ەكونوميكا • 28 قازان، 2021

تاڭبالاۋ جانە بيزنەستەگى بايبالام

104 رەت كورسەتىلدى

سىرتتان تاسىعانىمىز، ءوزىمىز وندىر­گە­نىمىز بار، سورەلەردەگى تاۋارلاردى تۇگەلدەي تاڭبالاۋ قانشالىقتى قيسىندى؟ وسى ماسەلە قوزعالسا بولعانى، وندىرۋشىلەر نەگە بايبالام سالىپ شىعا كەلەدى؟ شىن­دىعىندا تاۋارلاردى تاڭبالاۋ باعا­لار­دىڭ قىمباتتاپ، ءونىمنىڭ ازايۋىنا الىپ كەلۋى مۇمكىن بە؟

تاياۋدا «ىسكەرمەن» ونەركاسىپ جانە كاسىپكەرلەر وداعى كەزەكتى رەت قۇزىرلى مەكەمەلەرگە حات جولدادى. ويتكەنى ەلىمىزدە تاۋارلاردى تاڭبالاۋ ماسەلەسى كۇن تارتىبىنە قايتا شىققانى بەلگىلى. ارينە، بۇل ماسەلەدە ءار تاراپ ءوز مۇددەسىن تىقپالايتىنى بەلگىلى. دەگەنمەن بيزنەس-قاۋىمداستىقتىڭ بايبالامىنا قۇلاق تۇرمەۋگە بولمايدى.

يمپورتتاۋشىلار مەن شاعىن جانە ورتا بيزنەس وكىلدەرىن بىرىكتىرەتىن بيزنەس-قاۋىمداستىقتاردىڭ قايتا-قايتا جاساعان وتىنىشىنە قاراماستان، قازاقستاندا سايكەس­تەن­دىرۋ تاڭبالارىمەن تاۋارلاردى تاڭ­با­لاۋدى ەنگىزۋ ماسەلەسىندە ءالى دە ورتاق مامىلە جوق دەۋگە بولادى. اينالىپ كەلگەندە، بۇل ىسكەر ورتانىڭ ۇكىمەتكە تاعى دا ءوتىنىش جاساۋىنا جەتەلەپ وتىر. دەمەك بۇل ءىستى رەتتەۋدە تۇيتكىلدەر بار.

بىراق جەتەكشى وندىرۋشىلەر، يمپورتتاۋ­شى­لار مەن ساراپشىلار قاۋىمداستىعى بولشەك ساۋداعا قاتىستى ۇكىمەتكە سىندارلى شەشىم قابىلداعانى ءۇشىن العىس جاۋدىرىپ وتىرعانىمەن، جەكەلەگەن تاۋارلارعا قاتىستى قابىلدانعان شەشىمدەر بيزنەس قوعامداستىق العا تارتىپ وتىرعان نەگىزگى ماسەلەلەردى شەشپەيتىن كورىنەدى. وسى تىزبەكتەن بولشەك ساۋدانى الىپ تاستاپ، ماعىنالىق جۇكتەمەسى جوق تاڭبالاۋداعى crypto tail-دى تىقپالاۋ – سايىپ كەلگەندە مۇددەلى قۇرىلىمداردى بايىتۋ قۇرالى عانا.

قازىرگى تاڭدا ەلىمىزدە كولەڭكەلى ەكونوميكا جانە كونترافاكتىمەن ءتيىمدى كۇرەسۋگە مۇمكىندىك بەرەتىن تاۋار اينالىمىن باقىلاۋ تەتىكتەرى جولعا قويىلعانىنا كۇمان جوق. بۇل – كلاسسيكالىق شوت-فاكتۋرالار جانە ونلاين-كاسسالىق اپپاراتتار. شاعىن جانە ورتا بيزنەس وكىلدەرى قولدانىستاعى تاڭبالاۋ ۇدەرىسى كوزدەگەن يگى ماقساتىنان جاڭىلىپ، ءىس جۇزىندە مونەتيزاتسيا، ياعني اقشا جاساۋ پروتسەسىنە اينالىپ بارا جاتقانىن العا تارتىپ وتىر. بيزنەس-قاۋىمداستىقتىڭ ءۋاجى مىناداي: مۇنداي جاعدايدا الدىمەن تۇتىنۋشىلار زيان شەگەدى، ويتكەنى تاۋارلاردى تاڭبالاۋدان تۋىندايتىن بارلىق شىعىندى وندىرۋشىلەر مەن يمپورتتاۋشىلار تۇتىنۋشىلارعا جۇكتەۋگە ءماجبۇر بولادى.

