قىلمىستىق توپ رەسپۋبليكالىق «قاراسورا-2021» جەدەل الدىن الۋ ءىس-شاراسى, سونداي-اق «رەفلەكس-2021» وڭىرلىك وپەراتسياسىن وتكىزۋ بارىسىندا انىقتالدى. ولاردى جامبىل وبلىسى پوليتسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسىنىڭ جانە ۇلتتىق قاۋىپسىزدىك كوميتەتى دەپارتامەنتىنىڭ قىزمەتكەرلەرى بىرلەسىپ ۇستادى.
قىلمىستىق توپ جامبىل وبلىسىنىڭ اۋماعىندا «ماريحۋانا» دايىنداۋمەن جانە ونى باسقا وڭىرلەرگە ساتۋمەن اينالىسقان. 39 جانە 51 جاس ارالىعىنداعى بارلىعى 5 كۇدىكتى انىقتالدى. اتالعان ەر ادامداردىڭ تورتەۋى – بايزاق اۋدانىنىڭ تۇرعىندارى, بىرەۋى تاراز قالاسىنان.
«ولاردىڭ تۇرعىلىقتى جەرى بويىنشا, سونداي-اق كۇدىكتىلەردىڭ ءبىرىنىڭ وندىرىستىك بازاسىنا ءتىنتۋ جاساپ, ءبىر مەزگىلدە جۇرگىزىلگەن ۇستاۋ وپەراتسياسى بارىسىندا جالپى سالماعى 1 كەلىدەن استام گاشيش, 30 كەلىدەن اساتىن ماريحۋانا, وسىرىلگەن كاننابيس وسىمدىگىنىڭ بۇتالارى, يلەۋىش قۇرالى جانە گاشيش وندىرۋگە ارنالعان باسقا دا قۇرىلعىلار, سونداي-اق تىركەلمەگەن 2 تەگىس ۇڭعىلى مىلتىق, 25 اڭشىلىق جانە 16 تراۆماتيكا پاتروندارى تاركىلەندى. قازىرگى ۋاقىتتا ۇستالعانداردىڭ بارلىعى كىناسىن مويىندادى. ولار تاراز قالاسى پوليتسيا باسقارماسىنىڭ ۋاقىتشا ۇستاۋ يزولياتورىنا قامالدى», دەپ اتاپ ءوتتى ەسىرتكى قىلمىسىنا قارسى ءىس-قيمىل باسقارماسىنىڭ باستىعى اسقار جۇمابەكوۆ.
اتالعان قىلمىستىق ءىس بويىنشا تاجىريبەلى قىزمەتكەرلەردەن جەدەل تەرگەۋ توبى قۇرىلدى, سوتقا دەيىنگى تەرگەۋ امالدارى جۇرگىزىلىپ جاتىر.
