شارا حالىقارالىق تۇركى اكادەمياسىنىڭ جاڭا عيماراتىندا ۇيىمداستىرىلدى.
ءتۇبى ءبىر تۋىسقان تۇركى حالىقتاردىڭ تاريحى, ءتىلى, ادەبيەتى, قازىنالى مۇراسىنىڭ زەرتتەلۋىنە, زامان تالابىنا ساي جاڭعىرۋىنا ۇلكەن ۇلەس قوسىپ كەلە جاتقان اكادەميا جاڭا عىلىمي ەڭبەكتىڭ شىعۋىنا مۇرىندىق بولعان. مەملەكەتتىك حاتشى ءوز سوزىندە بۇل جيناق – شەجىرەلى تاريحىمىزدى تۇگەندەپ, تۋىسقاندىق جۇيەمىزدى زەردەلەگەن تولىمدى تۋىندى ەكەنىن اتاپ ءوتتى.
«بۇل ەڭبەك ەل شەجىرەسى مەن جەر شەجىرەسىنىڭ ۇندەستىگىن ايشىقتاۋىمەن, قاسيەتتى جەرىمىزدىڭ اۋماقتىق تۇتاستىعى ەل-جۇرتىمىزبەن كىندىكتەس ەكەنىن ايعاقتاۋىمەن, ۇلتتىق قاۋىپسىزدىگىمىز بەن مەملەكەتتىك مۇددەمىزگە رۋحاني قورعان قىزمەتىن اتقارۋىمەن اسا قۇندى», دەدى قىرىمبەك كوشەرباەۆ.
ىرگەلى زەرتتەۋ قر پرەزيدەنتى قاسىم-جومارت توقاەۆتىڭ العىسوزىمەن, قازاق, ورىس, تۇرىك, اعىلشىن تىلدەرىندە جارىققا شىقتى. مۇندا جۇرتىمىزدىڭ بەس مىڭ جىلدىق ناسىلدىك تەگىنىڭ ۇلانعايىر دالامەن تىعىز ساباقتاستىقتا ەكەندىگىن دالەلدەيتىن عىلىمي دايەكتەر كەلتىرىلگەن. سونداي-اق حالقىمىزدىڭ ناسىلدىك جەلىسىن, تۋىسقاندىق ءورىسىن كەشەندى سارالاعان عىلىمي ەڭبەكتە, باۋىرلاس ەلدەردىڭ اتاتەك تاريحى, تۋىسقاندىق بايلانىستارى جايىندا تىڭ دەرەكتەر دە بار.
