بۇل ءىس-شارانىڭ ارتىقشىلىعى نەدە جانە قانداي سەبەپتەرمەن قايتا يممۋنداۋ قاجەتتىلىگى تۋىندايتىنى جايلى ينفەكتسيونيست دارىگەر, مەديتسينا عىلىمدارىنىڭ دوكتورى روزاليا بەگايداروۆا ەگجەي-تەگجەيلى ءتۇسىندىرىپ بەردى.
– كروسس-ۆاكتسينالاۋدىڭ ءوزى ادامعا بۇرىن الماعان پرەپاراتتى ەگۋ دەگەندى بىلدىرەدى. ەگەر ادام العاشقىدا سپۋتنيك V ۆەكتورلىق ۆاكتسيناسىن السا, وندا بەلسەندى ەمەس – QazVac, Pfizer, Hayat-Vax جانە باسقا دا ەلىمىزدە بار پرەپاراتتارعا جۇگىنۋى كەرەك. ياعني ولارعا قايتا ۆاكتسينالاۋدان ءوتۋ ۇسىنىلادى.
قازىرگى تاڭدا ماماندار الەمدە جاڭا شتاممداردىڭ پايدا بولعانىن ايتىپ, دابىل قاعۋدا. مىنە, سول سەبەپتى قايتا ەكپە الۋ اعزانى قورعاۋ ءۇشىن انتيدەنەلەردىڭ جەتكىلىكتى دەڭگەيىنىڭ قالىپتاسۋىنا مۇمكىندىك بەرەتىنىن مالىمدەۋگە ءماجبۇر.
بىردەن ايتا كەتۋ كەرەك, رەۆاكتسيناتسيادان ءوتۋ ەرىكتى نەگىزدە جانە بارلىق ەگۋ تەگىن بولادى. ماماندار قايتا يممۋنداۋ مەرزىمى ەكى دوزانى العاننان كەيىن التى ايدان توعىز ايعا دەيىن سوزىلاتىنىن ايتادى. ونىڭ ۇزاقتىعى العاشقى الىنعان ۆاكتسيناعا بايلانىستى. ماسەلەن, سپۋتنيك V ەكپەسىنەن كەيىن توعىز اي كۇتۋ كەرەك, ال باسقا جاعدايدا التى ايدان كەيىن ۆاكتسينا الا بەرۋگە بولادى.
قايتالاپ ەكپە الۋدان ەڭ الدىمەن دارىگەرلەر, پەداگوگتەر, قۇقىق قورعاۋ قۇرىلىمدارىنىڭ قىزمەتكەرلەرى جانە قىزمەت كورسەتۋ سالاسىندا جۇمىس ىستەيتىندەر وتەدى. بۇلار كوروناۆيرۋس ينفەكتسياسىن جۇقتىرۋ قاۋپى جوعارى ادامدار ساناتىنا جاتادى.
قاراعاندى وبلىسى
