قازاقستان • 29 قازان، 2021

Nur Otan شاعىن قالا اكىمدىكتەرىنىڭ بەلسەندىلىگىن سىنعا الدى

مونو جانە شاعىن قالالاردى دامىتۋدىڭ وزەكتى ماسەلەلەرى Nur Otan پارتياسى جانىنداعى وڭىرلىك دامۋ جونىندەگى رەسپۋبليكالىق قوعامدىق كەڭەس الاڭىندا تالقىلاندى، دەپ حابارلايدى Egemen.kz.

جانبولات كەنجەعۇل

ۇلتتىق ەكونوميكا ۆيتسە-ءمينيسترى الىشەر ابدىقادىروۆ حابارلاعانداي، بيىل 23 قالادا 400 كم جۋىق اۆتوموبيل جولدارى مەن ينجەنەرلىك جەلىلەردى جاڭعىرتۋ ءۇشىن رەسپۋبليكالىق بيۋدجەتتەن 17 ملرد تەڭگە ءبولىندى.

«27 مونوقالادا 10 مىڭعا جۋىق ادامدى جۇمىسپەن قامتىعان 60 «زاكىرلى» ينۆەستيتسيالىق جوبا ىسكە اسىرىلۋدا. سوڭعى 3 جىلدا مونوقالالاردىڭ كاسىپكەرلەرىنە بەرىلگەن گرانتتار كولەمى 3،5 ەسەگە (63-تەن 218 ملن تەڭگەگە دەيىن)، سۋبسيديالاۋ – 1،6 ەسەگە (8،3-تەن 13،5 ملرد تەڭگەگە دەيىن)، ميكرونەسيەلەۋ – 1،7 ەسەگە (2،6-دان 4،5 ملرد تەڭگەگە دەيىن) ۇلعايدى. ال ارقالىق، جەزقازعان جانە جاڭاوزەن قالالارىداعى كولىك قارىم-قاتىناسىن جولعا قويۋ ماسەلەسىن شەشۋ ءۇشىن تەمىر جولدار سالىندى»، دەدى الىشەر ابدىقادىروۆ.

كەڭەس توراعاسى، ءماجىلىس دەپۋتاتى يۋليا كۋچينسكايا مالىمدەگەندەي، بۇگىندە ەلىمىزدەگى 70 مونو جانە شاعىن قالادا 2،3 ملن-عا جۋىق ادام تۇرادى. الايدا مەملەكەتتىك قولداۋ شارالارى ولاردىڭ تەك ءبىر بولىگىنە عانا باعىتتالعان. كەڭەس توراعاسى جەرگىلىكتى اتقارۋشى ورگانداردىڭ وزدەرىنە باسقارۋعا سەنىپ تاپسىرىلعان قالالاردى دامىتۋدا بەلسەندىلىگى مەن ىقىلاس-ىنتاسىنىڭ تومەن ەكەنىن اتاپ ءوتتى.

«مىسالى رەسپۋبليكالىق بيۋدجەت جوباسىن تالقىلاۋ كەزىندە ءبىز وڭىرلەردە پارتيانىڭ سايلاۋالدى ۋادەلەرىن ىسكە اسىرۋ جونىندەگى جول كارتالارىنا ەنگىزىلگەن نىسانداردىڭ دايىن جوبالاۋ-سمەتالىق قۇجاتتاماسىنىڭ جوقتىعىن كوردىك»، دەدى حالىق قالاۋلىسى.

سونداي-اق كەڭەس توراعاسى شەنەۋنىكتەردىڭ ءىرى اگلومەراتسيالار ەسەبىنەن ۋربانيزاتسيا دەڭگەيىن ارتتىرۋ تۋرالى ۇسىنىسىنىڭ ورىندى ەكەندىگىنە كۇمان كەلتىردى.

«ورتا جانە شاعىن قالالاردى دامىتۋ، ولاردىڭ بازاسىندا وڭىرلەردە تارتىلىس نۇكتەلەرىن قۇرۋ ارقىلى ۋربانيزاتسيا تۇجىرىمداماسى قاشان وزگەردى؟ شاعىن قالالاردان كوشىپ كەلگەن ازاماتتاردىڭ باسپانا، جۇمىسپەن قامتۋ ماسەلەلەرىن قالاي شەشەمىز؟ بۇگىندە شاعىن قالالاردىڭ تۇرعىندارى ول جاقتاعى پاتەرلەرىن ساتىپ، ءىرى قالادا باسپانا ساتىپ الا المايدى»، دەدى يۋليا كۋچينسكايا.

كەڭەس توراعاسىنىڭ ورىنباسارى، ساياساتتانۋشى مارات شيبۇتوۆ تا وزەكتى تاقىرىپتى قوزعادى. ول اقپارات سالاسىندا مونو جانە شاعىن قالالاردى دامىتۋ بويىنشا جوسپارلار مەن ەسەپتەردىڭ جوقتىعىن جانە ستاتيستيكالىق اقپاراتتىڭ قولجەتىمدىلىگى وتە تومەن ەكەنىن العا تارتتى.

جيىن قورىتىندىسى بويىنشا كەڭەس ازىرلەگەن ۇسىنىمدار ءتيىستى ۆەدومستۆولارعا جىبەرىلدى. بۇدان باسقا، ۇلتتىق ەكونوميكا مينيسترلىگىنە كەڭەسكە مونو جانە شاعىن قالالاردى دامىتۋ جونىندەگى الدىڭعى باعدارلامالاردىڭ ىسكە اسىرىلۋى تۋرالى تولىق ەسەپ بەرۋ، ال ولاردىڭ باسشىلارىنا دامۋ جوسپارلارى مەن ءتۇيىندى ماسەلەلەردىڭ تىزبەسىن ۇسىنۋ تاپسىرىلدى.