قازاقكونتسەرتتىڭ اتاۋى قر ۇكىمەتىنىڭ 17 تامىزداعى قاۋلىسىنا سايكەس اۋىستى.
2022 جىلى قازاقتىڭ بۇلبۇل ءانشىسى روزا باعلانوۆانىڭ تۋعانىنا 100 تولۋىنا وراي مەملەكەت باسشىسى قاسىم-جومارت توقاەۆ ۇلى ءانشىنىڭ ەسىمىن حالىق جادىندا ماڭگى ساقتاۋ ءۇشىن شارالاردى قابىلداۋدى تاپسىرعانى بەلگىلى. ۇيىم باسشىسى جەڭىس سەيدۋللا ۇلى مالىمدەگەندەي, قازاقكونتسەرت ۇجىمى ءۇشىن بۇل - وزەكتى تاپسىرما. - قازاقكونتسەرت تاراپىنان ۇيىمعا روزا باعلانوۆانىڭ ەسىمىن بەرۋ ماسەلەسىن قاراستىرۋ جونىندە مادەنيەت جانە سپورت ءمينيسترى ا.رايىمقۇلوۆانىڭ اتىنا حات جولدانعان بولاتىن.
بۇل يگى باستامانى حالىق ارتىستەرى, قازاقكونتسەرت قۇرامىندا ونەر كورسەتىپ جۇرگەن ەلىمىزدىڭ ەڭبەك سىڭىرگەن قايراتكەرلەرى, مادەنيەت ۇزدىكتەرى مەن جاس تالانتتار بىردەن قولدادى. ولاردىڭ قاتارىندا: بيبىگۇل تولەگەنوۆا, نۇرعالي ءنۇسىپجانوۆ, مۇرات قۇسايىنوۆ, اقجول مەيىربەكوۆ, التىنبەك قورازباەۆ, روزا رىمباەۆا, ايمان مۋساحادجاەۆا, ناعيما ەسقاليەۆا, ماقپال ءجۇنىسوۆا, ايجان نۇرماعامبەتوۆا, باعدات سامەدينوۆا, جەڭىس ىسقاقوۆا, قۇرماش ماحان, ازامات جىلتىركوزوۆ, ەرلان رىسقالي, مەدەت چوتاباەۆ, امىرە ت.ب. ورىنداۋشىلار بار.
اتالعان شارا روزا باعلانوۆا ەسىمىنىڭ ۇلت جادىندا, كەلەشەك ۇرپاقتىڭ ەسىندە ماڭگى ساقتالۋىنا جانە ۋاقىت وتكەن سايىن قايتا جاڭعىرىپ وتىرۋىنا ەلەۋلى ۇلەس قوسادى دەپ بىلەمىز, دەپ جەتكىزدى جەڭىس سەيدۋللا ۇلى. وتكەن كونتسەرتتىك ماۋسىمدا ءوزىنىڭ 60 جىلدىق مەرەيتويىن اتاپ وتكەن قازاقكونتسەرتتىڭ تاريحىنا ۇڭىلسەك, روزا باعلانوۆا بۇل ۇيىمدا 1960 جىلدان باستاپ, ءومىرىنىڭ سوڭىنا دەيىن جەمىستى ەڭبەك ەتكەن. قازاقكونتسەرتتىڭ نەگىزىن قالاۋشىلاردىڭ ءبىرى, ۇيىمنىڭ ءانشىسى بولىپ قازاقتىڭ ءان ونەرىن دامىتۋعا ولشەۋسىز زور ۇلەس قوستى.
كوزى تىرىسىندە اتى اڭىزعا اينالعان روزا تاجىبايقىزى مايدان دالاسىندا ءان سالىپ, اسەم داۋسىمەن بۇكىل الەمدى تامساندىردى.
بار عۇمىرىن حالقىنا ارناعان روزا باعلانوۆا بويىنداعى تالانتىمەن قازاق ونەرىنىڭ ۇلىلىعىن پاش ەتىپ, ەلىمىزدىڭ رۋحاني بايلىعىن اسقاقتاتا ءتۇستى.
