جامان تۇماۋدىڭ تۇلا بويىڭدى تۇرشىكتىرەر الاپات حابارى ەل شەتىنە جەتكەن كەزدە جاماعات قاتتى قاۋىپتەنىپ, بويىن جيناپ الىپ ەدى. كەيىن ەتى ۇيرەنىپ كەتتى. ىندەت شەڭگەلىنە ىلىككەن, ايتىپ كەلگەن اپاتتان اجال تاپقاندار تۋرالى ەت جۇرەگىڭدى مۇزداتاتىن سۇراپىل اقپارات سۋداي ساپىرىلىپ تۇرسا دا ۋاقىت وتە كەلە زاردابىن ەلەمەۋگە اينالدى. ءوز باسىنا عانا ەمەس, وزگە بەيكۇنا جۇرتقا دا قاۋىپ توندىرەتىنىن, ناقتىراق ايتقاندا, دەرت جۇقتىراتىنىن دەندەپ ەسكەرمەۋدىڭ ءتۇبى بۇگىنگى جايعا جەتكىزىپ تۇر.
كارانتين ءتارتىبىن بۇزۋشىلىق ەڭ الدىمەن وبلىس ورتالىعىندا بەلەڭ العان. دەمالىس كۇندەرى بىلاي تۇرسىن, جۇمىس كۇندەرىنىڭ وزىندە ەسىك پەن توردەي تەرەزەلەرىن تۇمشالاپ العان مەيرامحانالار مەن ءدامحانالاردىڭ الدىندا كولىكتەر سىڭسىپ تۇر. توي-تومالاق تا, جالپاق جۇرتتى جيناعان قارالى جيىن دا ۇزبەي وتكىزىلىپ جاتىر. وسىدان كەيىن «قىزىل» ايماقتىڭ ساناتىنان شىعا الۋىمىز مۇمكىن بە؟ كوكشەتاۋ قالاسىندا مونيتورينگتىك توپتار كارانتين ءتارتىبىنىڭ 222 مارتە بۇزىلعانىن انىقتاعان. اۋدانداردىڭ كوشىن بۋراباي, تسەلينوگراد, اتباسار, ساندىقتاۋ باستاپ تۇر. ستەپنوگور قالاسىندا دا ءتارتىپ ءجيى بۇزىلادى.
ءتارتىپ بۇزعاندارعا ءتيىستى شارا قولدانىلىپ جاتىر. ماسەلەن, 672 رەت اكىمشىلىك ايىپپۇل سالىنعان. كولەمى 89 ملن 572 مىڭ تەڭگە دەڭگەيىندە. 18 ءىس اكىمشىلىك سوتقا جولداندى. ايتسە دە, كوپشىلىك ورىنداردان اياعىن تارتىپ, بويىن اۋلاق سالىپ ساقتانۋ سۇيىلىپ بارادى.
ءسوزىمىز دالەلدى بولۋى ءۇشىن قوعامدىق تاماقتانۋ ورىندارىندا باقانداي 113 مارتە كوپشىلىكتىڭ قاتىسۋىمەن ءىس-شارالار وتكىزىلىپ, جالپىعا ورتاق ءتارتىپتىڭ تاباناستى بولعانى بەلگىلى بولىپ وتىر. سوڭعى ۋاقىتتا كوتتەدجىن جالعا بەرەتىندەردىڭ ايى وڭىنان تۋىپ تۇرعانىن ەكپىن تۇسىرە ايتا كەتۋ كەرەك. مونيتورينگتىك توپتار ورتالىقتاعى مەيرامحانالار مەن ءدامحانالاردى ءجيى قاداعالايتىندىقتان شاعىن مەرەكەلىك كەشتەر جۇرت كوزىنەن قاعا بەرىستەگى كوتتەدجدەرگە اۋعان. بۇل ارادا جاسىرىن تۇك تە جوق, الەۋمەتتىك جەلىلەر مەن جارنامالىق گازەتتەردە «كوتتەدجدى جالعا بەرەمىن» دەگەن حابارلاندىرۋدان كوز سۇرىنەدى. مونيتورينگتىك توپتار «ىندەت كەزىندەگى توي» دەمەكشى, ەلدىڭ اماندىعىنان قاراقان باسىنىڭ قامىن ويلاپ, قىسىلعان حالىقتان قارپىپ پايدا تاۋىپ قالۋدى كوكسەگەن كوتتەدجدەرىن جالعا بەرۋشىلەردى دە انىقتاپ جاتىر. مۇنداي فاكتىلەردىڭ جەتەۋى كەزدەسكەن. بۇل كوزگە تۇسكەندەرى عانا. انىقتالماعاندارى قانشاما؟ دەرتتىڭ دەمىگىپ تۇرۋىنىڭ ءبىر سەبەبى وسىندا ەمەس پە ەكەن؟
قازان ايىندا 296 رەيد جاسالىپ, 1 010 نىساندى قامتىعان كەزدە 30 ءتارتىپ بۇزۋشىلىق انىقتالعان. ەسكەرتۋدى قۇلاعىنا ىلمەگەن مەيرامحانالار مەن ءدامحانالاردىڭ يەلەرىنە 3 ملن 622 مىڭ تەڭگە كولەمىندەگى 25 اكىمشىلىك ايىپپۇل سالىنعان. وسىدان كەيىن تىيىلار دەيسىز عوي؟ جوق, ءالى دە ءورشىپ تۇر. سوڭعى اپتادا 300 نىساندى قامتىعان 84 رەيد وتكىزىلگەن كەزدە تاعى دا 9 جەردە كارانتيندىك شارالاردىڭ ورەسكەل بۇزىلعانى بەلگىلى بولعان. ءتارتىپ بۇزعاندارى ءۇشىن 1 ملن تەڭگە مولشەرىندە ايىپپۇل سالىنعان.
جوعارىدا ايتىلعان جايلاردى ساراپتاي كەلە, ايىپپۇلدىڭ دا ءوز پايداسىن كوكسەگەندەرگە توسقاۋىل بولا المايتىنىنا كوزىمىز جەتىپ وتىر. بالكىم, وڭىردەگى جاعدايدىڭ قالاي قالىپتاسىپ وتىرعانىن بىلە تۇرا ءتارتىپ بۇزعاندارعا تۇسامىس سالۋ ءۇشىن قولدانىلاتىن شارانى قاتايتقان ءجون بە؟!
اقمولا وبلىسى
