سپورت • 26 قازان، 2021

تىڭ سەرپىلىس بايقالمايدى

29 رەت كورسەتىلدى

جاپونيانىڭ كيتاكيۋسيۋ قالاسىندا سپورتتىق گيمناستيكادان الەم چەمپيوناتى اياقتالدى. ايتۋلى دوداعا 60-قا جۋىق مەملەكەتتەن كەلگەن 300-دەن اسا سپورتشى قاتىستى. ءبىر اپتا بويى شەبەرلىك بايقاسقان ولار 14 جۇلدە جيىنتىعىن ساراپقا سالدى. ناتيجەسىندە، جالپىكوماندالىق ەسەپتە قىتاي قۇراماسى جەكە-دارا كوش باستادى. قىتاي ەلىنىڭ وكىلدەرى 5 التىن، 1 كۇمىس جانە 2 قولا مەدالدى ولجالادى. وسى جۇلدەلەردىڭ دەنى ەرلەردىڭ ەنشىسىندە.

اتاپ ايتساق، جەكەلەگەن جاتتىعۋلار بويىن­شا چجان بوحەن (كوپسايىس)، لان سينيۋي («سا­قينا») جانە حۋ سيۋۆەي («بەلدەمە» مەن «ماڭ­دايشا») الدىنا جان سالماسا، ارۋلاردىڭ سايى­سىندا ۆەي سياويۋان (برۋسيا) التىننان القا تاقتى. جاپونيا قۇراماسى 2 التىن، 5 كۇمىس جانە 1 قولانى ەنشىلەپ، جالپى ەسەپتە ەكىنشى ورىنعا تۇراقتادى. ءۇشىنشى ورىندا – يتاليا گيمناسشىلارى. اپەننين تۇبەگىنىڭ تۇلەكتەرى 1 التىن، 2 كۇمىس جانە 1 قولانى قورجىنعا سالدى. سونداي-اق جەڭىس تۇعىرىنا كوتەرىلگەندەر اراسىندا اقش (1 التىن+1 كۇمىس+3 قولا)، رەسەي (1+1+2)، برا­زيليا (1+1+0)، فيليپپين (1+1+0)، گەرمانيا (0+1+0)، يزرايل (0+0+1)، ۋكراينا (0+0+1) جانە فينليانديا (0+0+1) قۇرامالارى بار.

قازاقستاننىڭ ۇلتتىق قۇراماسى ساپىندا بىرنەشە گيمناسشىمىز ونەر كورسەتتى. ەڭ ۇزدىك ناتيجەگە ناريمان قۇربانوۆ قول جەتكىزدى. «ات» سناريادىندا امەريكالىق ستيۆەن نەدوروسيك، قىتايلىق ۆان حاو جانە جاپونيالىق كاد­جۋما كايادان قالىپ قويعان وتانداسىمىز ءتور­تىنشى ورىنعا تابان تىرەدى. جاتتىعۋدىڭ ەكى ءتۇرى بويىنشا ميلاد كاريمي فينالعا شىقتى. «ماڭدايشانى» ول بەسىنشى ورىنمەن قورىتىندىلاسا، ەركىن جاتتىعۋدا جەتىنشى ساتىعا جايعاستى. بىلاي قاراعاندا، بۇل جامان ناتيجە ەمەس سەكىلدى. جارىس جولىندا جاندارىن سالعان جىگىتتەرىمىز الەمنىڭ ەڭ ۇزدىك گيمناسشىلارىمەن ءبىراز تىرەستى. دەسەك تە قورجىنعا جۇلدە تۇسپەگەننەن كەيىن جاپونياداعى كورسەتكىشكە كوڭىلىمىز تولدى دەپ ايتا المايمىز.

ال كەزىندە سپورتتىق گيمناستيكادان قازاق­ستاندا جەڭىسپەن ورىلگەن تاماشا ءداستۇر­دىڭ بول­عانىن كوزى قاراقتى جانكۇيەر ۇمىتا قويعان جوق. راسىندا دا سول كەزدەردى ساعى­نىشپەن ەسكە الامىز. سوناۋ 1964 جىلى توكيو وليمپياداسىندا شىمكەنتتىڭ تۋماسى يۋري تساپەنكو «ات» جاتتىعۋى بويىنشا يۋگوسلاۆيالىق ميروسلاۆ تسەرار مەن جاپو­نيا­لىق سيۋدزي تسۋرۋميدەن عانا قالىپ قويىپ، قولا مەدالدى يەلەنسە، كوماندالىق سايىستا كۇمىس جۇلدەنى ەنشىلەدى.

