قارجى • 26 قازان، 2021

قارجى پيراميدالارىمەن كۇرەس كۇشەيدى

49 رەت كورسەتىلدى

ەل پرەزيدەنتى قاسىم-جومارت توقاەۆ بيىلعى جولداۋىندا الاياقتىققا جانە قارجى پيراميدالارىنا قارسى شارالار كەشەنىن ازىرلەۋدى تاپسىردى. بۇل رەتتە قارجى نارىعىن رەتتەۋ جانە دامىتۋ اگەنتتىگى ءوز قۇزىرەتى شەڭبەرىندە اتالعان باعىت بويىنشا جۇمىس جۇرگىزۋدە.

ماسەلەن، اگەنتتىك سوڭعى 8 ايدا قار­جى پيراميدالارىنىڭ قىزمەتى مەن الاياق­تىقتىققا قاتىستى جەكە جانە زاڭ­دى تۇلعالاردىڭ 125 ءوتىنىشىن قاراس­تىرعان. جىل باسىنان بەرى قارجى پيرامي­دالارى­نىڭ بەلگىلەرى بار 110-نان استام ۇيىم بويىنشا قۇقىق قورعاۋ ورگاندارىنا اقپارات جىبەرىلگەن.

اگەنتتىكتىڭ قارجى ۇيىمدارىنىڭ ءادىسناماسى جانە پرۋدەنتسيالىق رەتتەۋ دەپارتامەنتىنىڭ ديرەكتورى داۋرەن سالىمباەۆتىڭ ايتۋىنشا، قارجى پيراميدالارى مەن الاياقتىققا قارسى شارالاردى ازىرلەۋ ءۇشىن ۆەدومستۆوارالىق جۇمىس توبى قۇرىلعان. ونىڭ قۇرامىندا باس پروكۋراتۋرانىڭ، ۇلتتىق بانكتىڭ، ىشكى ىستەر مينيسترلىگىنىڭ، قارجىلىق مونيتورينگ اگەنتتىگىنىڭ، سونداي-اق اقپارات جانە قوعامدىق دامۋ مينيسترلىگىنىڭ وكىلدەرى بار.

– جۋىردا جۇمىس توبى جوسىقسىز ءىس-قيمىل پراكتيكاسىنىڭ 39 ولشەم­شار­تىنان تۇراتىن قارجى پيراميدالارى بەلگى­لەرىنىڭ تىزبەسىن بەكىتتى. بۇل بەلگىلەر قانداي؟ ءبىرىنشى بەلگى – نارىقتىق كورسەتكىشتەردەن الدەقايدا اسىپ تۇسەتىن جو­عارى كىرىستىلىككە ۋادە ەتۋ. ەكىنشى بەلگى – بيزنەستى قاتىسۋشىنىڭ كىرىسى جاڭا­دان قوسىلعان ادامداردىڭ سالىمى ەسە­بىنەن قالىپتاساتىن جەلىلىك ماركە­تينگ قاعيداتتارىمەن ۇيىمداستىرۋ. ءۇشىنشى بەلگى – كومپانيادا كىرىستىڭ، سونداي-اق قاجەتتى ليتسەنزيالار مەن رۇقساتتاردىڭ  بولماۋى. ءتورتىنشى بەلگى – جوبالاردىڭ اتاۋىنا بەلگىلى جاريا كومپانيالاردىڭ، برەندتەردىڭ اتاۋىنا ۇقساس ءسوز تىركەستەرىن نەمەسە نىشاندارىن پايدالانۋ، – دەيدى د.سالىمباەۆ.

بۇعان قوسا قارجى پيراميدالارىنىڭ بەلگىلەرى بار ۇيىمداردىڭ ءتىزىمىن جاريالاۋ الگوريتمى كەلىسىلگەن. ءتىزىم اگەنتتىكتىڭ سايتىندا ورنالاستىرىلعان. بۇگىندە وندا قارجى پيراميدالارىنىڭ بەلگىلەرى بار 56 ۇيىم تىركەلگەن. ءتىزىم ۇنەمى جاڭارتىلىپ وتىرادى. ول جەكە جانە زاڭدى تۇلعالاردىڭ شاعىمدارى مەن وتىنىشتەرىنىڭ، سونداي-اق قۇقىق قورعاۋ ورگاندارى تاراپىنان تۇسكەن سۇراۋلاردىڭ نەگىزىندە قالىپتاستىرىلادى.

