعارمايعا, جۇگەرى, قىزىلشاعا سۋبسيديا بەرىلدى. ال دايىن ءونىمدى الماتىنىڭ ساۋدا نۇكتەلەرىنە جونەلتەمىز. سونىمەن بىرگە تمد مەملەكەتتەرىنە, ودان قالا بەردى ەۋروپا ەلدەرىنە دە ەكسپورتقا شىعارۋدى قولعا الدىق, – دەيدى «ەتەكباەۆ» شارۋا قوجالىعىنىڭ يەسى نۇرلان ەتەكباەۆ.
