بۇل مەموريال 30-شى جىلدارى ەلىمىزدەگى اشارشىلىقتا جانە سوزاق كوتەرىلىسىندە قۇربان بولعان مىڭداعان شەيىتكە ارنالىپ, تاۋەلسىزدىگىمىزدىڭ 30 جىلدىعىنا وراي اشىلىپ وتىر.
«سوزاق قاسىرەتى» مەموريالى سوزاق اۋىل وكرۋگىنە كىرەتىن كۇرە جولدىڭ بويىنداعى «جاستار» ساياباعىندا ورناتىلدى.
دەمەۋشىلەر كومەگىمەن سالىنعان مەموريالدىڭ ۇزىندىعى – 8 مەتر. مۇندا سوزاق قاسىرەتى جايلى تولىق ماعلۇمات بەرەتىن كوك تاقتا قويىلعان. «سوزاق قاسىرەتى» مەموريالىنىڭ الدىنا كوتەرىلىس پەن اشارشىلىق دەرەكتەرى جازىلعان ەسكەرتكىش ورناتىلعان. تاريحىمىزدى تۇگەندەپ, وتكەنىمىزگە باعا بەرەر ءىس-شاراعا ەلىمىزدىڭ تۇكپىر-تۇكپىرىنەن زيالى قاۋىم وكىلدەرى, قوعام قايراتكەرلەرى, تاريحشى عالىمدار مەن قالامگەرلەر قاتىستى.
اشىلۋ سالتاناتىندا تۇركىستان وبلىسى اكىمىنىڭ ورىنباسارى ساكەن قالقامانوۆ ءسوز سويلەپ, تاريحىمىزداعى ماڭىزدى وقيعالار ۇرپاق ساناسىندا قالاتىنىن, ەلىمىز ءۇشىن سوزاقتىڭ ورنى ەرەكشە ەكەنىنە توقتالدى. مامبەت قويگەلدى, تالاس وماربەكوۆ, بەرىك ابدىعالي ۇلى, حانگەلدى ءابجانوۆ جانە تاعى باسقا ەل ازاماتتارى بۇل باستاماعا جوعارى باعا بەردى.
يگى ءىستى ۇيىمداستىرىپ, دەمەۋشىلىك جاساعاندار قاتارىندا ورىنبەك ءىبىجانوۆ, بەكەت تۇرعاراەۆ, سەكسەنباي تۇرىسبەكوۆ جانە تاعى باسقا قادىرلى ەل ازاماتتارى بار.
