داقپىرت

Kaspi bank, بانك تسەنتر كرەديت جانە اليانس بانكتىڭ بانكروتتىعى جايىنداعى اقپاراتتار جالعان سەيسەنبى كۇنى تارالعان جالعان سىبىستاردىڭ الدىن الۋ ءۇشىن ەلىمىزدەگى ءۇش بىردەي ءىرى بانك –  Kaspi bank, بانك تسەنتر كرەديت جانە اليانس بانك قۇقىق قورعاۋ ورگاندارىنا جۇگىنىپ, جالعان اقپارات تاراتۋشىلاردى تابۋعا كومەكتەسۋىن سۇراۋعا ءماجبۇر بولدى. جۇرتتى دۇربەلەڭگە سالماق بولعان  اقپاراتتىق شا­بۋىل­داردىڭ اۆتورلارى قازىرگە بەلگىسىز. ال اتالمىش قارجى مەكە­مەلەرى بانكورتتىققا ۇشى­رايدى-مىس دەيتىن sms-حابارلار تاراتقانداردىڭ بۇل ءىسى – تەڭگەنىڭ باعام وزگەرتۋىنە قاتىستى جاع­دايدى ۋشىقتىرماقشى بول­عانداردىڭ ارانداتۋ ارەكەتى ەكەنى ايدان انىق. قازىرگە بۇل وقيعانىڭ ۇزىن-ىرعاسى تومەندەگىدەي. ءۇس­تىمىزدەگى جىلدىڭ 11 اقپانىندا ۇلتتىق بانك تەڭگە باعامىنىڭ وزگەرگەنىن مالىمدەگەننەن كەيىن-اق, ينتەرنەت جەلىلەرىندە قازاق­ستاندىق بىرنەشە ءىرى بانكتىڭ بانكروت بولاتىندىعى جايىندا جالعان اقپاراتتار تاراتىلا باستاعان. مۇنداي جالعان, ياعني «دو­مالاق» اقپاراتتارمەن الدىمەن بانك تسەنتر كرەديت كۇرەسۋگە ءماج­بۇر بولدى. اتالمىش بانكتىڭ جەتەكشىسى وسى ارالىقتا جالعان اقپاراتتى جوققا شىعارۋ ءۇشىن ەكى رەت اشىق مالىمدەمە جاسادى. كەسىرلى اقپاراتتار مۇنان كەيىن دە ساپ تىيىلا سالمادى. ۇيا­لى تەلەفوننىڭ WhatsApp مەسسەند­جەرىن پايدالانۋشىلار اراسىندا جالعان سىبىس جالعاسىپ, ەندى «اليانس بانك» پەن Kaspi bank-ءتىڭ جابىلۋى مۇمكىندىگى تۋرالى ءسوز تاراتىلدى. سوندىقتان دا, سەيسەنبى كۇنى Kaspi bank, بانك تسەنتر كرەديت جانە اليانس بانكتىڭ بانكروتتىعى جايىنداعى اقپارات شىندىققا سايكەس كەلمەيتىندىگى تۋرالى ءبىر­لەسكەن مالىمدەمە جاسالدى. بانك تسەنتر كرەديتتىڭ, Kaspi bank پەن اليانس بانكتىڭ باس­شى­لارى مەن اكتسيونەرلەرى ءجا­نە قازاقستان قارجىگەرلەر قاۋىم­داستىعى اتالعان اقپاراتتىڭ اران­داتۋشىلىق سيپاتقا يە ەكەنىن رەس­مي تۇردە حابارلاپ وتىر, ونىڭ جال­عىز ماقساتى – قازاقستاننىڭ قار­جى جۇيەسىن تۇراقسىزداندىرۋ. Kaspi bank, بانك تسەنتر كرەديت, اليانس بانك جانە قازاقستان قار­جىگەرلەرى قاۋىمداستىعى  اتالعان اقپارات قازاقستاننىڭ قار­جىلىق جۇيەسىن تۇراقسىز ەتۋ ماقساتىندا ارانداتۋشىلىق ماز­مۇنعا يە ەكەنىن حابارلايدى», دەلىنگەن بانكتەردىڭ ءمالىم­دەمەسىندە. سالىمشىلارى مەن كليەنت­تەرىن سابىرعا شاقىرعان بانكتەر بۇل جالعان اقپاراتتى تاراتۋشى­لاردى اكىمشىلىك-قىلمىستىق جاۋاپقا تارتقىزۋ ءۇشىن قۇقىق قور­­عاۋ ورگاندارىنا شاعىمدانۋدا. بانك تسەنتر كرەديت شۇعىل ءتۇر­دە بوستاندىق اۋداندىق سوتى­نا جالعان اقپاراتتىڭ شىن­دىق­قا سايكەس كەلمەيتىنىن راستاۋ تۋرالى تالاپ-ارىز بەرمەك. بانك باس­شىلىعى قاڭقۋ ءسوز تارات­قاند­اردى رەسمي تۇردە كەشىرىم سۇراتۋدى ويلاستىرىپ وتىر. سول سياقتى Kaspi bank بان­كروت­تىعى جايىندا جالعان اق­پارات تاراتقان باستاماشىنى انىق­تاۋ ءۇشىن اتالعان بانك 100 ميل­ليون تەڭگە كولەمىندە سىياقى تاعايىن­دادى. قىسقاسى, بانك اكتسيو­نەر­لە­رى مەن جەتەكشىلەرى اران­داتۋ­شى­لىق ءىس-قيمىلدىڭ جاي-جاپ­سا­رىن انىقتاپ, لاڭ تۋدىر­ماق بول­عانداردى زاڭ اياسىن­دا جاۋاپ­كەر­شىلىككە تارتاتىن­دىق­تارىن ءما­لىم­دەۋدە. دۇربەلەڭ جاسا­ماقشى  بول­عانداردى جازالاۋدى اياق­سىز قال­دىرماۋعا قازاقستان قارجى­گەرلەر قاۋىمداستىعى دا ارالاسادى. تۇرعىندارعا تۇراقتى قىزمەت ەتىپ كەلە جاتقان قازاقستاندىق بانكتەر ءوز جۇمىسىن جالعاستىرا بەرەتىن بولادى. ويتكەنى, اتال­عان بانكتەردىڭ بارلىعى دا مەم­لە­كەتتىك دەپوزيتتەرگە كەپىلدىك بەرۋ قورىنىڭ قاتىسۋشىلارى بولىپ تابىلادى. ايناش ەسالي, «ەگەمەن قازاقستان». الماتى.