بوكس • 28 قازان، 2021

ساكەن وليمپيادا چەمپيونىن جەڭدى

51 رەت كورسەتىلدى

سەيسەنبىدەن سارسەنبىگە قاراعان كەشتە بەلگرادتىڭ «شتارك ارەناسىنا» جي­نالعان سان مىڭ جانكۇيەر مەن كوگىل­دىر ەكرانعا كوز تىككەن ميلليون­داعان كورەر­مەننىڭ نازارى وزبەك­ستان­دىق حاسانبوي دۋسماتوۆ پەن قازاق­ستاندىق ساكەن بيبو­سىنوۆقا اۋعانى ءسوزسىز. سوقىر جەرەبە مىقتى ەكى بوكس­شىنى الەم چەمپيو­ناتىنىڭ العاشقى اينالىمىندا جولىقتىردى.

28 جاستاعى حاسانبوي دۋسماتوۆ 2016 جىلى برازيليانىڭ ريو-دە-جانەيرو قالاسىندا الاۋى تۇتانعان وليمپيا ويىندارىندا باس جۇلدەنى ولجالادى. ءاندىجان بوكس مەكتەبى تۇلەگىنىڭ ونەرى كوپشىلىككە ۇناعانى سونشالىق، وعان ۆەل باركەر كۋبوگى تابىس ەتىلدى. ودان بولەك، دۋسماتوۆتىڭ الەم چەمپيوناتى مەن ازيا ويىندارىنىڭ كۇمىس جۇلدەگەرى، قۇرلىق­تىڭ ەكى دۇركىن چەمپيونى دەگەن اتاقتارى تاعى بار. كازىرگى كەزدە ول كاسىپقوي رينگتە كۇش سىناسىپ ءجۇر.

ارينە، ءبىزدىڭ ساكەن بيبوسىنوۆ تا وسال جىگىت ەمەس. ءوزىنىڭ مىقتىلىعىن ەكاتە­رين­بۋرگتەگى الەم چەمپيوناتى مەن توكيو وليم­پياداسىندا مويىنداتقان قانداسىمىز قولا مەدالدى موينىنا ءىلدى. دەسەك تە، سەر­بيا استا­نا­سىنداعى جارىستى تاما­شالاعان مايتالمان ماماندار مەن بىلىكتى باپكەرلەردىڭ دەنى وسى جەكپە-جەكتىڭ ءفاۆوريتى رەتىندە اتاعىنان ات ۇركەتىن وزبەك بوكسشىسىن اتادى.

باپكەرلىك كاسىپتىڭ جىلىك-مايىن شاققان مىرزاعالي ايتجانوۆ بۇل جەكپە-جەككە ءوزىنىڭ ءتول شاكىرتىن وتە جاقسى دايارلاعان ەكەن. بويى مەن قولى قىسقا بولعانىمەن، دەنەسى مىعىم جانە سوققىسى جويقىن دۋسماتوۆقا قارسى دۇرىس تاكتيكا قۇرا ءبىلدى. باسەكەنىڭ باسىنان اياعىنا دەيىن وزبەكستاننىڭ ماق­تانىشى شابۋىلداۋمەن بولدى. ۇنەمى العا ۇمتىلىپ، جۇدىرىعىن ءارى دە، بەرى دە سىلتەدى. بىراق ودان بيبوسىنوۆقا ەش قاۋىپ كەلگەن جوق. ول ۇنەمى قارسىلاسىنىڭ الدىن وراپ وتىردى. قاجەت كەزدە اشىق اي­قاستان دا تارتىنعان جوق. حاسانبويدىڭ سوق­قىلارىنىڭ دەنى اۋا قارماپ قالدى. نا­تي­­جەسىندە، بەس تورەشى دە جەڭىستى ءبىزدىڭ جى­گىت­كە بەردى. وسىلايشا، وليمپيادا چەمپيونى، باركەر كۋبوگىنىڭ يەگەرى دەگەن دارداي اتاعى بار داڭقتى حاسانبوي دۋسماتوۆ قازاق­تىڭ قايسار ۇلىنىڭ مىقتىلىعىن ەرىكسىز مويىنداۋعا ءماجبۇر بولدى. كەلەسى كەزەڭدە ساكەن ۇندىستاندىق ديپاكپەن كۇش سىناسادى.

75 كيلو سالماقتاعى نۇرقانات رايىس تا ءوزىنىڭ كوماندالىق ارىپتەستەرىنىڭ جەڭىستى جولىن جالعاستىردى. ءوزىنىڭ تۇساۋكەسەر كەزدەسۋىندە ول چەرنوگوريالىق ستەفان ساۆ­كوۆيچتى سان سوقتىردى. نۇرقاناتتىڭ كەلەسى قارسىلاسى – مولدوۆالىق ۆلاد گاۆريلىچ.

سوڭعى جاڭالىقتار

ۇقساس جاڭالىقتار