جەتپىسىنشى جىلدارى نەللي كيم جاسىنداي جارقىلدادى. ول كەزدەرى الەمدىك ارەنالاردا كەڭەس وداعىنىڭ وكىلدەرى ليۋدميلا تۋريششەۆا مەن ولگا كوربۋت جانە رۋمىنيالىق ناديا كومانەچيدىڭ قارقىنىنا شىداس بەرۋ مۇم­كىن ەمەس ەدى. گدر مەن ماجارستاندا دا كەرەمەت گيمناسشىلاردىڭ قالىڭ شوعىرى بولدى. وسىنداي مىقتىلارعا باسەكەلەس بولا ءجۇرىپ، نەلليدىڭ دە شەبەرلىك دەڭگەيى شارىقتاۋ شەگىنە جەتتى. شىمكەنتتە نيكولاي بايديندەي بىلىكتى باپكەردەن ءتالىم-تاربيە العان ول مونرەال مەن ماسكەۋ وليمپيادالارىندا 5 التىن مەن 1 كۇمىس مەدالدى ولجالادى. الەم چەمپيوناتىندا 5 التىن، 4 كۇمىس جانە 2 قولا جۇلدەنى يەلەندى. ودان بولەك، ەۋروپا بىرىنشىلىگىندە 9 رەت (2 التىن+3 كۇمىس+4 قولا) جەڭىس تۇعىرىنا كوتەرىلدى.

سەكسەنىنشى جىلداردىڭ ەكىنشى جارتىسىندا ۆالەري ليۋكين اتوي سالدى. قازاقتىڭ مايتالمان مامانى ەدىگە جاروۆتىڭ قول استىندا جاتتىققان اقتوبەلىك ورەن 1988 جىلى سەۋل وليمپياداسىندا 2 التىن مەن 2 كۇمىستى قان­جى­عاسىنا بايلادى. الەم چەمپيوناتىندا 2 ال­تىن مەن 1 قولانى قورجىنعا سالدى. ەۋروپا بىرىن­شىلىگىندە بەس رەت تەڭدەسسىز دەپ تانىلىپ، ەكى مارتە جۇلدەگەرلەر ساناتىنا قوسىلدى. ليۋكينمەن بىرگە ونەر كورسەتكەن الماتىلىق ۆلاديمير نوۆيكوۆ وليمپيا ويىندارىندا ءبىر جانە دۇنيەجۇزىلىك دودادا ەكى التىندى ەنشىلەدى. بۇل اتاقتارعا ول كوماندالىق سايىستاردا قول جەتكىزدى. سونداي-اق ناتاليا يلەنكو دا سول كەزدەگى مىقتى گيمناسشىلاردىڭ ءبىرى بولعانىن ايتا كەتكەن ابزال. ونىڭ ەكى دۇركىن الەم چەمپيو­نى جانە قۇرلىق بىرىنشىلىگىنىڭ كۇمىس جۇلدەگەرى دەگەن اتاقتارى بار.

كەڭەس وداعى ىدىراعاننان كەيىن ەلىمىزدە سپورتتىڭ بۇل ءتۇرى قاتتى قۇلدىرادى. تاۋەلسىزدىك العان كەزدەن بەرى قازاقستاننىڭ گيمناسشىلارى وليمپيا ويىندارىنان ۇنەمى قۇر قول قايتىپ جۇرگەنى وسى ءسوزىمىزدىڭ ايقىن دالەلى. الەم چەمپيوناتىندا جالعىز عانا جۇلدەگە قولىمىز جەتتى. 1997 جىلى شۆەيتساريانىڭ لوزاننا قالاسىندا جالاۋى جەلبىرەگەن جارىستا سەرگەي فەدورچەنكو قولدى تىرەپ جاسالاتىن جاتتىعۋدا الدىنا جان سالماي، التىن تۇعىرعا كوتەرىلدى. سودان بەرى شيرەك عاسىرعا جۋىق ۋاقىت وتسە دە، تورتكۇل دۇنيەنىڭ تەڭدەسسىزدەرى جينالعان جارىستا قانجىعامىز ءبىر مايلانعان جوق.

باسقا دا ءبىر ەلەۋلى تابىستارىمىز جايىندا ايتار بولساق، 2000 جىلى سيدنەيدە الاۋ­ى تۇتانعان وليمپيا ويىندارىندا سەرگەي فەدورچەنكو بەسىنشى ورىن الدى. 2004 جىلعى افينا وليمپياداسىندا ەرنار ەرىمبەتوۆ ءتورتىنشى ساتىعا تابان تىرەدى. وتكەن عاسىردىڭ توقسانىنشى جىلدارىنىڭ سوڭىندا الەكسەي دميتريەنكو الەم كۋبوگىن يەلەندى. ءتۇرلى ءدۇبىرلى دودادا دارالانعان باسقا دا ءبىرلى-جارىم گيمناسشىلار بولدى، بىراق ولاردىڭ ەشقايسىسى وليمپيا ويىندارى مەن الەم چەمپيوناتتارى سەكىلدى اسا ماڭىزدى جارىستاردا جۇلدەلى ورىندارعا قول جەتكىزە المادى. وسى جايتتىڭ بارلىعىن وي ەلەگىنەن وتكىزە كەلە، قازاقستاننىڭ سپورتتىق گيمناستيكاسى بىرتە-بىرتە قۇردىمعا كەتىپ بارا جاتقانىن اڭعاراسىز.

سوڭعى جاڭالىقتار

ۇقساس جاڭالىقتار