نۇرسۇلتان نازارباەۆ قورىنىڭ باستاماسىمەن قولعا الىنعان فورۋمدا ۇكىمەت مۇشەلەرى, كورپوراتيۆتىك سەكتور مەن ساراپشىلار قاۋىمداستىعىنىڭ وكىلدەرى, سول سەكىلدى تسيفرلى سەرۆيستەردى ازىرلەۋشىلەر مەن IT كومپانيالاردىڭ باسشىلارى تسيفرلى تەحنولوگيالارعا بايلانىستى وزەكتى ماسەلەلەر تالقىلاپ, پىكىر الماستى.
«كارانتيندىك شەكتەۋلەر تسيفرلاندىرۋ ۇدەرىسىنىڭ تەز دامۋىنا ىقپال ەتكەنىنە كۋا بولدىق. كەز كەلگەن داعدارىس سەكىلدى پاندەميا دا ادامزاتقا سىن-قاتەردى عانا ەمەس, جاڭا مۇمكىندىكتەرگە دە جول اشتى. اشىق يننوۆاتسيالار فورماتى جەدەلدەتىلگەن تسيفرلى ترانسفورماتسيا سىندى وزەكتى ۇردىسكە اينالدى.
تسيفرلاندىرۋ مەن اشىق يننوۆاتسيالار سالاسىندا بەلگىلى قاۋىپ-قاتەرلەر دە بار ەكەنىن تۇسىنەمىز. قازىر كاسىبي ورتادا كيبەرقاۋىپسىزدىك جانە جەكە دەرەكتەردى قورعاۋ ماسەلەلەرى ءجيى ايتىلادى. ەلەكتروندى كوممۋنيكاتسيا سالاسىنداعى سوڭعى وقيعالار مۇنىڭ قانشالىقتى ماڭىزدى ەكەنىن كورسەتتى. اشىق يننوۆاتسيالار قوعامدىق, مەملەكەتتىك جانە كورپوراتيۆتىك ينستيتۋتتار ءتيىستى دەڭگەيدە دامىعان كەزدە عانا ءتيىمدى ەكەنىن بايقاتا الادى», دەگەن نۇرسۇلتان نازارباەۆ قورى اتقارۋشى ديرەكتورىنىڭ ورىنباسارى الكەي مارعۇلان ۇلى اتالعان قوردىڭ ديرەكتورى داريعا نازارباەۆانىڭ بايانداماسىن جەتكىزدى.
سپيكەرلەر وتكىزىلىپ وتىرعان فورۋم قازاقستاننىڭ تسيفرلى جۇيەسىن دامىتىپ, ءتيىمدى ىسكە اسىرۋعا مۇمكىندىك بەرەتىن قۇرالداردى انىقتاۋعا ىقپال ەتەتىنىنە سەنىمدى. «تسيفرلى ترانسفورماتسيا قوعامنىڭ بارلىق سالاسىندا وتە ماڭىزدى. قازاقستان بۇل باعىتتا جاقسى تابىسقا قول جەتكىزەدى دەپ سەنەمىن. RoboCup كونفەدەراتسياسىنىڭ جارىسىنا قازاقستاندىق ستۋدەنتتەر كوپ قاتىسادى. RoboCup – ۋنيۆەرسيتەتتەردىڭ, عىلىمي-زەرتتەۋ ينستيتۋتتارىنىڭ جانە ونەركاسىپتىڭ دامۋىنا قوماقتى ۇلەس قوساتىن تالانتتاردىڭ ناعىز ينكۋباتورى», دەدى RoboCup ازيا-تىنىق مۇحيتى حالىقارالىق كونفەدەراتسياسىنىڭ (RCAP) پرەزيدەنتى چانتسزيۋ چجوۋ.
حالىقارالىق ساراپشى ەلىمىزدىڭ IT-تەحنولوگيالاردى دامىتىپ, ەنگىزۋگە قاتىستى جۇمىستارىن وڭ باعالادى.
فورۋمنىڭ العاشقى كۇنى ماماندار «اشىق يننوۆاتسيالار جانە جاڭا تسيفرلى شىندىقتىڭ سىن-قاتەرلەرى», «تسيفرلاندىرۋ جانە قۇقىق: جاڭا سىن-قاتەرلەر», سونداي-اق «GovTech جانە DigitEl: بۇل نە جانە نە ءۇشىن كەرەك؟» سىندى قىزىقتى تاقىرىپتاردا پىكىر الماستى. سونىمەن قوسا بۇل جيىندا قازاقستاندىق ستارتاپتاردىڭ شەتەلدىك نارىققا شىعۋى, ءىت-اۋتسورسينگتى دامىتۋ جانە وتاندىق ۋنيۆەرسيتەتتەردىڭ جاڭا تەحنولوگيالىق جوبالاردى دايىنداۋعا قاتىسۋ مۇمكىندىكتەرى پىسىقتالدى.
بۇدان بولەك, KazRoboProject-2021 روبوتتەحنيكا بايقاۋى مەن Smart Zholy جوباسىنىڭ جەڭىمپازدارى انىقتالادى. جىل سايىن روبوتتەحنيكا بىرىنشىلىگى (10 جاستان 21 جاسقا دەيىنگى جاستار اراسىندا وتكىزىلەدى) ەلىمىزدىڭ بارلىق وڭىرىنەن ونداعان جاس ونەرتاپقىشتىڭ ەسىمىن جاريالايدى. Smart Zholy باعدارلاماسى بولاشاعى زور IT-ستارتاپتاردى قولداپ, ۇزدىكتەرىن حالىقارالىق دەڭگەيگە شىعارۋعا باعىتتالعان. باعدارلاما جەڭىمپازدارى بىرنەشە جىل قاتارىنان سينگاپۋرداعى وڭتۇستىك-شىعىس ازيانىڭ ءىرى ستارتاپ الاڭىندا جوبالارىن ۇسىنعانىن ايتا كەتكەن ورىندى.