– قارجى نارىعىندا پاندەميا كەزە­ڭىندە ميكروكرەديت الۋ ءۇشىن جەكە باسىن كۋالاندىراتىن قولدان جاسالعان نە­مەسە ۇرلانعان قۇجاتتاردى قولدانۋ پراكتيكاسى كەڭىنەن تارادى. وسى جىلدىڭ ساۋىرىندە الاياقتىقتىڭ مۇنداي تۇرلەرىنە جول بەرمەۋ ءۇشىن اگەنتتىك ەلەكتروندى تاسىل­مەن ميكروكرەديتتەر بەرۋ قاعيدا­لارىن قاتاڭداتتى. جاڭا تالاپتاردا قارىز الۋشىنى يدەنتيفيكاتتاۋدىڭ قوسىم­شا تاسىلدەرى كوزدەلگەن. ەندى ميكرو­كرەديتتى ەلەكتروندى تاسىلمەن بەرۋ ءۇشىن ەلەكتروندى-تسيفرلى قولتاڭ­بادان بولەك، ۇلتتىق بانكتىڭ بانكارالىق ەسەپ ايىرىسۋ ورتالىعىنىڭ سەرۆيستەرى ارقى­لى قارىز الۋشىنى بيومەتريالىق يدەنتيفيكاتتاۋ، نە ناقتى ۋاقىت رەجىمىندە قارىز الۋشىنىڭ دەربەس دەرەكتەرى مەن بەينەسىن ەكى فاكتورلى تەكسەرۋ جۇيەسى پايدالانىلۋى مۇمكىن، – دەيدى دەپارتامەنت ديرەكتورى.

د.سالىمباەۆتىڭ تۇسىندىرۋىنشە، ەكى فاكتورلى تەكسەرۋ شەڭبەرىندە قارىز الۋشىنىڭ جەكە كابينەتىنە قول جەتكىزۋدىڭ ءبىر رەتتىك پارولدەرى جانە كليەنتتىڭ ناقتى ۋاقىت رەجىمىندەگى بەينەسىن ونىڭ جەكە باسىن كۋالاندىراتىن قۇجاتتاعى بەينەسىمەن سالىستىرىپ تەكسەرەتىن باعدارلاما پايدالانىلادى.

– قارىز الۋشىلاردى يدەنتيفيكات­تاۋعا قويىلاتىن تالاپتاردىڭ وزگەرۋىنە بايلانىستى جالعان ميكروكرەديتتەردى رەسىمدەۋگە قاتىستى شاعىمدار سانى كۇرت ازايدى. 2020 جىلى 94،4 ملن تەڭگەگە جالعان ميكروكرەديت راسىمدەگەن 1 102 جاعداي انىقتالسا، بيىلعى مامىردان باستاپ، ياعني ەلەكتروندى تاسىلمەن ميكروكرەديتتەر بەرۋ قاعيدالارىنا قويىلاتىن تالاپتاردىڭ وزگەرۋىمەن جالعان ميكروكرەديت بەرۋگە قاتىستى نەبارى 6 جاعداي تىر­كەلدى، – دەيدى ول.

اگەنتتىك قازىرگى ۋاقىتتا ەلەكتروندى تاسىلمەن ميكروكرەديتتەر بەرۋ قاعي­دالارىنا قارىز الۋشىلاردىڭ يدەنتيفيكاتتاۋ دەرەكتەرىن ءموبيلدى بايلانىس وپەراتورلارىنىڭ دەرەكتەرىمەن سالىس­تىرىپ تەكسەرۋ مۇمكىندىگىن كوزدەيتىن تۇزەتۋلەر جوباسىن تالقىلاۋدا. ياعني كليەنتتىڭ جەكە سايكەستەندىرۋ ءنومى­رىن ءموبيلدى بايلانىس وپەراتورىنىڭ دەرەكقورىنداعى ابونەنتتىك ءنومىر يەسىنىڭ جەكە سايكەستەندىرۋ نومىرىمەن سالىستىرىلماق. بۇدان بولەك، جال­عان ميكروكرەديتتەر انىقتالعان كەزدە ازاماتتاردىڭ قۇقىقتارىن قورعاۋ ماقساتىندا قۇقىق قورعاۋ ورگاندارى ميكروكرەديت بويىنشا سىياقى ەسەپتەۋدى جانە جابىرلەنۋشىگە قاتىستى تالاپ-ارىز جۇمىسىن توقتاتا تۇرۋ جونىندەگى شارالار كوزدەلگەن.

سوڭعى جاڭالىقتار

مەركەل قىزمەتىنەن كەتتى

ساياسات • بۇگىن، 17:30

ساراپشى گولوۆكيندى قاتتى سىناپ تاستادى

كاسىپقوي بوكس • بۇگىن، 16:15

ۇقساس جاڭالىقتار