حاتتا تاۋارلاردى تاڭبالاۋدىڭ تەرىس سالدارى كورسەتىلگەن. اتاپ ايتقاندا، تاڭ­بالاۋ ءىس جۇزىندە تۇتىنۋشىلاردان الىناتىن قوسىمشا سالىققا اينالادى – ساپالى تاۋارلار باعاسىنىڭ قولجەتىمدىلىگى كۇرت شەكتەلەدى. سونىمەن قاتار تاڭبالاۋ ۇدەرىسى وندىرۋشىلەر، ديستريبيۋتورلار مەن ساۋدا كومپانيالارى تاراپىنان ايتارلىقتاي شىعىنداردى تالاپ ەتەدى. بۇل ءوندىرىس جىل­دام­دىعىنىڭ بىردەن باسەڭدەۋىنە، باعانىڭ ءوسۋى مەن قىزمەتكەرلەر سانىنىڭ ازايۋىنا اكەلۋى مۇمكىن.

وسى ءىستىڭ باسى-قاسىندا جۇرگەن ىسكەر­لەر كودتى گەنەراتسيالاۋ بيزنەس-پروتسەس­تەردى قيىنداتىپ، قۇجات اينالىمىن ۇلعاي­تا­دى، ال اقپاراتتىق جۇيە جۇمىسىنىڭ تۇ­راق­سىزدانۋى، تەحنيكالىق تۇرعىداعى كەدەر­گى­لەر، ونىڭ ىشىندە ينتەرنەت-قامتۋدىڭ دا تۇراقسىزدىعى وندىرىستىك پروتسەستى دە، تاسىمالداۋدى دا تەجەيدى-ءمىس. قىسقاسى، تاڭبالاۋ تۇتىنۋشىلاردىڭ باسىم كوپشىلىگىنە ونسىز دا قىمباتقا تۇسەتىن بارلىق يمپورتتالاتىن تاۋارعا باعانىڭ ودان ءارى وسۋىنە الىپ كەلۋى عاجاپ ەمەس. سالدارىنان شاعىن جانە ورتا بيزنەستىڭ اتىنان ارەكەت ەتىپ وتىرعان يمپورتتاۋشىلار سانى كۇرت قىسقارادى.

قورىتا ايتقاندا، ىسكەر ورتا نەنى تالاپ ەتىپ وتىر؟ جوعارىدا ايتىلعانداردى ەسكەرە وتىرىپ، حات اۆتورلارى بىرقاتار ۇسىنىس جاساعان. ءبىرىنشى كەزەكتە تاۋارلاردىڭ بارلىق تۇرىنە مىندەتتى جانە جەدەل تاڭ­با­لاي­تىن رەسەيلىك فورماتتان باس تارتۋ كەرەك. سونىمەن قاتار قۇزىرلى مەملەكەتتىك ورگانداردىڭ قاناتقاقتى كەزەڭگە ەنگىزۋ تۋرالى شەشىمدەردى وندىرۋشىلەردىڭ ورىندى ۇسىنىس، ۇستانىمىن ەسكەرمەي، تالداۋسىز، ءبىر جاقتى تارتىپپەن قابىلداناتىنى سياقتى قالىپتاسقان تاجىريبەسىن توقتاتۋدى ۇسىنىپ وتىر.

وسى تاۋار مىندەتتى تاڭبالاۋعا جاتاتىن تىزىمگە ەنگەن، ەاەو ەلدەرىنە ەكسپورتقا جىبەرىلەتىن تاۋارلاردى قوسپاعاندا، تاڭبا­لاۋ­دىڭ ەرىكتىلىگى قاعيداتىن ۇستانۋ­عا ءتيىس. سالادا زاڭسىز اينالىمنىڭ، كونترا­فاك­تىنىڭ جوعارى دەڭگەيىنىڭ بار ەكەنىنە ايقىن دالەلدەر ۇسىنىلعان جاعدايدا، يندۋس­تريا­نىڭ ءوزى تاڭبالاۋدىڭ ورىندىلىعى تۋرالى نەگىزدەلگەن شەشىم قابىلداۋى كەرەك.

سونداي-اق اتالعان تاۋار مىندەتتى تاڭ­با­لا­نۋعا جاتاتىن تىزىمگە ەنگەن ەلدەرگە ءونىمدى ەكسپورتتاۋعا ءماجبۇر بولعان وندىرۋ­شى­لەرگە مەملەكەتتىك قولداۋ كورسەتۋدى سۇرايدى.

 

سوڭعى جاڭالىقتار

حاتتوننىڭ ۇلى اتتيلانى اتىنان ءتۇسىردى

كاسىپقوي بوكس • بۇگىن، 10:35

جەكپە-جەكسىز وتكەن العاشقى جىل

كاسىپقوي بوكس • بۇگىن، 09:08

«دينامودان» جەڭىلدى

حوككەي • بۇگىن، 07:34

كرەاتيۆتى كىتاپ دۇكەنى

ايماقتار • بۇگىن، 07:33

جانبوتا جاراپ تۇر

سپورت • بۇگىن، 07:27

اقىن تۇتىنعان كەسە

تاريح • بۇگىن، 07:24

ۇلى جامبىل مۇراسى ۇلىقتالدى

رۋحانيات • بۇگىن، 00:33

ۇقساس جاڭالىقتار