كوروناۆيرۋس • 01 قاراشا، 2021

ۆاكتسيناتسيا باستالعاننان بەرى ءولىم-ءجىتىم كوبەيگەنى راس پا؟

86 رەت كورسەتىلدى

الەۋمەتتىك جەلىلەردە COVID-19-عا قارسى ەكپە ەگۋ ناۋقانى باستالعاننان بەرى الەمدە ءولىم-ءجىتىمنىڭ كۇرت وسكەنى تۋرالى جالعان اقپارات تارادى، دەپ حابارلايدى Egemen.kz Stopfake.kz سايتىنا سىلتەمە جاساپ.

دارىگەر نيكولاي بوچاروۆ «رەسەيدە COVID-19-عا قارسى ۆاكتسينوپروفيلاكتيكانىڭ مەديتسينالىق، ۇيىمداستىرۋشىلىق جانە ساياسي ەرەكشەلىكتەرى» كونفەرەنتسياسىندا ءولىم-ءجىتىمنىڭ ارتقانى تۋرالى مالىمدەمە جاسادى. بۇل ءىس-شاراعا نەگىزىنەن ۆاكتسيناتسياعا قارسى ادامدار قاتىسقان.

بۇعان دەيىن وسى كونفەرەنتسيادا ايتىلعان فەيك جوققا شىعارىلعان بولاتىن. شىن مانىندە، الەمنىڭ ءارتۇرلى ەلدەرىندە جينالعان ستاتيستيكالىق جانە عىلىمي مالىمەتتەر ۆاكتسيناتسيا ناۋقانى ءولىمنىڭ وسۋىنە سەبەپ بولدى دەگەن تەورياعا قايشى كەلەدى. جاپپاي ۆاكتسيناتسيانىڭ باسىندا بريتاندىق عالىمدار كوروناۆيرۋس جۇقتىرۋ جاعدايلارىنىڭ كوبەيۋىنە قاراماستان، ەلدە ءولىم-ءجىتىم تومەندەگەنىن انىقتادى. بۇل ۆاكتسينالاردىڭ اۋرۋدىڭ اۋىر سالدارى مەن ءولىمنىڭ الدىن الۋدا تيىمدىلىگىن كورسەتتى.

وسى جىلدىڭ 24 تامىزىندا اقش دەنساۋلىق ساقتاۋ مينيسترلىگى، مامانداردىڭ ەسەپتەۋىنشە، ۆاكتسينالار ەلدە COVID-19-دان 140 000 جۋىق ءولىمنىڭ الدىن الدى دەپ مالىمدەدى. ال قىركۇيەكتە اقش-تىڭ اۋرۋلاردى باقىلاۋ جانە الدىن الۋ ورتالىعىنىڭ زەرتتەۋى ۆاكتسيناتسيالانباعان ادامدار ءۇشىن COVID-19-دان قايتىس بولۋ قاۋپى ۆاكتسينا العاندارعا قاراعاندا 11 ەسە جوعارى ەكەنىن كورسەتتى. ۇلىبريتانيادا جۇرگىزىلگەن تاعى ءبىر زەرتتەۋ ۆاكتسينا حالىققا قولجەتىمدى بولعاننان كەيىن بىردەن بىرنەشە جاس توبىندا ءولىم-ءجىتىم تومەندەگەنىن كورسەتتى. سوعان قاراماستان، بىرقاتار ەلدەردە كۆي-گە قارسى ۆاكتسينالار بولسا دا، اۋرۋ مەن ءولىمنىڭ ءورشۋى جالعاسۋدا.

Bloomberg باسىلىمى مۇنى بىرنەشە فاكتورمەن سايكەستەندىرەدى، ونىڭ ىشىندە دەنساۋلىق ساقتاۋ جۇيەسىنىڭ دامۋى، ەلدەگى ۆاكتسيناتسيانىڭ جالپى دەڭگەيى جانە ۆيرۋستىڭ جاڭا نۇسقالارىنىڭ تارالۋى بار.

ايتا كەتسەك، رەسەيدە ۆاكتسينالاردىڭ بولۋىنا قاراماستان، بۇگىندە حالىقتىڭ تەك 33%-ى تولىعىمەن ۆاكتسيناتسيالاندى. سونداي-اق 3.4%-ى ءبىرىنشى دوزا الدى.

سوڭعى جاڭالىقتار

سىردىڭ سۋى تومەندەپ بارادى

ايماقتار • بۇگىن، 17:27

دوللار ارزاندادى

قارجى • بۇگىن، 16:56

الماتى ماڭىندا جەر سىلكىندى

ايماقتار • بۇگىن، 16:38

قازاقستاندا ەت قىمباتتادى

قوعام • بۇگىن، 15:10

ەلىمىزدە كيىك سانى كوبەيىپ كەلەدى

قازاقستان • بۇگىن، 14:41

ۇقساس جاڭالىقتار