قازاقستان • 22 قازان، 2021

مەديتسينا قىزمەتكەرلەرىنىڭ كاسىبي قىزمەتىن ساقتاندىرۋ تۋرالى زاڭ سىن كوتەرمەيدى - Nur Otan

دەنساۋلىق ساقتاۋ مينيسترلىگى مەن باسقا دا مۇددەلى مەملەكەتتىك ورگاندار مەديتسينا قىزمەتكەرلەرىنىڭ كاسىبي قىزمەتىن ساقتاندىرۋ بويىنشا دەنساۋلىق ساقتاۋ ماسەلەلەرى جونىندەگى زاڭ جوباسىن قايتا قاراۋى كەرەك. بۇل جونىندە «Nur Otan» پارتياسى جانىنداعى ۇلت دەنساۋلىعى ماسەلەلەرى جونىندەگى رەسپۋبليكالىق قوعامدىق كەڭەستىڭ مۇشەلەرى ايتتى، دەپ حابارلايدى Egemen.kz پارتيانىڭ ءباسپاسوز قىزمەتىنە سىلتەمە جاساپ.

جانبولات كەنجەعۇل

زاڭ جوباسى ەمدەلۋشى سىرقاتىنىڭ اۋىرلىعىن جانە ونىڭ دەنساۋلىق ساقتاۋ مەكەمەسىندەگى جاعدايىن ەسكەرمەستەن، مەديتسينا قىزمەتكەرىنىڭ ناۋقاس ءومىرى مەن دەنساۋلىعىنا كەلتىرگەن زيانىن وتەۋ مىندەتىن كوزدەيدى. كەڭەس مۇشەسى تاتيانا بۋلگاتسەۆيچ اتاپ وتكەندەي، زاڭنامادا «مەديتسينالىق قاتەر» دەگەن ۇعىم جوق.

ء«بىزدىڭ قىزمەتكەرلەر جۇمىس ىستەيتىن جاعدايدى دارىگەرلەر ەمەس، مەملەكەت، بيۋدجەت مۇمكىندىكتەرى انىقتايدى. اۋىلدىق اۋرۋحاناداعى رەنتگەن اپپاراتى 1960 جىلى شىعارىلعان، سونىڭ سالدارىنان دياگنوستيكالىق قاتەلىكتەردىڭ بولۋ قاۋپى جوعارى. ءارتۇرلى جاعدايلار بولادى، ءحالى اۋىر، ءتىپتى ەمدەلمەيتىن ناۋقاستار دا بار. ولارعا قانشا قالاساڭىز دا كومەكتەسۋ مۇمكىن ەمەس. دارىگەرلەر عاجايىپتار جاساي الماعانى ءۇشىن كىنالى بولا ما؟»، دەدى تاتيانا بۋلگاتسەۆيچ.

سپيكەر سونداي-اق زاڭ جوباسىنىڭ ماتىنىندە دارىگەردىڭ بايقاۋسىزدا قاتەلىك جىبەرگەنى نەمەسە دياگنوستيكالىق پروتسەدۋرالاردى جۇرگىزۋدەگى ولقىلىعى ءۇشىن جاۋاپكەرشىلىگى كوزدەلگەنىنە نازار اۋداردى.

«مۇنداي جاعدايدا دارىگەرلەر تەك ايىپتاۋدان قورقىپ، ءتىپتى تۇماۋمەن اۋىرعان كەزدە دە مولەكۋلالىق-بيولوگيالىق زەرتتەۋلەردى تاعايىندايدى. بۇل گيپەردياگنوستيكاعا اكەلەدى. ال دەنساۋلىق ساقتاۋ رەسۋرستارىن، اسىرەسە قازىرگىدەي كوۆيد پاندەمياسى جاعدايىندا ۇنەمدەپ پايدالانۋ قاجەت. ماماندىق تارتىمدىلىعىن جوعالتىپ، سالادان مامانداردىڭ كەتۋى مەديتسينالىق كومەك ساپاسىنىڭ تومەندەۋىنە اكەلەدى. مۇنىڭ بارلىعىنان تۇپتەپ كەلگەندە ەمدەلۋشىلەر زارداپ شەگەدى»، دەپ اتاپ ءوتتى تاتيانا بۋلگاتسەۆيچ.

سونىمەن قاتار، پارتيالىقتار قر قىلمىستىق كودەكسىندەگى 317-باپتى – «مەديتسينا نەمەسە فارماتسەۆتيكا قىزمەتكەرلەرىنىڭ كاسىبي مىندەتتەرىن تيىسىنشە ورىنداماۋىن» تالقىلادى. كەڭەس مۇشەلەرىنىڭ پىكىرىنشە، بۇل نورما مەديتسينا قىزمەتكەرلەرىنىڭ قۇقىقتارىنا نۇقسان كەلتىرەدى

وتىرىس قورىتىندىسىندا كەڭەس دەنساۋلىق ساقتاۋ مينيسترلىگىنە قر قىلمىستىق كودەكسىنىڭ، ونىڭ ىشىندە 317-بابى بويىنشا، ەلىمىزدە «مەديتسينا قىزمەتكەرلەرىنە قاتىستى كاسىبي مىندەتتەرىن تيىسىنشە ورىنداماعانى ءۇشىن» قوزعالعان ىستەردىڭ ەسەبىن جانە تالداۋىن ەنگىزۋدى ۇسىندى. مۇددەلى مەملەكەتتىك ورگاندارمەن بىرلەسىپ، ۆەدومستۆو قر قك 317-بابىن قايتا قاراۋ بويىنشا پارلامەنتكە ۇسىنىستار ەنگىزۋدى قامتاماسىز ەتۋى ءتيىس.